સરકારનો સૌથી મોટો નિર્ણય, ટાર્ગેટ કિલિંગ વચ્ચે 177 કાશ્મીરી પંડિત ટીચર્સની કરાઈ બદલી

કાશ્મીરમાં પરિસ્થિતિ સતત ખરાબ થઇ રહી છે. અહીં ટાર્ગેટ કિલિંગમાં દિવસેને દિવસે વધારો થતા હવે સ્થાનિકોમાં ભયનો માહોલ છે. ભય પણ એટલો કે હવે સ્થાનિકો મોટી સંખ્યામાં પલાયન કરવા મજબૂર બન્યા છે. ટાર્ગેટ કિલિંગ દરમિયાન 177 કાશ્મીરી પંડિત ટીચર્સની બદલી કરી દેવામાં આવી છે. 

કાશ્મીરી પંડિતોની સુરક્ષાને લઇને જે મહત્વનું સમાચાર મળ્યા તે મુજબ જમ્મુ-કાશ્મીરના લેફ્ટનન્ટ ગવર્નરે 177 શિક્ષકોને સુરક્ષિત સ્થળોમાં ટ્રાન્સફર કર્યા છે. આ કાશ્મીર પંડિત શિક્ષકોને જિલ્લા મુખ્યાલયમાં તૈનાત કરવામાં આવ્યા છે. ખીણમાં સામાન્ય લોકોને નિશાન બનાવી રહેલા આતંકવાદીઓ પર કાર્યવાહી કરવા માટે વહીવટીતંત્રએ આ મોટો નિર્ણય લીધો છે. ઘણી જગ્યાએ સ્થળાંતરના સમાચાર પણ મળી રહ્યા છે. કાશ્મીરી પંડિતોની સુરક્ષાને ધ્યાનમાં રાખતા આ બદલી કરવામાં આવી છે. મહત્વનું છે કે, ગૃહમંત્રી અમિત શાહે કાશ્મીરી પંડિત સમુદાય અને સ્થળાંતર કામદારોને નિશાન બનાવતા હુમલાના પગલે મુશ્કેલીગ્રસ્ત કેન્દ્રશાસિત પ્રદેશમાં સુરક્ષાની સ્થિતિની સમીક્ષા કરવા માટે ઉચ્ચ સ્તરીય બેઠકની અધ્યક્ષતા કર્યાના એક દિવસ બાદ આ ટ્રાન્સફર કરવામાં આવ્યું છે.

ઉલ્લેખનીય છે કે, જમ્મુ-કાશ્મીરના અનંતનાગમાં ચાલી રહેલા એન્કાઉન્ટરમાં જવાનોએ એક આતંકીને ઠાર કર્યો હતો. આ માર્યો ગયેલો આતંકવાદી હિઝબુલ મુઝાહિદ્દીનનો હોવાનું પણ સામે આવ્યું છે. આ સિવાય એક સ્થાનિક પણ આ અથડામણમાં ધાયલ થયો છે. જેને નજીકની હોસ્પિટલમાં દાખલ કરવામાં આવ્યો છે.

આ પણ વાંચો - જમ્મુ કાશ્મીરના અનંતનાગમાં આતંકીઓ અને સેના વચ્ચે ઘર્ષણ, એક આતંકીને સેનાએ ઠાર માર્યો