દિવાળીની સફાઇમાં મળેલા ભંગારથી કેન્દ્રએ કમાયા 254 કરોડ, ત્રણ સપ્તાહ ચાલ્યું અભિયાન

દિવાળીના અવસર પર દરેક ઘરની સફાઈ કરવામાં આવે છે, પરંતુ આનાથી મોટી રકમ ભાગ્યે જ કોઈને મળી હશે. કેન્દ્ર સરકારે દિવાળીની સફાઈ દરમ્યાન એકઠા થયેલા ભંગારમાંથી 254 કરોડ રૂપિયાની રકમ મેળવી છે. આ રકમ કેન્દ્ર સરકારના વિભાગો સાથે જોડાયેલી ઓફિસોમાંથી નીકળતા ભંગારના વેચાણમાંથી મળી છે. કેન્દ્રીય મંત્રી જિતેન્દ્ર સિંહે મંગળવારે જણાવ્યું હતું કે આ સ્વચ્છતા અભિયાન દિવાળી પહેલા ત્રણ અઠવાડિયા સુધી ચાલ્યું હતું. તેમાંથી જે કચરો નીકળ્યો હતો તે વેચાયો હતો,જેમાં અઢીસો કરોડથી વધુની રકમ મળી આવી. 

આ ઉપરાંત આ ભંગાર દુર થવાથી 37 લાખ ચોરસ ફૂટ જગ્યા ખાલી થઇ છે. હવે આ જગ્યાનો ઉપયોગ અન્ય હેતુઓ માટે થઈ શકશે.

સ્વચ્છતા અભિયાનના બીજા રાઉન્ડની શરૂઆતથી જ કેન્દ્ર સરકારના વિભાગો સ્વચ્છતા અભિયાનમાં લાગેલા હતા. મંત્રીએ જણાવ્યું કે તમામ વિભાગો 31 ઓક્ટોબર સુધી સ્વચ્છતા અભિયાન ચલાવી રહ્યા છે. આ અભિયાન હેઠળ બિનઉપયોગી ફાઇલો અને અન્ય સામગ્રી વેચવામાં આવી રહી છે. આ સિવાય પર્યાવરણને યોગ્ય રાખવા જેવી બાબતોને પ્રાથમિકતા આપવામાં આવશે. તેમણે કહ્યું કે પીએમ નરેન્દ્ર મોદીના નેતૃત્વમાં દેશમાં સ્વચ્છતા અભિયાને જન આંદોલનનું સ્વરૂપ લીધું છે.

જિતેન્દ્ર સિંહે જણાવ્યું હતું કે આ સમયગાળા દરમિયાન કામો પણ ઝડપથી પૂર્ણ કરવામાં આવ્યા છે. કુલ 40 લાખ ફાઈલોની સમીક્ષા કરવામાં આવી હતી. 3 લાખથી વધુ ફરિયાદોનું નિરાકરણ કરવામાં આવ્યું છે.