ગુજરાત વિધાનસભામાં ઈમ્પેક્ટ ફી બિલ સર્વાનુમતે પસાર, નક્કી ફી ચુકવી બાંધકામ નિયમિત થશે

ગુજરાત વિધાનસભાનું  આજે પહેલું સત્ર મળ્યું હતું જેમાં બિનઅધિકૃત બાંધકામોને નિયમિત કરવા માટેનું વિધેયક રજૂ કરાયું હતું. જેમાં મંત્રીશ્રી ઋષિકેશભાઈ પટેલ દ્વારા ઇમ્પેક્ટ ફી બિલ રજૂ કર્યું હતું. ગુજરાત વિધાનસભામાં રજુ થયેલું ‘ગુજરાત અનઅધિકૃત બાંઘકામ નિયમિત કરવા બાબત વિધેયક, 2022’ સર્વાનુમતે પસાર થયું હતું.

આ અંગે મંત્રીશ્રી ઋષિકેશભાઈ પટેલે જણાવ્યું હતું કે, રાજયની દરેક મહાનગરપાલિકાઓ, શહેરી વિકાસ સત્તામંડળો અને નગરપાલિકા વિસ્તારમાં તા. 01 ઓક્ટોબર 2022 પહેલા થયેલા અનઅધિકૃત બાંધકામો નિયમિત કરી શકાશે. વટહુકમની તારીખ 17 ઓક્ટોબર 2022થી ચાર માસમાં આ બાંધકામો નિયમિત કરવા મકાન  માલિક-કબજેદારોએ e-nagar પોર્ટલ પર અરજી કરવી પડશે ઉપરાંત માર્જિન, બીલ્‍ટઅપ, મકાનની ઊંચાઈ, ઉપયોગમાં ફેરફાર, કવર્ડ પ્રોજેક્શન, ફકત 50% માટે ફી લઈ પાર્કિગ, 50% કવરેજની મર્યાદાને આધીન અને માત્ર મળવા પાત્ર ઉપયોગ  કોમન પ્‍લોટ, સેનિટરી સુવિધા ફી લઈ નિયમબધ્‍ધ થશે.

મંત્રીએ કહ્યુ હતું કે, ગેરકાયદે બાંધકામો અને બી.યુ. પરવાનગી વગરના બાંધકામોને મોટા પાયા પર તોડી પાડવા કે ફેરફાર કરવાથી અસંખ્ય માણસો ઘરવિહોણા અને બેરોજગાર થવાની શક્યતા જોતા તથા કાયદો અને વ્યવસ્થા કથળવાની પણ શક્યતા હતી. તેમજ સામાન્ય માણસને મુશ્કેલી પડી શકે તેમ હોઇ જે ઇચ્છનિય નહી હોવાથી આ પ્રકારની સ્થિતિનું નિર્માણ થાય નહી તે માટે રાજય સરકાર માટે સમગ્ર રાજયના શહેરોમાં આવા અનઅધિકૃત મકાનો અને બાંધકામોને નિયમિત કરવા માટે યોગ્ય કાયદો ઘડી, કમ્પાઉન્ડીંગ ફી વસુલ કરી, આવા બાંધકામોને નિયમિત કરવા જરૂરી બન્યા હતા.

આ પણ વાંચો - આચાર્ય દેવવ્રત દ્વારા ગુજરાત વિદ્યાપીઠને સ્વચ્છ બનાવવાની મુહિમ