MCD ચૂંટણી માટે પ્રચાર પડઘમ થયા શાંત

દિલ્હી મ્યુનિસિપલ કોર્પોરેશન (MCD)ના 250 વોર્ડમાં યોજાનારી ચૂંટણી (Election) માટેનો આજે શુક્રવારે સાંજે 5 વાગે  ચૂંટણી પ્રચાર પૂરો થઈ ગયો છે. MCD માટે ચૂંટણી પ્રચારમાં ભાજપ, AAP અને કોંગ્રેસ સહિત તમામ પાર્ટીઓએ પોતાની પૂરી તાકાત લગાવી દીધી છે. દિલ્હી મ્યુનિસિપલ કોર્પોરેશનના 250 વોર્ડમાં 4 ડિસેમ્બરે મતદાન થશે.  MCD ચૂંટણીના પરિણામો 7 ડિસેમ્બરે જાહેર કરવામાં આવશે.

શુક્રવારે દિલ્હી મ્યુનિસિપલ કોર્પોરેશનની ચૂંટણી પ્રચારના છેલ્લા દિવસે ભાજપ-આપએ તેમની સંપૂર્ણ તાકાત લગાવી દીધી હતી. આજે બીજેપી વતી કેન્દ્રીય મંત્રી પીયૂષ ગોયલ, કેન્દ્રીય મંત્રી મિનાક્ષી લેખી અને કેન્દ્રીય મંત્રી અનુરાગ ઠાકુરે બીજેપી ઉમેદવારોના પક્ષમાં દિલ્હીના વિવિધ વિસ્તારોમાં રોડ શો કર્યા હતા. આ સાથે AAP તરફથી ચૂંટણી પ્રચારના છેલ્લા દિવસે સીએમ અરવિંદ કેજરીવાલે ટાઉનહોલમાં વેપારીઓ સાથે કેજરીવાલ કાર્યક્રમમાં વાત કરી હતી. 

બીજી તરફ, દિલ્હીના શિક્ષણ વિભાગે એમસીડી ચૂંટણીને લઈને 3 ડિસેમ્બરે તમામ સરકારી શાળાઓમાં એક દિવસની રજા જાહેર કરી છે.

MCD ચૂંટણીને લઈને કાયદો અને વ્યવસ્થા પર પણ ખાસ ધ્યાન આપવામાં આવી રહ્યું છે.  દિલ્હીમાં 4 તારીખે યોજાનારી એમસીડી ચૂંટણી માટે પોલીસે દક્ષિણ અને પશ્ચિમ ક્ષેત્રના 7 જિલ્લાઓમાં સંપૂર્ણ તૈયારી કરી લીધી છે.  MCD ચૂંટણી માટે વિવિધ મતદાન મથકો પર 30,000 સુરક્ષા કર્મચારીઓ તૈનાત કરવામાં આવશે. આ સાથે, મહત્વપૂર્ણ બૂથ/સંવેદનશીલ વિસ્તારોમાં સુરક્ષા કર્મચારીઓને વધુ તૈનાત કરવામાં આવશે.

આ પણ વાંચો--આફતાબે શ્રદ્ધાનો મોબાઇલ મુંબઇના દરિયામાં ફેંક્યો હતો