અમેરિકાના પૂર્વ રાષ્ટ્રપતિ Donald Trumpના રિસોર્ટ પર FBI ના દરોડા

અમેરિકાના પૂર્વ રાષ્ટ્રપતિ ડોનાલ્ડ ટ્રમ્પને લઈને મોટા સમાચાર સામે આવી રહ્યા છે. મળતી માહિતી મુજબ, FBIએ અમેરિકાના પૂર્વ રાષ્ટ્રપતિ ડોનાલ્ડ ટ્રમ્પના ફ્લોરિડામાં આવેલા Mar a Lago રિસોર્ટ પર દરોડા પાડ્યા છે. આ અંગે ડોનાલ્ડ ટ્રમ્પ દ્વારા એક નિવેદન જારી કરવામાં આવ્યું છે. તેમણે કહ્યું કે, FBI અધિકારીઓએ દરોડા પાડીને પામ બીચ પર સ્થિત Mar a Lagoને જપ્ત કર્યું છે.

ભૂતપૂર્વ રાષ્ટ્રપતિ ડોનાલ્ડ ટ્રમ્પે ટ્રુથ સોશિયલ નેટવર્ક પર એક નિવેદનમાં કહ્યું, "આ આપણા રાષ્ટ્ર માટે કાળો સમય છે, કારણ કે ફ્લોરિડાના પામ બીચમાં મારું સુંદર ઘર, Mar a Lago, પર વર્તમાનમાં FBI એજન્ટોના મોટા જૂથ દ્વારા ઘેરી, દરોડા અને કબજે કરી લેવામાં આવ્યું." ટ્રમ્પે કહ્યું, "આ કાર્યવાહીમાં ગેરવર્તણૂક, ન્યાય પ્રણાલીનું શસ્ત્રીકરણ અને કટ્ટરપંથી ડાબેરી ડેમોક્રેટ્સ દ્વારા હુમલો છે જેઓ ઈચ્છે છે કે હું 2024 માં રાષ્ટ્રપતિની ચૂંટણી ન લડું." રોઇટર્સે અહેવાલ આપ્યો કે, દરોડા સમયે ટ્રમ્પ તેમની આ મિલકત પર ન હતા અને FBIએ કમ્પાઉન્ડમાં પ્રવેશવા માટે સર્ચ વોરંટ ચલાવ્યું હતું. CNNએ અનામી સ્ત્રોતોને ટાંકીને જણાવ્યું હતું કે શોધ વર્ગીકૃત દસ્તાવેજો સાથે જોડાયેલી હતી.

2020 માં રાષ્ટ્રપતિની ચૂંટણીમાં હાર્યા પછી, ટ્રમ્પ તેમની સાથે સરકારી દસ્તાવેજોના 15 બોક્સ ફ્લોરિડા લઈ ગયા, જે તપાસનો વિષય છે. ટ્રમ્પની જ્યોર્જિયા રાજ્યમાં ચૂંટણી પરિણામોને ઉલટાવી દેવાના પ્રયાસો માટે તપાસ કરવામાં આવી રહી છે, જ્યારે ન્યૂયોર્કમાં તેમના વ્યવસાયની તપાસ કરવામાં આવી રહી છે. જણાવી દઈએ કે, ટ્રમ્પે 2024ની ચૂંટણી માટે સત્તાવાર રીતે તેમના નામની જાહેરાત કરી નથી, પરંતુ તેમના કેટલાક નિવેદનો એ સંકેત આપી રહ્યા છે કે તેઓ આગામી ચૂંટણીમાં પોતાની દાવેદારી દાખવી શકે છે.

આ પણ વાંચો - વિશ્વની સૌથી શક્તિશાળી સેના સાથે લડ્યું યુદ્ધ, તેમને મારવાનો 3વાર પ્રયાસ કરાયો, ઓળખો કોણ છે આ બાળક