વડોદરામાં મંત્રી મનીષા વકીલ ગુમ થયાના પોસ્ટર લાગ્યા, જાણો શું છે મામલો

વડોદરાના ખોડિયારનગર સયાજીપુરા બુસ્ટર સામેના વિસ્તારમાં રાજ્યના મહિલા વિકાસ મંત્રી અને વડોદરાની શહેર વાડી વિસ્તારના ધારાસભ્ય મનીષા વકીલ ગુમ થયા હોવાના પોસ્ટર લાગતાં ચકચાર મચી ગઇ હતી. સ્થાનિક યુવકે આરોપ લગાવ્યા હતા કે ચૂંટણી જીત્યા બાદ મનીષા વકીલ તેમના મતવિસ્તારમાં ફરક્યા નથી. 

વડોદરાના શહેર વાડી વિસ્તારના ધારાસભ્ય મનીષા વકીલ સામે લોકોનો રોષ જોવા મળી રહ્યો છે. સ્થાનિક લોકો આરોપ લગાવી રહ્યા છે કે ચૂંટણી જીત્યા બાદ તેઓ એક પણ વખત તેમના મતવિસ્તારમાં જોવા મળ્યા નથી. યોગેન્દ્ર પરમાર નામના સ્થાનિક યુવકે સયાજીપુરા વિસ્તારમાં ધારાસભ્ય ગુમ થયા હોવાનું જણાવીને પોસ્ટર લગાડ્યા છે. 

વડોદરામાં મંત્રી મનીષા વકીલ ગુમ થયાના પોસ્ટર લાગતા ચકચાર મચી ગઇ છે. તેમના જ  મત વિસ્તારમાં મનીષા વકીલના પોસ્ટર લાગ્યાં છે, જેમાં  ચૂંટાયા બાદ પ્રજાની મુલાકાત ન લીધી હોવાનો આક્ષેપ કરાયો છે. ઠેર ઠેર પોસ્ટર દ્વારા મંત્રી મનીષા વકીલ સામે નારાજગી જોવા મળી રહી છે. 

સ્થાનિક યુવક યોગેન્દ્ર પરમારે જણાવ્યું કે શહેર વાડીના અમારા ધારાસભ્ય મનીષા વકીલ ગુમ થયેલા છે.  લોકોએ તેમને મત આપીને જીતાડ્યા છે પણ તે એક પણ વખત વિસ્તારમાં દેખાયા નથી. મેયરે કિશનવાડી આવાસની મુલાકાત લીધી હતી પણ આવાસની સ્થિતિ અંગે મેયર અને મંત્રીને ખબર નથી. આ વિસ્તારમાં પાણીની સમસ્યા છે. ક્રિષ્નાનગરમાં તો મહિનાથી પાણી આવતું નથી. લોકો કહે છે કે હવે તો આ વિસ્તારમાં આવો અને  એક વખત તો મોઢું બતાવો. તમે હજારો વોટ લઇને જીત્યા છો અને અમારી તમારી પાસે આશા છે. એક વાર તો આવો. યુવકે આરોપ લગાવ્યો કે પ્રજાવતી અમે આ  પોસ્ટર લગાવ્યું છે. મંત્રી બન્યા બાદ મનીષા બેન હજુ દેખાયા નથી.