શરદ યાદવે એન્જિનિયરિંગ પછી રાજકારણમાં પ્રવેશ કર્યો, વિદ્યાર્થી રાજકારણથી સંસદ સુધીની સફર

ગુરુવાર, 12 જાન્યુઆરી, 2023 ના રોજ ભારતીય રાજકારણ અને સમાજવાદી વર્ગનો એક બુલંદ અવાજ શાંત પડ્યો. જેડીયુના પૂર્વ વરિષ્ઠ નેતા અને પૂર્વ સાંસદ શરદ યાદવ ( Sharad Yadav) નથી રહ્યા. શરદ યાદવનો જન્મ ભલે મધ્યપ્રદેશમાં થયો હોય, પરંતુ વિદ્યાર્થી રાજકારણમાં કોલેજ પંચાયતથી લઈને લોકશાહીની સૌથી મોટી અદાલત સુધી તેમનો અવાજ ગુંજી રહ્યો હતો. મૂળ મધ્યપ્રદેશના હોવા છતાં વિદ્યાર્થી રાજકારણથી સંસદ સુધીની સફર કરનાર શરદ યાદવે  બિહાર અને ઉત્તર પ્રદેશના રાજકારણમાંથી પોતાના રાજકીય કારકિર્દી  બનાવી હતી. શરદ યાદવે મધ્ય પ્રદેશ, ઉત્તર પ્રદેશ અને પછી બિહારમાં પોતાનો રાજકીય દબદબો બતાવ્યો અને રાષ્ટ્રીય રાજકારણમાં પોતાનું સ્થાન બનાવ્યું.

શરદ યાદવ નો જન્મ 1 જુલાઈ, 1947ના રોજ મધ્ય પ્રદેશના હોશંગાબાદના બંધાઈ ગામમાં એક ખેડૂત પરિવારમાં થયો હતો. તે બાળપણથી જ અભ્યાસમાં ખૂબ જ હોશિયાર હતા. પ્રારંભિક શિક્ષણ પછી, તેમણે એન્જિનિયર બનવાનું સ્વપ્ન જોયું. આ માટે તેમણે મધ્યપ્રદેશના જબલપુરની એન્જિનિયરિંગ કોલેજમાં પ્રવેશ મેળવ્યો અને BEની ડિગ્રી લીધી.

આ સમય દરમિયાન શરદ રાજનીતિથી પ્રભાવિત થયા હતા અને જબલપુર એન્જિનિયરિંગ કૉલેજ (રોબર્ટસન મોડલ સાયન્સ કૉલેજ)ના વિદ્યાર્થી સંઘના પ્રમુખ તરીકે પણ ચૂંટાયા હતા. તેઓ કુશળ વક્તા પણ હતા. તેમણે ગોલ્ડ મેડલ સાથે ડિગ્રી પૂર્ણ કરી.

જ્યારે શરદ યાદવ  વિદ્યાર્થી રાજકારણમાં વ્યસ્ત હતા, ત્યારે દેશમાં લોકનાયક જયપ્રકાશ નારાયણની લોકશાહી અને ડૉ. રામ મનોહર લોહિયાના સમાજવાદની ક્રાંતિના વિચારોથી શરદ યાદવ પણ ખૂબ પ્રભાવિત હતા. ડૉ. લોહિયાના સમાજવાદી વિચારોથી પ્રેરિત શરદે તેમની મુખ્ય રાજકીય કારકિર્દી શરૂ કરી. યુવા નેતા તરીકે, તેમણે ઘણા આંદોલનોમાં સક્રિયપણે ભાગ લીધો હતો અને કટોકટી દરમિયાન, મીસા કેદી તરીકે જેલમાં પણ ગયા હતા.

શરદ યાદવની રાજકીય કારકિર્દી 1971માં શરૂ થઈ હતી. તેઓ કુલ સાત વખત લોકસભા ના સાંસદ હતા જ્યારે ત્રણ વખત રાજ્યસભાના સભ્ય તરીકે ચૂંટાયા હતા. તેઓ પહેલીવાર 1974માં 27 વર્ષની વયે મધ્યપ્રદેશની જબલપુર લોકસભા બેઠક પરથી લોકસભામાં ચૂંટાયા હતા. આ પછી તેમણે ક્યારેય પાછું વળીને જોયું નથી અને ઉત્તર પ્રદેશની બુદૌન લોકસભા સીટ અને બાદમાં બિહારની મધેપુરા લોકસભા  સીટ પરથી પણ સાંસદ તરીકે ચૂંટાયા હતા.

શરદ યાદવ જનતા દળના સ્થાપક સભ્યોમાંના એક હતા. તેઓ 1989-1990માં કેન્દ્રીય કાપડ અને ખાદ્ય પ્રક્રિયા મંત્રી પણ હતા. તેઓ 1995માં જનતા દળના કાર્યકારી અધ્યક્ષ તરીકે ચૂંટાયા હતા. 1996માં તેઓ બિહારમાંથી પાંચમી વખત લોકસભા સાંસદ બન્યા. 1997માં જનતા દળના રાષ્ટ્રીય અધ્યક્ષ બન્યા અને 1998માં જ્યોર્જ ફર્નાન્ડિસની મદદથી જનતા દળ યુનાઈટેડ પાર્ટીની રચના કરી અને એનડીએના ઘટક દળોમાં જોડાયા અને ફરી કેન્દ્ર સરકારમાં મંત્રી બન્યા. શરદ યાદવ 2004માં રાજ્યસભામાં ગયા હતા. 2009માં સાતમી વખત સાંસદ બન્યા પરંતુ 2014ની લોકસભા ચૂંટણીમાં મધેપુરા સીટ પરથી હારનો સામનો કરવો પડ્યો હતો. જો કે, તેમના જીવનના અંતિમ તબક્કામાં તેમના નજીકના સાથીદાર અને બિહારના મુખ્ય પ્રધાન નીતિશ કુમાર સાથે અણબનાવ થયો હતો. આથી શરદ યાદવે JDU સાથે સંબંધો તોડી નાખ્યા હતા.

આ પણ વાંચો--તૈયાર રહો, કડકડતી ઠંડીના વધુ એક રાઉન્ડ માટે