કોરોનાકાળના 2 વર્ષ બાદ અંબાજીમાં પોષી પુનમના દિવસે ભવ્ય શોભાયાત્રા અને સાંસ્કૃતિક કાર્યક્રમ યોજાશે

શક્તિ,ભક્તિ અને આસ્થાનો ત્રિવેણી સંગમ એટલે જગવિખ્યાત યાત્રાધામ અંબાજી ગુજરાત અને રાજસ્થાનની સરહદ ઉપર આવેલું છે. શક્તિપીઠ અંબાજીની વાત કરવામાં આવે તો આ મંદિર 51 શક્તિપીઠમાં આદ્યશક્તિપીઠ તરીકે ઓળખાય છે.

શક્તિપીઠ અંબાજી મંદિરમાં 6 જાન્યુઆરીના રોજ પોષી પૂનમ હોઈ અંબાજી મંદિરના ચાચર ચોકમાં વહેલી સવારે મહા શક્તિ યજ્ઞ યોજાશે. અંબાજી મંદિરમાં પૂનમના દિવસે સવારે 6 વાગ્યે મંગળા આરતી કરવામાં આવશે અને ત્યારબાદ મંદિરમાં માતાજીને શાકભાજી નો અન્નકૂટ પણ ધરાવવામાં આવશે.

પોષ મહિનામાં આવતી નવરાત્રી શાકંભરી નવરાત્રી તરીકે પણ ઓળખાય છે. શ્રી અંબાજી ધાર્મિક ઉત્સવ સેવા સમિતિ અને અંબાજી મંદિરના સહયોગથી 6 જાન્યુઆરીના રોજ સવારે શક્તિદ્વારથી ભવ્ય શોભાયાત્રા પણ નીકાળવામાં આવશે. કોરોના કાળના 2 વર્ષ બાદ અંબાજી ખાતે ભવ્ય શોભાયાત્રા અને સાંસ્કૃતિક કાર્યક્રમ યોજાવાના છે. અંબાજી મંદિરને રંગબેરંગી લાઈટોથી પણ શણગારવામાં આવ્યું છે.

અંબાજી ખાતે 6 જાન્યુઆરીના રોજ પોષી પૂનમ હોઈ દેવસ્થાન ટ્રસ્ટ દ્વારા તડામાર તૈયારીઓ પૂર્ણ કરી દેવાઈ છે. પોષી પૂનમ પર્વને લઈને અંબાજી મંદિરની હવન શાળામાં બે દિવસીય શતચંડી મહાયજ્ઞ શરૂ કરાયો હતો.જેમાં હવન શાળાના બ્રાહ્મણો અને સંસ્કૃત પાઠશાળાના ઋષિ કુમારો જોડાયા હતા. 4 જાન્યુઆરીના સવારે અંબાજી મંદિરની હવનશાળામાં શતચંડી મહાયજ્ઞ શરૂ કરવામાં આવ્યો હતો અને આ હવન 5 જાન્યુઆરીના સાંજે પુર્ણ થશે. આ હવનમાં અંદાજે 11 હજાર આહુતિઓ આપવામાં આવશે. અંબાજી મંદિરના હવનશાળાના બ્રાહ્મણો અને સંસ્કૃત પાઠશાળાના ઋષિ કુમારો મહાયજ્ઞમા જોડાયા હતા.

આ પણ વાંચો - આગામી દિવસોમાં અંબાજી ખાતે 51 શક્તિપીઠનો ત્રિદિવસીય પરિક્રમા મહોત્સવ યોજાશે