પંતે તોડ્યો માહીનો રેકોર્ડ, ટેસ્ટમાં બતાવ્યો T20 અવતાર

ટીમ ઈન્ડિયામાં પોતાના અલગ અંદાજથી બેટિંગ કરવા માટે જાણીતા રિષભ પંતે એજબેસ્ટનમાં રમાઇ રહેલી એકમાત્ર ટેસ્ટ મેચના પ્રથમ દિવસે ધમાકેદાર બેટિંગ કરી ઈંગ્લિશ બોલરોને ખૂબ ધોયા હતા. એક સમય એવો આવ્યો હતો કે ટીમ ઈન્ડિયા 200 રન પણ કરશે કે નહીં તેવી સ્થિતિમાંથી રિષભ પંત અને રવિન્દ્ર જાડેજાએ ટીમને બહાર કાઢી છે. ત્યારે પ્રથમ દિવસના અંતે ટીમ ઈન્ડિયાનો સ્કોર 338/7 હતો. 

કહેવાય છે કે, ટેસ્ટ મેચમાં ધૈર્ય અને યોગ્ય ટેકનિકથી જ તમે રમી શકો છો. જો તમારી પાસે તે નહીં હોય તો તમે ટેસ્ટમાં આગળ વધી શકશો નહીં, પરંતુ આજે જાણે સમય બદલાઇ જ ગયો છે. જેનું ઉદાહરણ શુક્રવારે ભારત-ઈંગ્લેન્ડ ટેસ્ટ મેચનો પ્રથમ દિવસ છે. જીહા, એક સમય એવો આવ્યો હતો કે ટીમ ઈન્ડિયા જલ્દી જ ઓલ આઉટ થઇ જશે પરંતુ ત્યારે વિકેટકીપર બેટ્સમેન રિષભ પંત મેદાન પર આવ્યો અને તેણે તાબડતોડ બેટિંગ કરતા સ્કોરને ઝડપથી ફરતું કર્યું હતું. પંતે 111 બોલમાં 146 રનની શાનદાર ઇનિંગ રમી હતી, આ દરમિયાન તેણે 20 ફોર અને 4 સિક્સર ફટકારી હતી. આ તોફાની ઇનિંગની સાથે તેણે ઘણા રેકોર્ડ પણ પોતાના નામે કર્યા છે અને દિગ્ગજોને પાછળ છોડી દીધા છે. 

મહત્વનું છે કે, મેચમાં ભારતના 98 રન પર 5 વિકેટ બાદ રિષભ અને રવિન્દ્ર જાડેજાએ છઠ્ઠી વિકેટ માટે 222 રનની ભાગીદારી કરીને ટીમ ઈન્ડિયાને મેચમાં લીડ અપાવી હતી. આ સાથે રિષભે ઘણા ખાસ રેકોર્ડ પણ પોતાના નામે કર્યા છે. પંતે 146 રનની ઇનિંગ રમીને ઇંગ્લેન્ડના બોલરોને બેકફૂટ પર મૂકી દીધા. તેણે એશિયા બહાર ભારત માટે ત્રીજી સૌથી ઝડપી સદી ફટકારી હતી. તેણે 89 બોલમાં તેની પાંચમી ટેસ્ટ સદી ફટકારીને બધાને ચોંકાવી દીધા હતા. 

રિષભ પંતે પોતાની શાનદાર ઇનિંગમાં 20 ફોર અને 4 સિક્સર ફટકાર્યા હતા. તેને બીજા છેડેથી રવિન્દ્ર જાડેજાનો પુષ્કળ ટેકો મળ્યો અને આ રીતે બંનેએ 222 રનની ભાગીદારી કરી, જે ઈંગ્લેન્ડ સામે છઠ્ઠી વિકેટ માટે ભારતની સર્વોચ્ચ ભાગીદારી છે. આજે તેની પાંચમી ટેસ્ટ સદી સાથે પંતે ભારત તરફથી સૌથી સફળ કેપ્ટન મહેન્દ્ર સિંહ ધોનીનો રેકોર્ડ પણ તોડી નાખ્યો છે.