ધનરાજભાઈ નથવાણી સ્પોર્ટ્સમાં વિશેષ રૂચિ ધરાવે છે, આ ગેમ્સ છે તેમની ફેવરિટ

GCA President: ગુજરાત ક્રિકેટ એસોસિએશનનાં ( GCA) પ્રમુખ તરીકે ધનરાજભાઈ નથવાણીની (Dhanraj Nathwani) વરણી કરવામાં આવી છે. ગુજરાત ક્રિકેટ એસોસિયેશનની 86મી વાર્ષિક સભામાં પ્રમુખની વરણી પર મહોર લગાવવામાં આવી છે. 

ધનરાજભાઈ નથવાણીની (Dhanraj Nathwani) આગામી 3 વર્ષ એટલે કે 2025 સુધી પ્રમુખપદ માટે બિનહરીફ વરણી કરવામાં આવી છે. GCAના ઉપપ્રમુખ તરીકે હેમંત કોન્ટ્રાક્ટર, સેક્રેટરી તરીકે અનિલ પટેલ, જોઇન્ટ સેક્રેટરી તરીકે મયુર પટેલ તેમજ ભરત માંડલિયાની ખજાનચી તરીકે પસંદગી થઈ છે.

ધનરાજભાઈ નથવાણી રિલાયન્સ ગ્રુપના પ્રેસિડેન્ટ પરિમાણભાઈ નથવાણીના પુત્ર છે. છેલ્લા 4 વર્ષથી ખાલી પડેલી ગુજરાત ક્રિકેટ એસોસિએશન (GCA)ના તેઓ પ્રેસિડેન્ટની બન્યા છે. તમામ સભ્યોએ BCCI સેક્રેટરી , એશિયન ક્રિકેટ કાઉન્સીલના ચેરમેન તથા ICC આઇસીસીના ફાઇનાન્સ અને કમર્શિયલ અફેર્સ કમિટિના પ્રમુખ જયભાઈ શાહનું (Jay Shah) અભિવાદન કર્યુ હતું.

ધનરાજભાઈ નથવાણી રિલાયન્સ ગૃપમાં ડિરેક્ટર છે. બિઝનેસની સાથે સાથે તેઓ વ્યક્તિગત જીવનમાં સ્પોર્ટ્સ પ્રત્યે વિશેષ રૂચિ ધરાવે છે. તેઓ રમત-ગમત પ્રત્યે હંમેશાથી ઉત્સાહિત રહે છે. તેમની ફેવરિટ રમત ક્રિકેટ અને ફુટબોલ છે અને આ બંને રમતો તેમની જીવન સાથે વણાઈ ગઈ છે.

આ તકે તેમણે જણાવ્યું હતું કે, GCAના પ્રમુખ તરીકે નિમણૂંક મારા માટે મોટા સમ્માનની વાત છે. ગુજરાતમાં ક્રિકેટની સેવા કરવાની તક આપવા બદલ હું અમારા ભૂતપૂર્વ પ્રમુખશ્રીઓ, અમિતભાઈ શાહ અને જયભાઈ શાહ અને એસોસિએશનના સભ્યોનો આભાર માનું છું. ગુજરાતના છેવાડાના વિસ્તારોમાં રમત ગમતનો ફેલાવો અને ઈન્ફ્રાસ્ટ્રક્ટર વિકસાવવા તથા પ્રતિભાશાળી રમતવીરો માટે તક ઉભી કરવાના આપણા ભૂતપૂર્વ પ્રમુખ અને ભારતના માનનીય વડાપ્રધાનશ્રી નરેન્દ્રભાઈ મોદીના વિઝનને વેગ આપવા કટિબદ્ધ છું.

આ પણ વાંચો - આપના મોબાઇલ પર વડાપ્રધાનનો કૉલ આવે તો ચોંકી ના જતા !