D કંપની સાથે નવાબ મલિકના સબંધો: EDની ચાર્જશીટ પર કોર્ટને મળ્યા પુરાવા

સેશન્સ કોર્ટની વિશેષ અદાલતે મહારાષ્ટ્ર સરકારના મંત્રી નવાબ મલિક સામે દાખલ કરવામાં આવેલી EDની ચાર્જશીટની નોંધ લીધી હતી. કોર્ટે તેના આદેશમાં કહ્યું હતું કે એવા  પુરાવા છે કે મલિક મની લોન્ડરિંગ અને કુર્લા સ્થિત ગોવાલા કમ્પાઉન્ડ પર કબજો કરવાના ગુનાહિત કાવતરામાં સીધો અને ઈરાદાપૂર્વક સામેલ હતા.

વિશેષ ન્યાયાધીશ રાહુલ એન રોકડેએ તેમના આદેશમાં જણાવ્યું હતું કે મલિકે ડી-કંપનીના સભ્યો એટલે કે હસીના પારકર, સલીમ પટેલ અને સરદાર ખાન સાથે મળીને મુનીરા પ્લમ્બરની મુખ્ય સંપત્તિ હડપ કરવા માટે ગુનાહિત કાવતરું ઘડ્યું હતું. કોર્ટે એમ પણ કહ્યું હતું કે આને લગતા પ્રથમદર્શી પુરાવા છે કે આરોપીઓ મની લોન્ડરિંગના ગુનામાં પ્રત્યક્ષ અને જાણીજોઈને સામેલ છે. તેથી તેઓ PMLAની કલમ 3 અને 4 હેઠળ આરોપી છે.

મલિક વિરુદ્ધ EDની ચાર્જશીટમાં જણાવાયું છે કે મલિકે સર્વેયર દ્વારા ગોવાલા પરિસરમાં ગેરકાયદેસર ભાડૂતોનો સર્વે કર્યો હતો અને સર્વેયર સાથે સંકલન કરવા સરદાર શાહવલી ખાનની મદદ લીધી હતી. EDએ તેની ચાર્જશીટમાં જણાવ્યું હતું કે મલિકે કમ્પાઉન્ડ કબજે કરવા માટે હસીના પારકર અને સરદાર ખાન સાથે ઘણી બેઠકો કરી હતી.

ઈડીએ સરદાર ખાનના નિવેદનને પણ ચાર્જશીટનો એક ભાગ બનાવ્યો છે જેમાં સરદારે કહ્યું છે કે મુનીરા તેનો ભાઈ રહેમાન હતો, જેણે પ્લમ્બર વતી ગોવાનવાલા કમ્પાઉન્ડનું ભાડું લીધું હતું. નવાબ મલિકે કથિત રીતે તેના ભાઈ અસલમ મલિક દ્વારા ગોવાલા પરિસરમાં "કુર્લા જનરલ સ્ટોર" પર કબજો કર્યો હતો. ઇડીએ ચાર્જશીટમાં જણાવ્યું છે કે 1992ના પૂર બાદ સ્ટોર બંધ કરી દેવામાં આવ્યો હતો અને બાદમાં અસલમના નામે તેની ભાડુઆતને આપવામાં આવ્યો હતો. 

એવો આરોપ છે કે બાદમાં નવાબ મલિકે સોલિડસ ઇન્વેસ્ટમેન્ટ દ્વારા ગોવાલા કમ્પાઉન્ડ હડપ કરી લીધું હતું. ચાર્જશીટમાં જણાવાયું છે કે સરદાર ખાને EDને જણાવ્યું હતું કે નવાબ મલિક, અસલમ મલિક અને હસીના પારકર વચ્ચે અનેક રાઉન્ડની બેઠકો યોજાઈ હતી અને (સરદાર ખાન) પણ કેટલીક બેઠકોમાં હાજર હતા. સરદાર શાહવલી ખાન 1993ના બ્લાસ્ટ કેસમાં ઔરંગાબાદ જેલમાં આજીવન કેદની સજા કાપી રહ્યા છે અને તેઓ જે મીટિંગની વાત કરી રહ્યા છે તે સમયે તેઓ પેરોલ પર જેલની બહાર હતા.

એવો આરોપ છે કે નવાબ મલિકે તેમના દ્વારા મિલકતમાં ગેરકાયદેસર રીતે લાવવામાં આવેલા ભાડૂતોનો સર્વે કરવા માટે સર્વેયરની નિમણૂક કરી હતી. EDએ ચાર્જશીટમાં દાવો કર્યો છે કે તપાસ દરમિયાન તેમને સર્વેયર પાસેથી મિલકતના સર્વે સાથે સંબંધિત મે 2005નો દસ્તાવેજ મળ્યો હતો. EDએ ચાર્જશીટના ભાગ રૂપે હસીના પારકરના પુત્ર અલીશાનનું નિવેદન લીધું છે જેમાં તેણે જણાવ્યું હતું કે તેની માતા 2014 સુધી દાઉદ સાથે નાણાકીય વ્યવહાર કરતી હતી અને સલીમ પટેલ તેના સહયોગીઓમાંનો એક હતો. 

આલીશાને EDને જણાવ્યું હતું કે તેની માતાએ પટેલ સાથે મળીને ગોવાલા કમ્પાઉન્ડના વિવાદનું સમાધાન કર્યું હતું અને ઓફિસ ખોલીને તેનો કેટલોક હિસ્સો કબજે કર્યો હતો. બાદમાં તેની માતાએ કબજે કરેલા હિસ્સાને કથિત રીતે મલિકને વેચી દીધો હતો.