ગુવાહાટીમાં શિંદે જૂથની હોટલનું 30 જૂન સુધી બુકિંગ લંબાવાયું

મહારાષ્ટ્રમાં ચાલી રહેલી રાજકીય ઉથલપાથલ વચ્ચે ગુવાહાટી હોટલમાં રોકાયેલા શિંદે જૂથના ધારાસભ્યોનું બુકિંગ 30 જૂન સુધી લંબાવવામાં આવ્યું છે. બુકિંગ વધાર્યા બાદ રેડિસન બ્લુ હોટેલમાં બહારના લોકોનું બુકિંગ બંધ કરી દેવામાં આવ્યું છે. આ સિવાય હવે હોટલમાં બહારથી આવતા લોકોને આપવામાં આવતી રેસ્ટોરાં અને અન્ય સુવિધાઓ પણ બંધ કરી દેવામાં આવી છે.

પ્રાપ્ત માહિતી અનુસાર, બળવાખોર ધારાસભ્યોના રોકાવાને કારણે હોટલની સુરક્ષા પણ વધારી દેવામાં આવી છે. હાલમાં, 30 જૂન સુધી, ફક્ત  એરલાઇન કંપનીઓના કર્મચારીઓ હોટેલમાં જઈ શકશે, જેમની પાસે પહેલેથી જ ટાઇ-અપ છે અને રૂમ પહેલેથી જ બુક છે. તે Radisson Blu હોટેલની વેબસાઈટ પર જઈને પણ જોઈ શકાય છે. 1 જુલાઈથી ફરી એકવાર વેબસાઈટ પર બુકિંગ માટે રૂમ ઉપલબ્ધ છે. ગુવાહાટીની હોટેલ રેડિસન બ્લૂમાં લગભગ 70 રૂમ બુક કરવામાં આવ્યા છે. આ રૂમ ધારાસભ્યો માટે બુક કરવામાં આવ્યા છે જેઓ એકનાથ શિંદે સાથે છે.

મહારાષ્ટ્રની રાજકીય લડાઈ હવે દેશની સર્વોચ્ચ અદાલતના દરવાજે પહોંચી ગઈ છે. શિવસેનાના બળવાખોર મંત્રી એકનાથ શિંદેએ રવિવારે સુપ્રીમ કોર્ટમાં બે અરજી દાખલ કરી છે. તેમને અને અન્ય 15 બળવાખોર ધારાસભ્યોને મળેલી ડેપ્યુટી સ્પીકરની નોટિસ વિરુદ્ધ તેઓ સુપ્રીમ કોર્ટમાં પહોંચ્યા છે. આ સાથે અજય ચૌધરીને નેતા બનાવવાને પણ કોર્ટમાં પડકારવામાં આવ્યો છે. શિંદે જૂથે આ કાર્યવાહીને 'ગેરકાયદેસર અને ગેરબંધારણીય' ગણાવવા અને તેને રોકવાનો નિર્દેશ આપવાની અપીલ કરી છે.