જ્યા સુધી કોહલી સદી નહીં ફટકારે ત્યા સુધી હું લગ્ન નહીં કરું: વિરાટ પ્રશંસક

મોહાલી ટેસ્ટમાં ટીમ ઈન્ડિયાના ઓલરાઉન્ડર ખેલાડી રવિન્દ્ર જાડેજાએ એક ખાસ અંદાજમાં બેટિંગ કરી સ્કોર 500 ઉપર પહોંચાડ્યો હતો. તેણે આ મેચમાં સદી ફટકારી તેના કેરિયરની સર્વશ્રેષ્ઠ ઇનિંગ પણ રમી હતી. જો કે આ મેચમાં પ્રશંસકો વિરાટની સદીની રાહ જોઇ રહ્યા હતા. પરંતુ જાડેજાએ તેનું કામ કરી દીધું. જોકે, તે પણ સાચું છે કે, વિરાટ કોહલીને આંતરરાષ્ટ્રીય સદી ફટકાર્યાને ઘણો સમય થઈ ગયો છે. કોહલી જ્યારે શ્રીલંકા સામે મોહાલીના આઈએસ બિન્દ્રા સ્ટેડિયમમાં તેની કારકિર્દીની 100મી ટેસ્ટ મેચ રમવા મેદાનમાં ઉતર્યો ત્યારે ચાહકોને આશા હતી કે તે તેની સદીનો દુષ્કાળ ખતમ કરી દેશે, પરંતુ ચાહકોને નિરાશા હાથ લાગી હતી. 

કોહલી આ ઐતિહાસિક મેચની પ્રથમ ઇનિંગમાં અડધી સદી પણ ફટકારી શક્યો ન હતો અને 45 રન બનાવીને આઉટ થયો હતો. આ પછી, પ્રશંસકોએ વિરાટના બેટ સાથે 71મી આંતરરાષ્ટ્રીય સદી જોવા માટે વધુ રાહ જોવી પડશે. જો કે, તેમની વચ્ચે કેટલાક એવા ચાહકો છે, જેઓ કહે છે કે હવે જ્યાં સુધી કોહલીના બેટથી 71મી ઈન્ટરનેશનલ સેન્ચ્યુરી નહીં બને ત્યાં સુધી તે લગ્ન નહીં કરે. ફેન્સની આ પોસ્ટ સોશિયલ મીડિયા પર ખૂબ વાયરલ થઈ રહી છે.