મોરબી દુર્ઘટનામાં 50 લોકોના જીવ બચાવનાર હુસેને કહ્યું- ત્યા લોકો વિડીયો જ બનાવી રહ્યા હતા

મોરબીની બ્રિજ તૂટ્યાની ઘટનાએ આજે ઘણા પરિવારને રડતા કરી દીધા છે. આ ઘટનામાં કોઇ એવું નહીં હોય કે જેની આંખમાંથી પાણી ન આવ્યું હોય. બ્રિજ તૂટવાની ઘટના બન્યા બાદ ઘણા લોકો બચાવ કામગીરીમાં જોડાયા હતા. તેમા એક યુવક કે જેનું નામ હુસેન મહેબુબ પઠાણ છે તે પણ જોડાયો હતો. હુસેન સાથે ગુજરાત ફર્સ્ટના પ્રતિનિધિએ જ્યારે મોરબીની ઘટના અંગે પુછ્યું તો તેણે ત્યા શું થઇ રહ્યું હતું તે અંગે જણાવ્યું હતું. 

મોરબીમાં બ્રિજના તૂટ્યા બાદ મોટી સંખ્યામાં લોકોએ તેમના પરિવારજનો ગુમાવ્યા છે. પરંતુ આ દરમિયાન દેવદૂત બનીને આવેલા ઘણા લોકોએ પાણીમાં ડૂબતા લોકોના જીવ બચાવ્યા હતા. તેમા એક યુવક હુસેન મહેબુબ પઠાણ પણ છે. જેણે ગુજરાત ફર્સ્ટ સાથે આ અંગે જણાવતા કહ્યું હતું કે, તેને તરતા સારું આવડે છે અને વળી તેનું ઘર પણ આ ઘટના જ્યા બની તેનાથી નજીક છે. જેવી તેની આ અંગે જાણ થઇ કે આવી ઘટના બની છે કે તુરંત જ તે બ્રિજ સુધી પહોંચ્યો હતો. વળી ગુજરાત ફર્સ્ટ સાથે ઘટનાની જાણકારી આપતા હુસેને એક ચોંકાવનારી વાત પણ કરી. તેણે કહ્યું કે, હું જ્યારે પહોંચ્યો ત્યારે મોટાભાગના લોકો વિડીયો બનાવી રહ્યા હતા. કોઇ ખાસ મદદ નહોતી. જે પણ લોકો ત્યા તે દરમિયાન હતા તેઓ માત્ર વિડીયો જ બનાવી રહ્યા હતા. હુસેને વધુમાં કહ્યું કે, અહીં રેસ્ક્યુ ટીમે ઘણુ સારું કામ કર્યું છે. તેમણે અમને બોટ આપી હતી, આ સાથે તેમણે રેઇનકોટ પણ આપ્યો હતો. જે થઇ શકતું હતું તે અમે કર્યું અને જેટલી મદદ અમે રેસ્ક્યુ ટીમને કરી શકતા હતા તે અમે કરી હતી. ગુજરાત ફર્સ્ટની ટીમ સાથે આ ઘટના અંગે બોલતા હુસેન એક સમય માટે રડવા લાગ્યો હતો. જે બતાવે છે કે ઘટનાની તેના મન પર કેવી અસર થઇ છે. 

આ પણ વાંચો - PM મોદી આજે મોરબીની દુર્ઘટનામાં ઘાયલ અને મૃતકોના પરિવારજનોને મળશે