ચીનમાં ફરી એક વાર કોરોનાનો કહેર, ઘણા સ્થળોએ લોકડાઉન

જે ચીને (China) દુનિયાને કોરોના (Corona) આપ્યો, તે જ ચીન હવે ફરી વાર કોરોનાનો માર સહન કરી રહ્યું છે. શૂન્ય કોવિડ નીતિ અપનાવનાર ચીન લાંબા સમયથી કોવિડની પકડમાં છે. કોરોના ચીનને કેવી રીતે ડરાવે છે તેનો અંદાજ એ વાત પરથી લગાવી શકાય છે કે ચીનના રાષ્ટ્રપતિ શી જિનપિંગે તાજેતરમાં યોજાયેલી શાંઘાઈ સમિટ પહેલા બે વર્ષ સુધી પોતાનો દેશ છોડ્યો ન હતો.  ચીનનું ઔદ્યોગિક શહેર શાંઘાઈ છેલ્લા કેટલાક મહિનાઓથી સતત કોરોનાના પ્રકોપનો સામનો કરી રહ્યું છે. હવે ફરી એકવાર કોરોનાના કેસ ઝડપથી વધવા લાગ્યા છે. સ્થિતિ એવી બની છે કે કેટલીક જગ્યાએ ફરીથી લોકડાઉન લાગુ કરવામાં આવી રહ્યું છે. લોકો પર પ્રતિબંધ લગાવવામાં આવી રહ્યા છે અને નવી મુસાફરી માર્ગદર્શિકા પણ જારી કરવામાં આવી છે.

ચીન ફરી કોરોનાની ઝપેટમાં છે. હાલમાં, Omicron ના બે નવા પેટા વેરિઅન્ટ્સ ચીનમાં સામે આવ્યા છે. બે પેટા વેરિઅન્ટના કારણે ચીનમાં કોરોનાના કેસોમાં અચાનક મોટો ઉછાળો આવ્યો છે. ડેટા અનુસાર, ચીનમાં 10 ઓક્ટોબરે કોરોનાના 2,089 કેસ નોંધાયા હતા, જે 20 ઓગસ્ટ પછી નોંધાયેલો સૌથી વધુ આંકડો હતો.

 BF.7 ના કારણે ચીનના શેનઝેનમાં વધુ કેસ નોંધાયા છે. ત્યાં પણ કેસ વધીને ત્રણ ગણા થઈ ગયા છે. પરિસ્થિતિને જોતા હવે જે પણ શેનઝેન આવશે તેના ત્રણ દિવસમાં ત્રણ અલગ-અલગ ટેસ્ટ કરવામાં આવશે. શેનઝેનમાં પરિસ્થિતિ એટલી ચિંતાજનક બની ગઈ છે કે સત્તાવાળાઓ ઉતાવળમાં શાળાઓ બંધ કરી રહ્યા છે અને મનોરંજનના સ્થળોને તાળા લગાવાઇ રહ્યા છે. 

ઓમિક્રોનના તમામ પ્રકારોને કારણે ઘણી જગ્યાએ કોરોનાના નવા વેરિયન્ટ જોવા મળી રહ્યા છે. આ કારણે યુકે અને જર્મનીમાં પણ કેસ વધવા લાગ્યા છે. આ વેરિયન્ટ્સ વિશે જે માહિતી મળી રહી છે તે મુજબ, તેઓ રોગપ્રતિકારક શક્તિને છીનવી શકે છે. અત્યાર સુધી એવા કોઈ સંકેતો નથી કે આ તમામ પ્રકારો વધુ ગંભીર લક્ષણોનું કારણ બનશે.

આ પણ વાંચો--UNGA મંચ પર કાશ્મીર રાગ આલાપનારા પાકિસ્તાનને ભારતે આપ્યો જડબાતોડ જવાબ,જુઓ વિડીયો