TMCનું ફરમાન છતાં પક્ષના 2 સાંસદોએ મતદાન કર્યું, કુલ 92 ટકા મતદાન

દેશના નવા ઉપરાષ્ટ્રપતિની ચૂંટણી માટે મતદાન પૂર્ણ થયું છે. સાંજે 6 વાગ્યા પછી મતગણતરી શરુ થઇ છે. સંસદ ભવનમાં ચાલી રહેલા મતદાનમાં વડાપ્રધાન નરેન્દ્ર મોદી સહિત અનેક મંત્રીઓએ મતદાન કર્યું છે. પૂર્વ વડાપ્રધાન અને કોંગ્રેસના વરિષ્ઠ નેતા મનમોહન સિંહે પણ વ્હીલ ચેર પર બેસીને મતદાન કર્યું હતું. 

આ ચૂંટણીમાં મુકાબલો NDA ઉમેદવાર જગદીપ ધનખડ અને સંયુક્ત વિપક્ષના ઉમેદવાર માર્ગારેટ આલ્વા વચ્ચે છે. 80 વર્ષીય આલ્વા કોંગ્રેસના વરિષ્ઠ નેતા છે અને તેઓ રાજસ્થાનના રાજ્યપાલ પણ રહી ચૂક્યા છે. તે જ સમયે, ધનખડ 71 વર્ષના છે અને તે રાજસ્થાનના પ્રભાવશાળી જાટ સમુદાયના છે, તેમની પૃષ્ઠભૂમિ સમાજવાદી રહી છે.

જો આંકડાઓ પર નજર કરીએ તો પશ્ચિમ બંગાળના પૂર્વ રાજ્યપાલ ધનખડની સ્થિતિ મજબૂત દેખાઈ રહી છે. ઉપરાષ્ટ્રપતિની ચૂંટણીને લઈને વિરોધ પક્ષોમાં પણ મતભેદો સામે આવ્યા છે, કારણ કે ટીએમસીએ મતદાન પ્રક્રિયાથી દૂર રહેવાની જાહેરાત કરી છે. તે જ સમયે, TRS, AAP, AIMIM અને ઝારખંડ મુક્તિ મોરચાએ આલ્વાને સમર્થન જાહેર કર્યું છે. JDU, YSR કોંગ્રેસ, BSP, AIADMK અને શિવસેનાએ ધનખડને સમર્થન જાહેર કર્યું છે.

ભાજપના પોતાના 394 સાંસદો, 5 નામાંકિત સાંસદો અને JDU, AIADMK, LJP જેવા સાથી પક્ષોના 47 સાંસદો છે. આ રીતે NDAના સાંસદોની સંખ્યા 446 પર પહોંચી ગઈ છે.  અન્ય પક્ષો જે ધનખડને સમર્થન આપી રહ્યા છે તેમાં BJD 21, YSRC 31, BSP 11, અકાલી દળ 2, TDP 4 અને શિંદે જૂથ શિવસેના 12 છે. આ રીતે કુલ 527 સાંસદો ધનખડની તરફેણમાં જોવા મળી રહ્યા છે. ચૂંટણી માટે મતદાન પ્રક્રિયા પૂર્ણ થઈ ગઈ છે. હવે સાંજે 6 વાગ્યાથી મતગણતરી શરૂ થઇ છે.

ઉપરાષ્ટ્રપતિની ચૂંટણીમાં 725 સાંસદોએ મતદાન કર્યું. ટીએમસીએ મતદાનમાં ભાગ લીધો ન હતો પરંતુ ટીએમસીના શિશિર અધિકારી અને દિબયેન્દુ અધિકારીએ મતદાન કર્યું હતું. બીજી તરફ સની દેઓલ અને સંજય ધોત્રે પણ સ્વાસ્થ્યના કારણોસર મતદાન કરી શક્યા ન હતા.