24 વર્ષ બાદ કોંગ્રેસમાં થશે નવા જૂની, જાણો કોંગ્રેસમાં શું થઇ રહ્યું છે

24 વર્ષ બાદ કોંગ્રેસ (Congress)માં નવા જૂની થઇ રહી છે અને કોંગ્રેસને ગાંધી પરિવાર વગરના પ્રમુખ મળશે. રાજસ્થાનના મુખ્યમંત્રી અશોક ગેહલોતે (Ashok Gehlot)સ્પષ્ટ કર્યું છે કે તેઓ ચૂંટણી લડશે. આ સાથે તેમણે રાહુલ ગાંધી (Rahul Gandhi)ના વલણ અંગે પણ સ્પષ્ટતા કરી હતી. કોંગ્રેસમાં આજે શનિવારથી નોમિનેશન પ્રક્રિયા શરૂ થઈ રહી છે, જે 30 સપ્ટેમ્બર સુધી ચાલશે.

ગેહલોતના જણાવ્યા અનુસાર રાહુલે કહ્યું છે કે આ વખતે ગાંધી પરિવારમાંથી કોઈ વ્યક્તિ અધ્યક્ષ પદ માટે ચૂંટણી લડશે નહીં. આ સ્થિતિમાં સ્પષ્ટ છે કે નવા પ્રમુખ બિન-ગાંધી હશે. રાષ્ટ્રપતિની ચૂંટણી માટે શનિવારથી ઉમેદવારીપત્રો ભરવાની  શરૂઆત થશે. અશોક ગેહલોત 'ભારત જોડો યાત્રા' દરમિયાન કેરળમાં રાહુલને મળ્યા હતા.

બેઠક દરમિયાન રાહુલને અધ્યક્ષ પદ માટે ચૂંટણી લડવા માટે મનાવવાનો પ્રયાસ કર્યો હતો પણ રાહુલ પોતાના સ્ટેન્ડ પર અડગ રહ્યા હતા. ગેહલોતે ટ્વિટ કર્યું કે અનેક વિનંતીઓ છતાં રાહુલ ગાંધીએ સ્પષ્ટ કહ્યું કે અમે નક્કી કર્યું છે કે આ વખતે ગાંધી પરિવારનો કોઈ વ્યક્તિ ઉમેદવાર નહીં બને. 

બીજી તરફ તિરુવનંતપુરમના સાંસદ શશિ થરૂર (Shashi Tharoor)ને કોંગ્રેસ અધ્યક્ષ માટે ચૂંટણી લડવા વિશે પૂછવામાં આવ્યું ત્યારે તેમણે કહ્યું કે પાર્ટીના અન્ય મિત્રો પણ ચૂંટણી લડી શકે છે. તેમને ચૂંટણી લડવામાં કોઈ વાંધો નથી. પરંતુ પરિણામો પછી, આપણે બધાએ મળીને તેને બ્લોક, ગામ અને જિલ્લા સ્તરે મજબૂત બનાવવા માટે કામ કરવું જોઈએ અને પક્ષની વિચારધારાના આધારે આગળ વધવું જોઈએ. જેથી કરીને પાર્ટી રાષ્ટ્રીય સ્તરે મજબૂત બનીને ઉભરી આવે.

કોંગ્રેસ પ્રમુખ પદ માટે ઉમેદવારોની સંખ્યા વધી રહી છે. ગાંધી પરિવારના કોઈપણ સભ્યએ ચૂંટણી ન લડવાની ઈચ્છા વ્યક્ત કર્યા બાદ ઘણા નેતાઓ દાવા કરી રહ્યા છે. આ નેતાઓમાં ગેહલોત, થરૂર, કમલનાથની સાથે મનીષ તિવારીનું નામ પણ સામેલ છે. આ પહેલા પાર્ટીના વરિષ્ઠ નેતા દિગ્વિજય સિંહનું નામ પણ આ રેસમાં દેખાઈ રહ્યું હતું.

1998થી કોંગ્રેસ અધ્યક્ષ પદની જવાબદારી ગાંધી પરિવાર પાસે છે. સોનિયા ગાંધી વર્ષ 1998 થી 2017 સુધી સતત 19 વર્ષ સુધી પાર્ટી અધ્યક્ષની જવાબદારી નિભાવતા રહ્યા. રાહુલ ગાંધી વર્ષ 2017 થી 2019 સુધી કોંગ્રેસ અધ્યક્ષ હતા. 2019ની લોકસભા ચૂંટણીમાં પાર્ટીની હાર બાદ રાહુલ ગાંધીએ પદ પરથી રાજીનામું આપી દીધું હતું. આ પછી ફરી એકવાર સોનિયા ગાંધી પાર્ટી અધ્યક્ષ તરીકે કોંગ્રેસની જવાબદારી સંભાળી રહ્યા છે.

કોંગ્રેસમાં પ્રમુખપદની ચૂંટણીને લઈને પક્ષના નેતાઓમાં ચાલી રહેલી ખેંચતાણ વચ્ચે પ્રવક્તા અને સંચાર વિભાગના પદાધિકારીઓને ઉમેદવારો અંગે કોઈ ટિપ્પણી ન કરવાની સલાહ આપવામાં આવી છે. પાર્ટીની આ સલાહ કોંગ્રેસ પ્રવક્તા ગૌરવ વલ્લભે રાજસ્થાનના મુખ્યમંત્રી અશોક ગેહલોતની પ્રમુખ પદની ચૂંટણીમાં હિમાયત કર્યા બાદ આપી છે. પાર્ટીના મહાસચિવ અને સંચાર વિભાગના પ્રભારી જયરામ રમેશે સંદેશાવ્યવહાર વિભાગના પ્રવક્તા અને પદાધિકારીઓને પ્રમુખ પદ માટે ચૂંટણી લડી રહેલા કોઈપણ નેતા વિશે કોઈપણ પ્રકારની ટિપ્પણી કરવાથી દૂર રહેવા જણાવ્યું હતું.

ગેહલોત ટૂંક સમયમાં કોંગ્રેસ અધ્યક્ષ પદ માટે ઉમેદવારી નોંધાવશે. તેઓ પાર્ટીના નવા અધ્યક્ષ બનશે તે લગભગ નિશ્ચિત છે. આવી સ્થિતિમાં રાજસ્થાનના નવા મુખ્યમંત્રી માટેના પ્રયાસો તેજ થઈ ગયા છે.

જો કે, શિરડીમાં તેમણે ફરી એકવાર પુનરોચ્ચાર કર્યો હતો  કે તેઓ જીવનભર રાજ્યના લોકોની સેવા કરવા માંગે છે. ગુરુવારે કોચીમાં મીડિયા સાથે વાત કરતી વખતે, ગેહલોતે કહ્યું હતું કે પાર્ટી અધ્યક્ષ સોનિયા ગાંધી અને રાજ્યના પ્રભારી અજય માકન નવા મુખ્યમંત્રી નક્કી કરશે.

આ પણ વાંચો--ઉદ્ધવ ઠાકરે પાસે દશેરાએ છે રાજનીતિ અને વિરાસત બંને જીતવાની તક