અગ્નિપથ યોજના મુદ્દે કોંગ્રેસનું જંતર મંતર ખાતે વિરોધ પ્રદર્શન

અગ્નિપથ યોજનાના વિરોધમાં વિવિધ રાજ્યોમાં ઉગ્ર પ્રદર્શન થઇ રહ્યા છે. અગ્નિપથ યોજનાના મુદ્દે રાજકારણમાં પણ ગરમાવો આવી ગયો છે. રવિવારે કોંગ્રેસે જંતર-મંતર ખાતે સત્યાગ્રહ કરીને આ યોજનાનો વિરોધ કર્યો છે. કોંગ્રેસના ઘણા દિગ્ગજ નેતાઓ  આ સત્યાગ્રહમાં જોડાયા છે. કોંગ્રેસનું કહેવું છે કે પાર્ટીએ સત્યાગ્રહ કરવાનો નિર્ણય એટલા માટે લીધો છે કારણ કે અગ્નિપથ યોજનાએ દેશના યુવાનોને રસ્તા પર ઉતાર્યા છે. પાર્ટીએ કહ્યું કે તેની જવાબદારી છે કે પાર્ટી આ યુવાનોની સાથે ઉભી રહે.

કોંગ્રેસના મહાસચિવ પ્રિયંકા ગાંધી વાડ્રા પણ અન્ય નેતાઓ સાથે વિરોધ કરવા પહોંચ્યા છે. પ્રિયંકાએ કહ્યું કે જે કંઈ થઈ રહ્યું છે તે ખોટું થઈ રહ્યું છે. આ યોજના પાછી ખેંચી લેવી જોઈએ. તેમણે યુવાનોને ભરોસો આપ્યો કે તેમની દરેક લડાઇમાં કોંગ્રેસ તેમની સાથે છે. 

અગ્નિપથ યોજનાના વિરોધમાં જંતર-મંતર પર એકઠા થયેલા કોંગ્રેસના રાજ્યસભા સાંસદ ઈમરાન પ્રતાપગઢીએ કહ્યું કે દેશ સળગી રહ્યો છે અને વડાપ્રધાને તેમની પીઆર ટીમને આ યોજનાના વખાણ કરવા માટે રોકી છે. સરકારે આ યોજના પાછી ખેંચી લેવી જોઈએ. રાહુલ ગાંધી પર અમિત માલવિયાના પ્રહાર પર ઈમરાને કહ્યું કે તે પોતે પોતાની ભૂલ છુપાવવાનો પ્રયાસ કરી રહ્યા છે. યોજનાનું નામ અગ્નિ શા માટે રાખવામાં આવ્યું? વડાપ્રધાને આગળ આવીને જવાબ આપવો જોઈએ.

કોંગ્રેસના નેતા સલમાન ખુર્શીદે કહ્યું છે કે સત્યાગ્રહનો અર્થ બદલાતો નથી. જ્યારે પણ તમે સત્ય માટે ઊભા રહેશો, ત્યારે સાચા હૃદયથી કરો, તેને સત્યાગ્રહ કહેવામાં આવશે. સત્યાગ્રહ લોકશાહી સાથે જોડાયેલો છે. સત્યમેવ જયતે! તો મનીષ તિવારીના અગ્નિપથ યોજનાને સમર્થન અંગેના પ્રશ્નનો જવાબ આપતાં તેમણે કહ્યું કે તે સારી વાત છે, જો એવું ન થાય તો તમે કહેશો કે પાર્ટીમાં તાનાશાહી છે. અમિત માલવિયાના આરોપ પર સલમાન ખુર્શીદે કહ્યું છે કે અમિત માલવિયાને બોલાવો, જુઓ અહીં હિંસા થઈ રહી છે? સત્યાગ્રહથી ડરવું ન જોઈએ. 

કોંગ્રેસ નેતા સચિન પાયલોટે કહ્યું કે આ ઘણો મુશ્કેલ સમય છે, સરકારે વિચાર્યું છે કે ન તો કોઈની વાત સાંભળશે અને ન જોશે, ફક્ત તેને લોકો પર લાદશે. હિંસા એ કોઈ પણ વસ્તુનો જવાબ નથી, શાંતિની અપીલ છે, પરંતુ લોકોના મનમાં રહેલા ગુસ્સા વિશે સરકારે વિચારવું પડશે. લોકો માત્ર નોકરી, વ્યવસાય અને ટેગ માટે લશ્કરમાં જતા નથી. 

કોંગ્રેસના રાજ્યસભા સાંસદ શક્તિસિંહ ગોહિલે કહ્યું કે, તેમણે કહ્યું હતું કે તેઓ કાળું નાણું પાછું લાવશે, આ લોકોનું કાળું નાણું વધુ વધ્યું. આ દેશનો યુવાન કાયમી નોકરી મેળવશે, સેનામાં દેશની સેવા કરશે એવું વિચારીને સખત મહેનત કરી રહ્યો હતો, પરંતુ સરકારે તેમના સપનાને બાળી નાખ્યું. અમિત શાહ અગ્નિપથની ભલાઈ ગણી રહ્યા છે, ભાઈ શાહ જી, હું પણ ગુજરાતમાંથી આવું છું. જય શાહને કહો કે અગ્નિપથનું કામ લઈ લે, BCCIનું પદ છોડે, યુવાનો સમજશે કે આ બહુ સારી યોજના છે. આ ઘોર અન્યાય છે, દેશના યુવાનો સાથે રમત છે.