મુખ્યમંત્રી કોરોના સંક્રમિત થયા, ભગવાન જગન્નાથની પહિંદવિધિ સામે પ્રશ્નાર્થ

રથયાત્રાનો પ્રારંભ થાય તે પહેલા પહિંદ વિધિ કરવામાં આવે છે. ભાઈ બલભદ્રજી, બહેન સુભદ્રાજી અને ભગવાન જગન્નાથજીને ત્રણેય રથમાં બિરાજમાન કરાય, ત્યાર પછી રથયાત્રાના રસ્તાને સોનાની સાવરણીથી સાફ કરાય છે. દેશનો રાજા હોય તે સોનાની સાવરણી લઈને રથયાત્રાના રસ્તાની સફાઈ કરે છે. પણ હાલની પરંપરા અનુસાર રાજ્યના મુખ્યપ્રધાન રથયાત્રાના રસ્તાને સોનાની સાવરણીથી સફાઈ કરે છે, અને ત્યાર પછી રથનું દોરડું ખેંચીને રથયાત્રાનો પ્રારંભ કરાવે છે, આને રથયાત્રામાં પહિંદ વિધિ કહેવાય છે. ઓરિસ્સાના પુરીની રથયાત્રામાં પહિંદ વિધિ કરાય છે, જેને પગલે અમદાવાદની રથયાત્રામાં પણ પહિંદ વિધિ કરવાની પરંપરા ચાલી આવે છે. અમદાવાદની રથયાત્રામાં સૌથી વધુ વખત પહિન્દ વિધિ કરવાનો રેકોર્ડ હાલના વડાપ્રધાન નરેન્દ્ર મોદીનો છે, સતત બાર વર્ષ તેઓ ગુજરાતના મુખ્યપ્રધાન રહ્યા, અને બારેય વર્ષ નરેન્દ્ર મોદીએ રથયાત્રામાં આવીને પહિન્દ વિધિ કરીને રેકોર્ડ પ્રસ્થાપિત કર્યો છે. વર્ષોના ઇતિહાસમાં આવું પહેલી વાર બનશે કે મુખ્યમંત્રી રથયાત્રામાં નહીં જોડાઇ શકે.