દિલ્હીના દર્દનાક અકસ્માતમાં નવો વળાંક, મૃતક યુવતી સાથે હતી તેની સહેલી

દિલ્હી ( Delhi)ના સુલતાનપુરીના કાંઝાવાલા (Kanzawala Accident) વિસ્તારમાં થયેલા દર્દનાક અકસ્માતમાં નવો વળાંક સામે આવ્યો છે. જ્યારે દિલ્હી પોલીસ (Delhi Police) મૃતક અંજલિના રૂટને ટ્રેસ કરી રહી હતી ત્યારે તેને ખબર પડી કે અંજલિ સાથે સ્કૂટી પર અન્ય એક યુવતી પણ હતી. તે રાત્રે અંજલિનો અકસ્માત થયો ત્યારે યુવતી તેની પાછળ બેઠી હતી. પોલીસ સૂત્રોના જણાવ્યા અનુસાર, અકસ્માત દરમિયાન અન્ય યુવતીને સામાન્ય ઈજા થઈ હતી અને તે ઘટનાસ્થળેથી પોતાના ઘરે જતી રહી હતી. પરંતુ અંજલિનો પગ કારની એક્સેલમાં ફસાઈ ગયો, ત્યારબાદ કારમાં બેઠેલા આરોપીઓ અંજલિને ખેંચતા રહ્યા. પોલીસે આ યુવતીને શોધી કાઢી છે. પોલીસ યુવતીનું નિવેદન પણ નોંધશે.

અકસ્માત પહેલા લગભગ 15 મિનિટનો એક સીસીટીવી પણ સામે આવ્યો છે. તે ન્યૂ યર પાર્ટી પછી સવારે 1.45 વાગ્યે હોટેલમાંથી નીકળતી જોવા મળે છે. અંજલિ પિંક ટી-શર્ટમાં છે, જ્યારે તેની મિત્ર નિધિ રેડ ટી-શર્ટમાં છે. સ્કૂટી નિધિ ચલાવી રહી છે, જ્યારે અંજલિ પાછળ બેઠી છે. અહીંથી નિધિ સ્કૂટી ચલાવે છે અને અમુક અંતરે અંજલિ કહે છે કે હું સ્કૂટી ચલાવીશ, ત્યાર બાદ અંજલિ સ્કૂટી ચલાવે છે અને નિધિ પાછળ બેસી જાય છે. બાદમાં અકસ્માત થાય છે.નિધિને નાની ઈજા થાય છે અને તે સ્થળ પરથી ભાગી જાય છે. અંજલિનો પગ કારમાં ફસાઈ જાય છે અને તે કાર સાથે ખેંચાઈ જાય છે.

સ્પેશિયલ કમિશનર શાલિની સિંહ કાંઝાવાલા રાત્રે ઘટનાસ્થળે ગયા હતા. ગૃહ મંત્રાલયના આદેશ પર હવે તેમના નેતૃત્વની તપાસ કરવામાં આવી રહી છે.

સૂત્રોના જણાવ્યા અનુસાર, આરોપીઓએ પૂછપરછ દરમિયાન જણાવ્યું કે અમિત તેના મિત્રની કાર લઈને આવ્યો હતો અને બંનેએ મળીને નવા વર્ષની પાર્ટી કરવાનો પ્લાન બનાવ્યો હતો. મુરથલ જવાનું નક્કી થયું. મુરથલ ખાતે ભારે ભીડને કારણે ભોજન ઉપલબ્ધ ન હતું. આ પછી પાંચેય પાછા આવ્યા. મુરથલ જતા-આવતા કારમાં દારૂ પીધો હતો. સૂત્રોનું માનીએ તો તમામે લગભગ અઢી બોટલ દારુ પીધો હતો. પરત ફરતી વખતે પીરાગઢી પાસે રાત્રિભોજન કર્યું.

પોલીસ સૂત્રોના જણાવ્યા અનુસાર મનોજ મિત્તલને ઘરે મૂકવા જઈ રહ્યા હતા ત્યારે સ્કૂટી સાથે સામ-સામે ટક્કર થઈ હતી. આ અથડામણ રાત્રે 2 થી 2:30 વાગ્યા દરમિયાન થઈ હતી. અથડામણ બાદ સ્કૂટી ગાડીની આગળ હતી, ગાડીને પાછળ લઇ જવાઇ હતી અને ત્યારે યુવતી કારમાં ફસાઈ ગઈ હતી. આ દરમિયાન વાહન ચાલકને પણ લાગ્યું કે કંઈક ફસાઈ ગયું છે. પરંતુ બાકીના લોકોએ કહ્યું કે કંઈ નથી અને ડ્રાઇવિંગ ચાલુ રાખ્યું.

કારે યુ-ટર્ન લીધો ત્યારે મિથુન ડાબી બાજુ બેઠો હતો અને ત્યારે તેણે છોકરીનો હાથ જોયો, પછી કાર રોકી, પછી છોકરી નીચે પડી ગઈ. બધાએ નીચે ઉતરીને જોયું અને ત્યાંથી ભાગી ગયા. આ તમામ બાબતો આરોપીઓએ પોતાના નિવેદનમાં કહી છે, જેની પોલીસ ખરાઈ કરી રહી છે.

આ પણ વાંચો--હિમાચલ પ્રદેશમાં વારંવાર ધરતી કેમ હલે છે? 18 દિવસમાં ભૂકંપના 5 આંચકા