રાષ્ટ્રપતિપદના સંયુક્ત ઉમેદવારને મેદાનમાં ઉતારવા પર વિપક્ષ સહમત, મમતા બેનર્જીએ ક્યા નામ સૂચવ્યા?

પશ્ચિમ બંગાળના મુખ્યમંત્રી અને ટીએમસી અધ્યક્ષ મમતા બેનર્જીએ રાષ્ટ્રપતિની ચૂંટણીને લઈને વિપક્ષોને એક કરવા માટે પ્રયાસ શરુ કર્યા છે. જેના ભાગરુપે જ બુધવારે દિલ્હીમાં વિપક્ષી પાર્ટીઓની બેઠક બોલાવી હતી. આ બેઠકમાં 17 પાર્ટીઓના અનેક નેતાઓએ હાજરી આપી હતી. મમતા બેનર્જીએ બોલાવેલી બેઠકમાં ઘણા વિરોધ પક્ષોના નેતાઓએ શરદ પવારને ઉમેદવાર બનવા માટે કહ્યું, પરંતુ તેમણે સ્પષ્ટ ના પાડી દીધી. આ પહેલા પણ તેણે ઘણી વખત ના પાડી હતી.

પશ્ચિમ બંગાળના મુખ્યમંત્રી મમતા બેનર્જીએ બુધવારે દિલ્હીના કોન્સ્ટિટ્યુશન ક્લબમાં વિરોધ પક્ષોની બેઠક યોજી હતી. જેનો હેતુ રાષ્ટ્રપતિની ચૂંટણી માટે એનડીએ વિરુદ્ધ વિપક્ષના સંયુક્ત ઉમેદવારને મેદાનમાં ઉતારવાનો છે. શરદ પવારની અધ્યક્ષતામાં મળેલી બેઠકમાં એવો ઠરાવ પસાર કરવામાં આવ્યો છે કે વિરોધ પક્ષો એનડીએ સામે એક સામાન્ય ઉમેદવારને મેદાનમાં ઉતારશે.

આ બેઠકમાં કુલ 17 પક્ષો- કોંગ્રેસ, RSP, RJD, સમાજવાદી પાર્ટી, શિવસેના, નેશનલ કોન્ફરન્સ, NCP, RLD, PDP, JMM, TMC, CPM, CPI, IUML, JDS, DMK અને CPMLએ ભાગ લીધો હતો. શરદ પવાર, પીસી ચાકો, આરજેડી સાંસદ મનોજ ઝા, ઓમર અબ્દુલ્લા, મહેબૂબા મુફ્તી, એચડી દેવગૌડા, કુમારસ્વામી, ટીઆર બાલુ, અખિલેશ યાદવ, પ્રિયંકા ચતુર્વેદી, મલ્લિકાર્જુન ખડગે અને રણદીપ સુરજેવાલા સહિત ઘણા વરિષ્ઠ નેતાઓએ બેઠકમાં હાજરી આપી હતી. જો કે આમ આદમી પાર્ટી અને ટીઆરએસએ આ બેઠકથી દૂરી લીધી હતી.

બેઠક બાદ પ્રેસ કોન્ફરન્સમાં મમતા બેનર્જીએ કહ્યું કે મોટાભાગના વિપક્ષી દળો ઈચ્છે છે કે શરદ પવાર રાષ્ટ્રપતિ પદના ઉમેદવાર બને. જો તે તેના માટે તૈયાર છે, તો દરેક તેને ટેકો આપશે. જો તે આ માટે તૈયાર ન હોય તો તેમની અધ્યક્ષતામાં ઉમેદવારની પસંદગી કરવામાં આવશે. બેઠકમાં હાજર રહેલા RSP નેતા એનકે પ્રેમચંદ્રને કહ્યું કે મમતા બેનર્જીએ રાષ્ટ્રપતિની ચૂંટણી માટે સંયુક્ત વિપક્ષના ઉમેદવાર તરીકે જમ્મુ અને કાશ્મીરના ભૂતપૂર્વ મુખ્યમંત્રી ફારુક અબ્દુલ્લા અને ગોપાલ કૃષ્ણ ગાંધીના નામ સૂચવ્યા છે.