ગર્લફ્રેન્ડને ફેરવવા ચોરી તો કરી પણ આખરે પોલીસના હાથે પકડાયો

આજકાલના યુવાનો પોતાના મોજ શોખ પૂરા કરવા ના કરવાના કામો કરી બેસે છે અને  પછી તેમની પાસે અન્ય કોઇ વિકલ્પ બચતો નથી.આવો જ  કઈક આવો જ કિસ્સો વડોદરા (Vadodara) શહેરના ભાયલી ગામમાં બનવા પામ્યો છે. ભાયલી ગામે આવેલા સુપ્રસિધ્ધ અંબાજી મંદિરે રોજ મોટી સંખ્યામાં દર્શનાર્થીઓ દર્શન કરવામાં માટે આવે છે.આમ તો ભક્તો ભગવાન પાસે કઈક ને કાઈક માંગવા જ જતા હોય છે પરંતુ ભાયલીના આ યુવાને માતાજી પાસે થી બે હાથ જોડી  કઈક માંગવાના બદલે દાન પેટીમાં મુકેલી દાનની રકમ જ છીનવી લીધી.

સમગ્ર મામલે વિસ્તારથી વાત કરવામાં આવે તો વડોદરા શહેરને બિલકુલ અડીને આવેલા ભાયલી ગામના સુપ્રસિધ્ધ અંબા માતાના મંદિરના પૂજારી વિરંચી મહારાજ રાબેતા મુજબ વહેલી સવારે મંદિરે પૂજા અર્ચના કરવા માટે પહોચ્યાં હતા.મંદિરે પહોંચી તેમણે જોયું તો મુખ્ય દ્વારના તાળા તૂટેલા હતા.બાદમાં મંદિરની અંદર જઈને તપાસ કરતા દાન પેટી તૂટેલી હાલતમાં હતી અને અંદરથી દાનમાં આવેલી રકમ ગાયબ હતી જેથી વીરંચી મહારાજ દ્વારા ગામના જ એક આગેવાનનો સંપર્ક કરી સમગ્ર મામલે તાલુકા પોલીસ મથકે મંદિરમાં ચોરીની ઘટના અંગેની ફરિયાદ નોંધાવી હતી.

મંદિરમાં ચોરી થઈ હોવાની ફરિયાદને ગંભીરતા થી લેતા તાલુકા પોલીસ સ્ટેશન ના પી.એસ.આઈ. લાંબરિયા અને તેમની ટીમ દ્વારા તાત્કાલિક ધોરણે અજાણ્યા તસ્કરની શોધખોળ હાથ ધરવામાં આવી હતી.પોલીસ દ્વારા મંદિર આસપાસ ના CCTV ફૂટેજ ની ચકાસણી કરતા એક યુવક મંદિરના દ્વાર પાસે શંકાસ્પદ હિલચાલ કરતો જણાઈ આવ્યો હતો.જેથી પોલીસે ટેકનિકલ સર્વેલન્સ અને અંગત બાતમીદાર  કામે લગાડતા ગણતરીના કલાકોમા જ અજાણ્યા તસ્કરનું પગેરું મેળવી લીધું હતું.

પોલીસ દ્વારા મંદિરમાં હાથફેરો કરનાર યુવક ની કડકાઈ થી પૂછપરછ કરાતા તેનું નામ શિવ જીતેન્દ્રભાઈ પટેલ હોવાનું સામે આવ્યું છે.ઉલ્લેખનીય છે કે શિવ પટેલ પોતે ભાયલી ગામનો જ વતની છે. હાલ તે ધોરણ 12 માં અભ્યાસ કરે છે. શિવનો પરિવાર આર્થિક રીતે સદ્ધર છે પરંતુ પોતાની કેટલીક કુટેવોના કારણે તે ચોરી ના રવાડે ચઢી ગયો હતો.

ધોરણ 12 માં અભ્યાસ કરતો શિવ જીતેન્દ્ર પટેલ પોતે એક ટેટૂ આર્ટિસ્ટ છે અને હરવા ફરવાનો શોખીન છે.પોતાની ગર્લફ્રેન્ડ ને ફેરવવા અને મોજ શોખ પૂરા કરવા અંબા માતાના મંદિરે હાથફેરો કર્યો હોવાની તેને પોલીસ સમક્ષ કબૂલાત કરી છે.ઉલ્લેખનીય છે કે અંબામાતા ના મંદિરે અગાઉ પણ આજ પ્રકારે ચોરી ની ઘટના પ્રકાશમાં આવી હતી ત્યારે તાલુકા પોલીસ દ્વારા શિવ જીતેન્દ્ર પટેલ પાસેથી મંદિર ની દાન પેટીમાંથી ચોરી કરાયેલા 1620 કબ્જે કરી કાયદેસરની કાર્યવાહી હાથ ધરવામાં આવી છે.

પોતાના મોજશોખ પૂરા કરવા ભાયલી ગામના આર્થિક રીતે સદ્ધર પરિવાર ના શિવ જીતેન્દ્ર ભાઈ પટેલે ચોરી નો રસ્તો અજમાવતા તેના માતાપિતા એ સમાજમાં નીચું જોવાનો વારો આવ્યો છે ત્યારે અન્ય માતાપિતા એ પણ આ કિસ્સા પરથી સબક લઈ પોતાના બાળક ની તમામ ગતિવિધિઓ પર નજર રાખવી અનિવાર્ય બન્યું છે.

આ પણ વાંચો--ગોંડલ માર્કેટ યાર્ડ લસણથી ઉભરાયું