પલસાણામાં ગત રાત્રીએ ફાયરિંગની ઘટના, 1 ઈજાગ્રસ્ત, ગેંગવોર કે લૂંટ?

સુરત જિલ્લાના પલસાણા ખાતે ગઈ કાલે રાત્રે હળદરૂ ગામમાં અજાણયા બદમાશોએ આતંક મચાવ્યો હતો. મોટર સાયકલ પર જઈ રહેલા બે મિત્રોને આંતરી લઈને મોબાઈલ અને રોકડ લૂંટી લીધી હતી.એટલું જ નહીં યુવક દ્વારા પ્રતિકાર કરવામાં આવતા બદમાશોએ ફાયરિંગ કરતા યુવકને કોણીના ભાગે ગોળી વાગતા ઈજાગ્રસ્ત થયો હતો.

સમગ્ર મામલે ચર્ચાઓ ચાલી રહી છે કે આ ફાયરિંગ બુટલેગરોના ગેંગ વોરમાં બની છે. પલસાણા પોલીસના ચોપડે લૂંટની ફરિયાદ નોંધાઈ છે લૂંટ કરી બદમાશો ફરાર થઇ ગયા હતા અને ફાયરિંગની ઘટનામાં ઈજાગ્રસ્ત થયેલા યુવકને સારવાર માટે સુરત શહેરની નવી સિવિલ હોસ્પિટલમાં ખસેડાયો હતો.

પલસાણા પોલીસ સૂત્રો પાસેથી મળતી માહિતી મુજબ પલસાણા ખાતે આવેલ હળદરૂ ગામના 28 ગાળા ફળિયામાં રહેતો વિનોદ રાઠોડ સહીત બે જણા ગઈ કાલે રાત્રે હળદરૂ ગામ પાસે આવેલ સર્વોત્તમ હોટલ પાસે આવેલા પેટ્રોલ પંપ પરથી મોટર સાયકલમાં પેટ્રોલ ભરાવવા ગયા હતા અને પેટ્રોલ ભરાવી પરત જઈ રહયા હતા. તેઓ હળદરૂ ગામ પાસે અંધારામાંથી પસાર થઇ રહયા હતા ત્યારે ત્રણ અજાણયા લૂંટારૂઓએ તેમને આંતરી લીધો હતો અને વિનોદ પાસેથી મોબાઈલ તથા રોકડા રૂ.1200 લૂંટી લીધા હતા ત્યારે યુવકે લૂંટારુંઓનો પ્રતિકાર કરતા તેઓએ તેની કોણીમાં ફાયરિંગ કરી ફરાર થઇ ગયા હતા.

યુવકને ઈજાગ્રસ્ત હાલતમાં સારવાર માટે નવી સિવિલ હોસ્પિટલમાં ખસેડાયો હતો.વધુમાં પલસાણા PI એ.બી. ચાવડાએ જણાવ્યું હતું કે, ત્રણ લૂંટારુઓ હતા. જોકે હજુ આરોપીઓ પકડાયા નથી તો બીજી બાજુ ચર્ચાઓ ચાલી રહી છે કે માત્ર એક મોબાઈલ ફોન અને રૂ. 1200ની લૂંટના ચક્કરમાં લૂંટારુઓ ફાયરિંગ કરે એ પણ એક સવાલ બની ગયો છે.

આ પણ વાંચો - અમદાવાદ શહેરમાં ફરી એકવાર માનવ તસ્કરીનો કિસ્સો સામે, જાણો આ અહેવાલમાં