ATM મશીન તોડ્યા વગર જ મશીનમાંથી રૂપિયાની ઉઠાંતરી, ગેંગના 5 સભ્યોની ધરપકડ

ATM મશીન તોડ્યા વગર જ મશીનમાંથી રૂપિયાની ઉઠાંતરી કરતી ગેંગને પકડી પાડવામાં આવી છે. અમદાવાદ સાયબર ક્રાઇમને ગેંગના 5 સાગરિતને ઝડપી પાડવામાં સફળતા મળી છે. જો કે પોલીસ પકડમાં ન આવે તે માટે આરોપીઓ મશીનમાંથી 10 લાખ સુધીના રકમની જ  ચોરી કરતા હતા. 

સાયબર ક્રાઇમે પકડી પાડેલા શખ્સોની ચોરી કરવાની મોડસ ઓપરેન્ડી જાણીને તમે પણ ચોંકી જશો. તમામ આરોપીઓ ધોરણ 12 કરતા પણ ઓછું ભણેલા છે. પંરતુ ATM મશીન તોડ્યા વગર જ તેમાંથી લાખ્ખો રૂપિયાની ઉઠાંતરી કરવામાં માહેર છે. અમદાવાદ સાયબર ક્રાઇમે આ ગેંગના પાંચ આરોપી જેમાં આસામના ગુરદિપ સિંઘ, અમ્રિતપાલ રણજીત સિંઘ, અંજારના નિલદિપ સોલંકી, રવિ સોલંકી, અને પંજાબના સંદિપસિંઘ કુલદિપસિંઘની ધરપકડ કરી છે. આરોપીઓ NRC નામની કંપનીના ATMમશીનને ટાર્ગેટ કરતા હતા અને એક ચાવીથી મશીનનો એક ભાગ ખોલી દેતા. તેમાં રેસબરી પાઈ નામનું ડિવાઇસ કનેક્ટ કરતા હતાં. જેથી મશીનમાં થતી તમામ કામગીરી આ ડિવાઇસમાં ઓપરેટ કરી શકાતી હતી. બાદમાં કોઈપણ ATM કાર્ડથી રૂપિયા ઉપાડી લેતા હતા. જો કે આ ડિવાઇસથી એવી સિસ્ટમ ઉભી કરતા જેથી એક ટ્રાન્જેક્શનમાં કોઈપણ દરની 40 નોટ મશીનમાંથી નિકળી શકે. આરોપીઓએ આ રીતે અમદાવાદમાં ATM મશીનમાંથી  8.30 લાખ, રાજકોટમાંથી 13.80 લાખ, અને બરોડામાંથી 10 લાખની ઉઠાંતરી કરી હતી.