રાફેલ નડાલે 14મી વખત ફ્રેન્ચ ઓપનનો ખિતાબ જીત્યો, રચી દીધો ઈતિહાસ

રેડ ગ્રેવલ કિંગ રાફેલ નડાલ રેકોર્ડ 14મી વખત ફ્રેન્ચ ઓપન ચેમ્પિયન બન્યો છે. ફાઇનલમાં તેનો મુકાબલો નોર્વેના કેસ્પર રૂડ સામે થયો હતો. આ મેચમાં રાફેલ નડાલે ફરી એકવાર સાબિત કરી દીધું કે તેને ક્લે કોર્ટનો કિંગ કેમ કહેવામાં આવે છે. તેણે ફાઈનલ મેચમાં કેસ્પર રૂડેને સીધા સેટમાં હરાવીને ટાઈટલ જીત્યું હતું.

નડાલે ફાઇનલમાં રૂડેને 6-3, 6-3, 6-0થી હરાવીને ફ્રેન્ચ ઓપન ટાઇટલ જીત્યું હતું. આ રેકોર્ડ 14મી વખત છે જ્યારે નડાલે ક્લે કોર્ટ પર પોતાનું વર્ચસ્વ સાબિત કર્યું છે. આ મેચમાં રૂડે ક્યાંય પણ નડાલને ટક્કર આપી શક્યો ન હતો. તેને એકતરફી મેચમાં હારનો સામનો કરવો પડ્યો હતો.

રાફેલ નડાલે ફ્રેન્ચ ઓપન 2022નો ખિતાબ જીતીને તેની કારકિર્દીનું 22મું ગ્રાન્ડ સ્લેમ ખિતાબ જીતી લીધો છે. જેની સાથે તેણે વિશ્વના નંબર વન નોવાક જોકોવિચ અને સ્વિટ્ઝર્લેન્ડના રોજર ફેડરરના 21 ગ્રાન્ડ સ્લેમના રેકોર્ડને પણ પાછળ છોડી દીધો છે. તે જ સમયે, આ પહેલા, કેરોલિન ગાર્સિયા અને ફ્રાન્સની ક્રિસ્ટીના મ્લાડેનોવિકની જોડીએ કોકો ગૉફ અને જેસિકા પેગુલાની અમેરિકન જોડીને હરાવીને ફ્રેન્ચ ઓપન ટેનિસ ગ્રાન્ડ સ્લેમ મહિલા ડબલ્સનો ખિતાબ જીત્યો હતો. રોલેન્ડ ગેરોસ ખાતે કેરોલિન અને ક્રિસ્ટીનાની આ બીજી મહિલા ડબલ્સ ચેમ્પિયનશિપ છે. અગાઉ બંનેએ 016માં પણ અહીં ટાઈટલ જીત્યું હતું.