વિસનગરના કોંગ્રેસના ઉમેદવારને ધારાસભ્ય બનવાની ઉતાવળ, ઇન્સ્ટાગ્રામ પર લખી નાખ્યું MLA

ગુજરાત વિધાનસભાની ચૂંટણી (Gujarat Assembly Election)માં કોંગ્રેસ (Congress)ના ઉમેદવાર કિરિટ પટેલે ભાંગરો વાટ્યો છે અને તેમની ધારાસભ્ય બનવાની ઉતાવળ સામે આવી છે. હજું તો મતદાન પણ થયું નથી ત્યારે કિરિટ પટેલે પોતાના ઇન્સ્ટાગ્રામ એકાઉન્ટમાં  MLA લખી દીધું છે. કિરિટ પટેલની આ પોસ્ટના કારણે સમગ્ર વિસ્તારમાં ભારે ચકચાર જોવા મળી હતી. 

વિસનગર કોંગ્રેસના ઉમેદવાર કિરીટ પટેલની ધારાસભ્ય બનવા ઉતાવળ સામે આવી છે. વિસનગર કોંગ્રેસના ઉમેદવાર કિરીટ પટેલે હરખપદુડા બનીને તેમના ઇન્સ્ટાગ્રામ એકાઉન્ટમાં  MLA લખી દીધું છે. વિસનગરમાં હજું તો મતદાન પણ થયું નથી અને હાલ વર્તમાન ધારાસભ્ય ઋષિકેશ પટેલ છે છતાં કોંગ્રેસના ઉમેદવારે હરખપદુડા બનીને  MLA કિરિટ પટેલ લખી દીધુ છે. 

વિધાનસભાની ચૂંટણી માટે હાલ ભાજપ અને કોંગ્રેસના ઉમેદવારો પ્રચાર કરી રહ્યા છે અને જંગ જામી ચુક્યો છે ત્યારે વિસનગરના કોંગ્રેસના ઉમેદવાર કિરિટ પટેલે જાણે પોતે જીતી ગયા હોય તેમ માની લીધું છે. મતદારોએ હજું પોતાનો ફેંસલો આપ્યો નથી ત્યારે કોંગ્રેસના ઉમેદવારે ભ્રમ ફેલાવવા માટે પોતાને સોશિયલ મીડિયા ના એકાઉન્ટમાં MLA જાહેર કરી દીધા હતા.

કિરિટ પટેલના ઇન્સ્ટાગ્રામ એકાઉન્ટની આ પોસ્ટ ટોક ઓફ ધી ટાઉન બની છે. ગુજરાત ફર્સ્ટ દ્વારા આ મામલે તેમની પ્રતિક્રિયા જાણવા માટે સંપર્ક કરવાનો પ્રયાસ કરાયો હતો પણ તેમણે ફોન ઉપાડવાનું ટાળ્યું હતું. કિરીટ ભાઈને તો ધારાસભ્ય બનવાની ઉતાવળ છે પણ હવે જોવાનું એ રહ્યું છે કે મતદારો કોને પોતાના મત વિસ્તારનો જીતનો સરતાજ પહેરાવે છે.કિરીટ પટેલનું આ સોશિયલ મીડિયા એકાઉન્ટ તેમનું છે કે ફેક એ ગુજરાત ફર્સ્ટ પુષ્ટિ કરતું નથી.