ભૂતપૂર્વ નાણામંત્રી પી. ચિદમ્બરમના પુત્ર કાર્તિ ચિદમ્બરમના ઘર અને ઓફિસોમાં CBIની રેડ

સેન્ટ્રલ બ્યુરો ઑફ ઇન્વેસ્ટિગેશન (CBI) એ આજે (મંગળવારે) સવારે દિલ્હી, મુંબઈ, ચેન્નાઈ અને તમિલનાડુમાં શિવગંઈમાં કોંગ્રેસ નેતા અને ભૂતપૂર્વ નાણા પ્રધાન પી. ચિદમ્બરમના પુત્ર કાર્તિ ચિદમ્બરમના ઘણા રહેણાંક અને સત્તાવાર જગ્યાઓની શોધખોળ કરી. 

CBI ના સૂત્રોના જણાવ્યા અનુસાર સાતથી આઠ સ્થળોએ દરોડા પાડવામાં આવી રહ્યા છે. તેમના કાર્યાલયે જણાવ્યું હતું કે, "સેન્ટ્રલ બ્યુરો ઑફ ઇન્વેસ્ટિગેશન ચાલુ કેસના સંબંધમાં કૉંગ્રેસના નેતા કાર્તિ ચિદમ્બરમના અનેક સ્થળો (નિવાસ અને ઑફિસ) પર સર્ચ કરી રહ્યું છે." 

રાજસ્થાનના ઉદયપુરમાં કોંગ્રેસનું ચિંતન શિબિર આયોજિત થવાની સાથે જ કેન્દ્રીય તપાસ બ્યુરો (CBI)એ પૂર્વ કેન્દ્રીય મંત્રી પી. ચિદમ્બરમના પુત્ર અને કોંગ્રેસના સાંસદ કાર્તિ ચિદમ્બરમ સામે મોટી કાર્યવાહી શરૂ કરી છે. ન્યૂઝ એજન્સી ANI અનુસાર, સેન્ટ્રલ ઇન્વેસ્ટિગેશન એજન્સી (CBI) એ મંગળવારે સવારે જ પી. ચિદમ્બરમના પુત્ર અને કોંગ્રેસ નેતા કાર્તિ ચિદમ્બરમના ઘર અને ઓફિસ સહિત અનેક જગ્યાઓ પર દરોડા પાડવાનું શરૂ કર્યું છે. આ માહિતી CBI ઓફિસ દ્વારા આપવામાં આવી છે.

આ અંગે કાર્તિ ચિદમ્બરમે ટ્વીટ કર્યું છે કે, 'હું ગણતરી કરવાનું પણ ભૂલી ગયો છું, આવું કેટલી વાર થયું છે? આ માટે એક રેકોર્ડ હોવો જોઈએ.' સૂત્રોના જણાવ્યા અનુસાર CBIએ કાર્તિ અને પી.ચિદમ્બરમના ઘર સહિત 7 સ્થળો પર દરોડા પાડ્યા છે. સૂત્રોનું કહેવું છે કે CBIએ વિદેશમાંથી પૈસા મેળવવાના એક કેસમાં નવો કેસ નોંધ્યો છે. તે મુજબ આ દરોડો પાડવામાં આવ્યો છે. CBIના સૂત્રોએ જણાવ્યું હતું કે, કાર્તિ ચિદમ્બરમને 2010 થી 2014 વચ્ચે પૈસા મળ્યા હતા. અગાઉ CBIએ પ્રાથમિક તપાસ માટે કેસ નોંધ્યો હતો. તપાસ બાદ તેને FIRમાં ફેરવી દેવામાં આવ્યો છે.

વળી, CBI અધિકારીઓને ટાંકીને સમાચાર એજન્સી પીટીઆઈ-ભાષામાં આપવામાં આવેલી માહિતી અનુસાર, CBIએ કથિત ગેરકાયદેસર લાભના નવા કેસમાં કોંગ્રેસના નેતા અને લોકસભા સાંસદ કાર્તિ ચિદમ્બરમ વિરુદ્ધ કેસ નોંધ્યો છે. અધિકારીએ કહ્યું કે, CBI લોકસભા સાંસદ કાર્તિ ચિદમ્બરમ વિરુદ્ધ નોંધાયેલા કેસના સંબંધમાં દેશભરમાં નવ જગ્યાએ સર્ચ ઓપરેશન ચલાવી રહી છે.