મોરબીની રૂંવાટા ઉભા કરતી દુર્ઘટના પર જાણો કોણે શું આપી પ્રતિક્રિયા

રાજ્યના મોરબીમાં બ્રિજ દુર્ઘટનામાં અત્યાર સુધીમાં 132 લોકોના મોત થયા છે. જ્યારે લગભગ 177 લોકોને બચાવી લેવાયા છે. છેલ્લા 15 કલાકથી રેસ્ક્યુ ઓપરેશન ચાલી રહ્યું છે, જેમાં આર્મી, નેવી, એરફોર્સ, એનડીઆરએફ, ફાયર બ્રિગેડ અને એસડીઆરએફની ટીમો કાર્યરત છે. વળી, બ્રિજનું સંચાલન કરતી કંપની સામે દોષિત હત્યાનો કેસ નોંધવામાં આવ્યો છે. કંપની સામે કલમ 304, 308 અને 114 હેઠળ કેસ નોંધવામાં આવ્યો છે. આ સાથે તપાસ માટે એક કમિટી પણ બનાવવામાં આવી છે. 

મોરબીમાં કેબલ બ્રિજ તૂટી પડવાની ઘટના અંગે માહિતી આપતા રાજ્યના ગૃહમંત્રી હર્ષ સંઘવીએ સોમવારે સવારે જણાવ્યું હતું કે આ અકસ્માતમાં અત્યાર સુધીમાં કુલ 132 લોકોના મોત થયા છે. નેવી, એનડીઆરએફ, એરફોર્સ અને આર્મી ઝડપથી પહોંચી ગયા છે. આખી રાત બચાવ કામગીરીમાં 200 થી વધુ લોકોએ કામ કર્યું છે. તેમણે કહ્યું કે, બ્રિજ મેનેજમેન્ટ ટીમ સામે ફોજદારી કેસ નોંધવામાં આવ્યો છે. રેન્જ આઈજીપીના નેતૃત્વમાં આજથી તપાસ શરૂ કરવામાં આવી છે. દેશના ગૃહમંત્રી અમિત શાહે આ ઘટના પર શોક વ્યક્ત કર્યો છે. જ્યારે કોંગ્રેસ નેતાઓએ કેન્દ્ર અને રાજ્યની ડબલ એન્જિન સરકાર પર નિશાન સાધ્યું છે. વળી, AAP વડા અને દિલ્હીના મુખ્યમંત્રી અરવિંદ કેજરીવાલે દુઃખ વ્યક્ત કર્યું છે. આવો જાણીએ આ સમગ્ર દુર્ઘટનામાં જાણો કોણે શું કહ્યું?

વડાપ્રધાન મોદીએ મોરબીમાં પુલ ધરાશાયી થવાથી સર્જાયેલા અકસ્માત અંગે દુઃખ વ્યક્ત કર્યું હતું. તેમણે પોતાના ટ્વીટમાં લખ્યું, મોરબી ખાતે થયેલી દુર્ઘટનાથી અત્યંત દુ:ખી છું. આ અંગે ગુજરાતના મુખ્યમંત્રી શ્રી @Bhupendrapbjp તથા અન્ય અધિકારીઓ સાથે વાત કરી. રાહત અને બચાવ કામગીરી પુરઝડપે ચાલી રહી છે તથા અસરગ્રસ્તોને તમામ આવશ્યક  સહાય પૂરી પાડવામાં આવી રહી છે.

કેવડિયાથી મોરબીમાં બનેલી ઘટના અંગે કહ્યું કે, હું હાલમાં કેવડિયામાં છું પણ મારું મન મોરબીમાં છે. તેમણે કહ્યું કે, મારું મન મોરબીના પિડીતો સાથે જોડાયેલું છે. મે મારા જીવનમાં આવી પીડા બહું ઓછી જોઇ હશે. એક તરફ દુઃખદ હ્રદય છે અને બીજી તરફ કર્મ અને કર્તવ્યનો પથ છે. આ કર્તવ્ય પથી જવાબદારી લઇને હુ તમારી સાથે છું, પરંતુ કરૂણાથી ભરેલું મારું મન તે પિડીત પરિવારોના વચ્ચે છે. ઘટનામાં જે લોકોને પોતાનું જીવન ગુમાવવું પડ્યું છે હું તેમના પરિવારો પ્રત્યે મારી સંવેદના વ્યક્ત કરું છે. વડાપ્રધાન કાર્યાલય (PMO) એ ટ્વીટ કર્યું છે કે, વડાપ્રધાન મોદીએ આ અંગે રાજ્યના મુખ્યમંત્રી ભૂપેન્દ્ર પટેલ અને અન્ય અધિકારીઓ સાથે વાત કરી છે. PM મોદીએ રાહત અને બચાવ કામગીરી માટે તાત્કાલિક બચાવ ટુકડીઓ તૈનાત કરવા જણાવ્યું હતું. તેમણે મોરબી અકસ્માતમાં મૃત્યુ પામેલા લોકોના પરિવાર માટે PMNRF (પ્રાઈમ મિનિસ્ટર નેશનલ રિલીફ ફંડ) માંથી 2 લાખ રૂપિયા અને ઘાયલોને 50,000 રૂપિયાની સહાયની જાહેરાત કરી છે.

ગૃહમંત્રી અમિત શાહે કહ્યું કે, ગુજરાતમાં ગઈકાલની ઘટનામાં ઘણા લોકોએ જીવ ગુમાવ્યા છે. સૌ પ્રથમ, હું દુર્ભાગ્યપૂર્ણ ઘટનામાં માર્યા ગયેલા તમામ લોકોના પરિવારો પ્રત્યે મારી સંવેદના વ્યક્ત કરું છું. જેઓ મૃત્યુ પામ્યા છે તેઓને શાંતિ મળે.

રાહુલ ગાંધીએ ટ્વીટ કરીને કહ્યું કે, “ગુજરાતના મોરબીમાં બ્રિજ દુર્ઘટનાના સમાચાર ખૂબ જ દુઃખદ છે. હું આવા મુશ્કેલ સમયમાં તમામ શોકગ્રસ્ત પરિવારો પ્રત્યે મારી ઊંડી સંવેદના વ્યક્ત કરું છું. હું કોંગ્રેસના તમામ કાર્યકર્તાઓને અપીલ કરું છું કે તેઓ અકસ્માતમાં ઘાયલ થયેલા લોકોને શક્ય તમામ મદદ કરે અને ગુમ થયેલા લોકોની શોધમાં મદદ કરે.

કોંગ્રેસ અધ્યક્ષ મલ્લિકાર્જુન ખડગેએ ટ્વીટ કરતા લખ્યું, "ગુજરાતના મોરબીમાં પુલ તૂટી પડવાથી સર્જાયેલી દુર્ઘટનાથી ખૂબ જ દુઃખી છું. હું @INCGujarat કાર્યકરોને બચાવ કાર્યમાં શક્ય તમામ મદદ કરવા અને ઘાયલોને મદદ કરવા અપીલ કરું છું. મારી સંવેદના અને પ્રાર્થનાઓ શોકગ્રસ્ત પરિવારોની સાથે છે."

આ પણ વાંચો - કેવી રીતે તૂટ્યો મોરબીનો બ્રિજ? જુઓ આ વિડીયોમાં