ઉતરાયણ બાદ અમદાવાદમાં ઠેર ઠેર લટકતી દોરી પતંગ નિકાલના કામનું બીડું યુવાનો અને જીવદયા પ્રેમીઓએ ઉઠાવ્યું

અમદાવાદના જુદા જુદા 12 જેટલા વિસ્તારોમાં જીવદયા પ્રેમીઓ દ્વારા દોરી ભેગી કરી અને તેનો નિકાલ કરવાનું અભિયાન શરૂ કરવામાં આવ્યું છે. જીવદયા ની સંસ્થા ચલાવતા સામાજિક કાર્યકર સંજય શાહ નું કહેવું છે કે અમદાવાદના વિવિધ વિસ્તારોમાં અમારા કાર્યકર્તાઓ ઉતરાયણ બાદ વિવિધ જગ્યાએ લટકતી દોરીઓ અને પતંગો ઉતારી લઈ તેમાં નિકાલ કરવાનું મોટેપાયે અભિયાન શરૂ કર્યું છે. સાથે સાથે જે તે સોસાયટી ફ્લેટના ચેરમેન ને સાથે રાખી અને સેવાભાવી મિત્રો સાથે મળીને વિવિધ ધાબા ઉપરથી આજુબાજુના ઝાડ પરથી તમામ દોરી ઉતારી અને અમે તે દોરી નો નિકાલ કરી રહ્યા છે. સાથે જ તેમણે જાહેરાત કરી છે કે જે તે વ્યક્તિ આવી દોરી ભેગી કરીને અમને સોંપશે તો તેમને એક કિલોના સો રૂપિયા લેખે તેઓ વળતર પણ ચૂકવશે. મહત્વનું છે કે નિર્દોષ મૂંગા પક્ષીઓ આ લટકતી દોરીઓ ના ભોગ બની રહ્યા છે અને પરિણામે જ અમે મિત્રોએ આ અભિયાન શરૂ કર્યું છે. અને જે પણ દોરી હાથમાં આવે તેને સળગાવી અને દોરીનો નિકાલ પણ અમે કરી રહ્યા છીએ. અમદાવાદના બોડકદેવ વિસ્તારમાં સંજયભાઈ અને તેમની ટીમ હતી ત્યારે એક ઝાડ પર લટકતી  દોરી માંથી કબૂતરનો કપાયેલો પગ પણ મળી આવ્યો હતો. તેને લઈને આ જીવ દયા પ્રેમીઓએ પસ્તાવો વ્યક્ત કર્યો હતો. જીવદયા પ્રેમીઓનું કહેવું છે કે જીવો અને જીવવા દો જીવવાનો અમને પણ હક છે તેથી પક્ષીઓને ઘાતકી દોરીથી બચાવવા અભિયાન શરૂ કરવામાં આવ્યું છે.

અમદાવાદના ખોખરા મદ્રાસી મંદિર પાસે ખોખરા યુથ ફેડરેશન એ પતંગની દોરી ઉતરાયણ બાદ પક્ષીઓ માટે ઘાતક બંને તે પહેલા મણિનગર-અમરાઈવાડી વિસ્તારમા નાગરિકો પાસે વિપુલ માત્રામા એકત્રિત કરેલ પતંગ ના દોરાઓનું દહન કરીને તેનો યોગ્ય નિકાલ કરવામાં આવ્યો હતો.ખોખરા યુથ ફેડરેશન દ્વારા મણીનગર અને અમરાઈવાડી વિસ્તારમાં પતંગના ઘાતક દોરાને દહન કરતા પહેલા આવી જ રીતે એકત્રિત કરેલ દોરાઓને પક્ષીઓ તેમજ વાહનચાલકો ના હિતમા આગામી વરસથી દર વષેઁ દહન કરવાનો સંકલ્પ કરવામાં આવ્યો હતો. ખોખરાના યુથ ફેડરેશનના આ કાર્ય ને બિરદાવવા મણિનગરના ધારાસભ્ય અમુલ ભટ્ટ અને  અમરાઈવાડીના ધારાસભ્ય ડોક્ટર હસમુખ પટેલ પણ  હાજર રહ્યા હતા અને આ કાર્યને શહેરના નાગરિકો માટે પ્રેરણારૂપ ગણાવ્યું હતું.

અબોલ પશુ પક્ષીઓનું જીવન બચાવવા સાણંદ શ્રી સદભાવના કેન્દ્ર ટપાલ ચોક ખાતે દોરી સ્વીકાર કેન્દ્ર શરૂ કરવામાં આવ્યું છે. મહત્વનું છે કે જીવ દયા પ્રેમીઓ આ પ્રકારની કાર્યવાહી માં લોકો વિશેષ રસ લે તેના માટે વિવિધ યોજનાઓ પણ અમલમાં મૂકતા હોય છે. સદભાવના કેન્દ્ર તરફથી 15 થી 20 જાન્યુઆરી સુધી લટકતી દોરી લઈને આવનારને એક કિલો દોરીના 50 રૂપિયા સુધી વળતર આપવાની પણ જાહેરાત કરવામાં આવી છે. ઉત્તરાયણ બાદ વિવિધ ઝાડવાઓ અને ધાબા ઉપર લટકતી દોરી પક્ષીઓ માટે જીવલેણ બનતી હોય છે ત્યારે સદભાવના કેન્દ્ર ખાતેથી પતંગની દોરીના ગુચ્છા લેવામાં આવશે અને તેનું વળતર પણ આપવામાં આવશે તેવી જાહેરાત કરવામાં આવી છે. અને આગામી 20 તારીખના રોજ તે એકઠી થયેલ દોરી નો નિકાલ પણ કરવામાં આવશે તેવું સદભાવના કેન્દ્રના અગ્રણી કમલેશભાઈ દ્વારા જણાવવામાં આવ્યું છે.