કાનપુરમાં માનવતા શર્મશાર, વહુએ વયોવૃદ્ધ સાસુને ઢોરમાર માર્યો

સોશિયલ મીડિયા પર ઘણી બાબતો વાયરલ થતી હોય છે. જેમાં ઘણાં હ્યદય દ્રાવક દ્રશ્યો પણ જોવાં મળતાં હોય છે, જે માનવતાને લજવે છે. કંઇક આવો જ માનવતાને લજવતો એક વીડિયો ફરી વાયરલ થયો છે. તપાસના અંતે આ વીડિયો કાનપુરનો હોવાનું જાણવા મળી રહ્યું છે. 

વાયરલ વીડિયોમાં એક મહિલા એક વૃદ્ધ બીમાર મહિલાને ખરાબ રીતે મારતી જોવા મળી રહી છે. યુપીના કાનપુરમાં આ વીડિયો વાયરલ થઈ રહ્યો છે. સોશિયલ મીડિયા પર વાયરલ થયેલા આ વીડિયોએ માનવતાને શરમાવી દીધી છે. વીડિયો કાનપુર જિલ્લાના ચકેરી વિસ્તારનો બતાવવામાં આવી રહ્યો છે. વીડિયોમાં એક મહિલા તેની 105 વર્ષની સાસુને જાનવરની જેમ મારતી જોવા મળી રહી છે. 

આ વીડિયો સોશિયલ મીડિયા પર વાયરલ થયા બાદ પોલીસ એક્શનમાં આવી ગઈ અને સાસુને હેરાન કરનાર પુત્રવધૂને દબોચી લીધી છે. પોલીસ પુત્રવધૂને પોલીસ સ્ટેશન લાવીને પૂછપરછ કરી રહી છે. વીડિયોમાં જોવા મળે છે કે ખાટલા પર બેઠેલી એક વૃદ્ધ સાસુને તેની વહુ ખરાબ રીતે ઢોર માર મારી રહી છે અને ક્યારેક તે તેના વાળ પકડીને તેને જમીન પર પછાડી રહી છે. સાસુને નહાવાથી લઈને ખાવાનું ખવડાવવાની બાબતમાં ઢોરને પણ શરમાવે જેવું વર્તન જોઈ પાડોશીઓએ આખો વીડિયો બનાવીને સોશિયલ મીડિયા પર વાયરલ કર્યો હતો.

જયરામ દેવી ચકેરીના ખાખખેડાના રહેવાસી ભગવાન બાલીની 105 વર્ષીય વયોવૃદ્ધ માતા તેમની સાથે રહે છે. પાડોશીઓના જણાવ્યા અનુસાર ભગવાન બાલી ઈ-રિક્ષા ડ્રાઈવર છે. લોકોએ જણાવ્યું કે તેની પત્ની આરતી ગુપ્તા તેની સાસુને નિર્દયતાથી મારતી હતી. 

વીડિયો જોયા બાદ ચકેરી ઈન્સ્પેક્ટર મહિલા પોલીસ સાથે ભગવાન બાલીના ઘરે પહોંચ્યા અને આરતીને પકડીને પોલીસ સ્ટેશન લઈ આવ્યા. ચકેરીના ઈન્સ્પેક્ટર મધુર મિશ્રાએ જણાવ્યું કે આરોપી પુત્રવધૂની પૂછપરછ બાદ કાર્યવાહી કરવામાં આવી રહી છે. જોઈન્ટ કમિશનર આનંદ પ્રકાશ તિવારીએ કહ્યું કે આ વીડિયોએ તેમને હચમચાવી દીધા છે. સમગ્ર કેસની તપાસ એસીપી મૃગાંક શેખરને સોંપવામાં આવી છે.