આવ્યો નવો વાયરસ, આ દેશમાં હજારો લોકોને કરાયા ક્વોરન્ટાઇન

આફ્રિકન દેશ (African Country) ઇક્વેટોરિયલ ગિની (Equatorial Guinea)માં ભયાનક વાયરસ જોવા મળ્યો છે અને તેના કારણે હજારો લોકોને ક્વોરન્ટાઇન કરવામાં આવ્યા છે. મારબર્ગ વાયરસ (Marburg Virus) નામના આ વાયરસથી WHOની પણ ઉંઘ ઉડી ગઇ છે. 

ઇક્વેટોરિયલ ગિની માં થોડા દિવસ પહેલા કેટલાક લોકો અંતિમ સંસ્કારમાં જોડાયા હતા અને તેના થોડા દિવસો પછી તેમાંથી 9 લોકોમાં સમાન રોગના લક્ષણો દેખાયા હતા અને પછી મૃત્યુ પામ્યા હતા. જો કે,  ગિનીના સ્વાસ્થ્ય મંત્રીએ જણાવ્યું કે જે બે ગામોમાં લોકોમાં આ સંક્રમણ હોવાનું જાણવા મળ્યું છે, હાલ માટે ત્યાં કોઈના જવા પર પ્રતિબંધ લગાવી દેવામાં આવ્યો છે. નવી માહિતી અનુસાર, જે લોકો ચેપગ્રસ્ત લોકોના સીધા સંપર્કમાં છે તેઓ પણ ક્વોરેન્ટાઇનનું પાલન કરી રહ્યા છે. હાલમાં 16 લોકો શંકાસ્પદ છે અને લગભગ 4 હજાર 300 લોકોને ક્વોરેન્ટાઈન કરવામાં આવ્યા છે...

કોરોનાએ આખી દુનિયાને જણાવી દીધું છે કે વાયરસના ચેપનો ડર શું છે. વર્ષ 2019 ના છેલ્લા મહિનાઓથી શરૂ કરીને, આખા વિશ્વને ઘેરી લેનાર આ વાયરસનો ભય અને પછીની અસરો હજી પૂરી રીતે સમાપ્ત થઈ નથી કે મારબર્ગ વાયરસે આફ્રિકન દેશોમાં હાહાકાર મચાવ્યો છે. જો કે આ વાયરસ નવો નથી અને ભૂતકાળમાં પણ તેના સંક્રમણના સમાચારો આવતા રહ્યા છે, પરંતુ આ વખતે જે રીતે તેનું સંક્રમણ ફેલાઈ રહ્યું છે તેનાથી વિશ્વ આરોગ્ય સંસ્થા (WHO)ની ઉંઘ હરામ થઈ ગઈ છે.

મારબર્ગ વાયરસ વિશે સૌથી ભયાનક બાબત એ છે કે તેનાથી સંક્રમિત લોકોમાં મૃત્યુ દર 88 ટકા સુધી છે. એટલે કે 100 લોકોમાંથી 88 લોકોનો જીવ બચાવવો લગભગ અશક્ય છે. મારબર્ગ વાયરસ ચેપ અને તેના લક્ષણો વિશે વાત કરતા વૈજ્ઞાનિકો કહે છે કે  મારબર્ગ એ જ Filoviridae કુટુંબનો વાયરસ છે જેમાંથી ઇબોલા વાયરસ આવે છે. અને તે મુખ્યત્વે ચામાચીડિયા દ્વારા ફેલાય છે.

તાજેતરના વાયરસ ચેપ વિશે વાત કરતા વૈજ્ઞાનિકો કહે છે કે ઇક્વેટોરિયલ ગિનીમાં ફેલાતો મારબર્ગ વાયરસ ચેપ વર્ષ 2004-05 પછી આ વાયરસનો સૌથી ઝડપી ફેલાવો છે. છેલ્લા 10 વર્ષોમાં, આ વાયરસના ચેપના માત્ર થોડા જ કેસ નોંધાયા છે. જો કે, વર્ષ 2004-05માં, અંગોલામાં 252 લોકો આ વાયરસથી સંક્રમિત થયા હોવાનું નોંધાયું હતું, જેમાંથી 227 લોકોના મોત થયા હતા. આ વાયરસ ઈબોલા જેવો ખતરનાક માનવામાં આવે છે અને તે ખૂબ જ ઝડપથી ચેપ ફેલાવી રહ્યો છે. ચિંતાની વાત એ છે કે હજુ સુધી આની કોઈ રસી ઉપલબ્ધ નથી.

મારબર્ગ વાઇરસની તપાસ અને સારવાર અંગે વૈજ્ઞાનિકો કહે છે કે ઘણા કિસ્સાઓમાં આ વાઇરસના લક્ષણોને મેલેરિયા, ટાઇફોઇડ તાવ, શિગેલોસિસ, મેનિન્જાઇટિસ અને અન્ય ચેપી તાવથી અલગ પાડવું મુશ્કેલ બની શકે છે જેમાં શરીરમાંથી રક્તસ્રાવ શરૂ થાય છે. એટલા માટે આ વાયરસને તપાસવા માટે એન્ટિજેન ડિટેક્શન ટેસ્ટ, સીરમ ન્યુટ્રલાઇઝેશન ટેસ્ટ, RT-PCR અને સેલ કલ્ચર મેથડનો ઉપયોગ કરવામાં આવે છે. પુષ્ટિ થયા પછી, લક્ષણોના આધારે દવાઓનો ઉપયોગ કરવામાં આવે છે અને દર્દીને પ્રવાહી આહાર, ગ્લુકોઝ વગેરે આપીને ડિહાઇડ્રેશન અટકાવવાના પ્રયાસો કરવામાં આવે છે.

આ પણ વાંચો--ગ્લેક્સોએ 40 વર્ષ સુધી જેનટેક દવાથી કેન્સરનું જોખમ છુપાવ્યું, FDAએ વેચાણ પર પ્રતિબંધ મૂક્યો