રિટાયર્ડ થયા બાદ પણ ચિત્તા જેવી સ્ફૂર્તિ છે આ ખેલાડીમાં, જુઓ આ અદ્ભુત Catch

સુરેશ રૈના (Suresh Raina) ભલે ક્રિકેટના તમામ ફોર્મેટમાંથી નિવૃત્ત (Retired) થઈ ગયો હોય, પરંતુ તેની પાસે હજુ પણ ચિત્તા જેવી ફૂર્તિ છે. 35 વર્ષીય રૈનાએ 28 સપ્ટેમ્બરે એવો કેચ પકડ્યો, જેને જોઇ દર્શકો પણ ચોંકી ગયા હતા અને તેમના મોઢામાંથી એક જ શબ્દ નીકળ્યો... 'વાહ શું કેચ' છે. સુરેશ રૈના તેની વિસ્ફોટક બેટિંગ તેમજ સ્પિન બોલિંગ માટે પ્રખ્યાત રહ્યો છે આ સાથે તે વર્લ્ડ ક્લાસ ફિલ્ડર પણ રહ્યો છે. તેણે પોતાની ફિલ્ડિંગથી હંમેશા બધાનું દિલ જીત્યું છે અને આવું જ કંઈક ફરી એકવાર જોવા મળ્યું છે. બુધવારે રોડ સેફ્ટી વર્લ્ડ સિરીઝ (Road Safety World Series)ની પ્રથમ સેમિફાઇનલ દરમિયાન તેણે આશ્ચર્યજનક કેચ પકડ્યો હતો અને તેના કેચનો વિડીયો સોશિયલ મીડિયા પર વાયરલ થયો હતો. 

શહીદ વીર નારાયણ સિંહ ઈન્ટરનેશનલ સ્ટેડિયમ ખાતે ઈન્ડિયા લિજેન્ડ્સ અને ઓસ્ટ્રેલિયા લિજેન્ડ્સ વચ્ચે મેચ રમાઈ હતી. વરસાદને કારણે ભલે મેચ પૂર્ણ થઈ શકી ન હોતી, પરંતુ ઓસ્ટ્રેલિયાની બેટિંગ દરમિયાન દર્શકોને એક એવી ક્ષણ જોવા મળી જે સોશિયલ મીડિયા પર ખૂબ વાયરલ થઈ છે. આ ઈનિંગની લગભગ 16મી ઓવર હતી. અભિમન્યુ મિથુન બોલિંગ કરી રહ્યો હતો અને તેણે બેન ડંકને ફુલ ટોસ બોલ ફેંક્યો. બોલ બેટ્સમેનથી દૂર હતો અને તેણે પોઈન્ટ સાઈડ પર શોટ રમ્યો જ્યા સુરેશ રૈના હાજર હતો. બોલ તેનાથી થોડો દૂર હતો પરંતુ રૈનાએ તેની ડાબી બાજુએ હવામાં ઉડતા બોલ પકડ્યો હતો. આ કેચ બાદ તમામ ખેલાડીઓએ તેને ગળે લગાવ્યો હતો. કેચ લીધા બાદ એવું લાગી રહ્યું હતું કે તેની આંગળીમાં ઈજા થઈ છે પરંતુ હજુ સુધી આવી માહિતી સામે આવી નથી.

રૈનાની ફિલ્ડિંગ જોઈને IPL ફ્રેન્ચાઈઝી અને તેની જૂની ટીમ ચેન્નાઈ સુપર કિંગ્સ (CSK) પણ આશ્ચર્યચકિત થઈ ગઈ હતી અને વિડીયો શેર કરતી વખતે તેણે આ જૂના ખેલાડીની પ્રશંસા પણ કરી હતી. CSKએ રૈનાના આ કેચનો એક વિડીયો અને તેની તસવીર શેર કરી અને લખ્યું, "એ જ ડાઇવ, એ જ હવામાં કૂદકો અને એ જ ઉજવણી, તે જ જુનો ચિન્ના થાલા શૈલી. ફરી જુઓ અને ખોવાઈ જાઓ."