MLA હોવાની ખોટી ઓળખ ધારણ કરનારા નબીરાની ધરપકડ, કાર અને પ્લેટ કબજે લેવાઈ

અમદાવાદ શહેર (Ahmedabad City) ના અતિ પોશ ગણાતા સિંધુ ભવન રોડ (Sindhu Bhavan Road) પર રાત પડતાની સાથે અનેક નબીરાઓ કલર કરતા જોવા મળે છે. આવો જ એક નબીરો શહેર પોલીસના હાથે ઝડપાયો છે. ગુજરાતના ધારાસભ્ય તરીકેની ઓળખ ધારણ કરીને કાળા કાચવાળી કાર લઈને રૂઆબ જમાવતા એક નબીરાની અમદાવાદ શહેરના ડીસીપી ભગીરથસિંહ જાડેજા (Bhagirathsinh Jadeja IPS) એ હવા કાઢી નાંખી છે. આ મામલે સરખેજ પોલીસે ગુનો નોંધી યુવકની ધરપકડ કરી વધુ તપાસ આરંભી છે.

પોલીસ આગળ રૂઆબ જમાવવો ભારે પડ્યો
અમદાવાદ શહેરના ડીસીપી ભગીરથસિંહ જાડેજા રવિવાર-સોમવારની રાતે નાઈટ ડ્યૂટીમાં હોવાથી પેટ્રોલિંગમાં નીકળ્યા હતા. આ સમયે સિંધુ ભવન રોડ પર તાજ સ્કાયલાઈન હોટલ (Taj Skyline Hotel) ની નજીક એક કાળા કલરની કારના બોનેટ પર બેસીને એક યુવક સિગરેટના કશ ખેંચી રહ્યો હતો. આ દ્રશ્ય જોઈને ડીસીપી જાડેજાએ પોતાની કાર રોકાવી દીધી હતી અને સ્ટાફને યુવક પાસે મોકલ્યો હતો. પોલીસે જ્યારે કાર તરફ ધ્યાનથી જોયું તો સ્ટીયરિંગ પાસે એમએલએ ગુજરાત (MLA Gujarat) લખેલી એક એક્રેલિકની પ્લેટ નજરે પડી હતી. પોલીસને જોઈને લાજવાના બદલે યુવક પોતાનો રોફ જમાવવા લાગ્યો હતો. પોલીસ સ્ટાફે યુવકના વર્તન અંગેની જાણ ડીસીપીને કરતા તેમણે તુરંત જ યુવકને પોતાની પાસે લઈ આવવા આદેશ આપ્યો હતો. કારની માલિકી કઈ વિધાનસભા બેઠકના ધારાસભ્યની છે તેવો પ્રશ્ન પૂછતાંની સાથે યુવક ઠંડો પડી ગયો હતો અને ગલ્લાતલ્લા કરવા લાગ્યો હતો.

સરખેજ પોલીસનો મહેમાન બન્યો
સિંધુ ભવન રોડ પર રોલા મારતો નબીરા હાથ લાગતા સરખેજ પોલીસે માનવ મહેન્દ્રસિંહ ચાવડા (ઉ. 21 રહે. સેક્ટર-2 ગાંધીનગર) ની અટકાયતી કરી હતી. કારના કાચ પર ડાર્ક ફિલ્મ લગાવી તેમજ ધારાસભ્યની ઓળખ ધારણ કરનારા નબીરા માનવ ચાવડા સામે સરખેજ પોલીસ સ્ટેશન (Sarkhej Police Station) માં ગુનો નોંધાયો છે. માનવ ચાવડા સામે IPC 170 (લોક સેવકની ખોટી ઓળખ ધારણ કરવી) અને  IPC 188 (જાહેરનામા ભંગ) હેઠળ FIR નોંધવામાં આવી છે. પોલીસે હ્યુન્ડાઈની વર્ના કાર, MLA Gujarat લખેલી પ્લેટ અને આરોપીનો મોબાઈલ ફોન કબજે લીધો છે. અમદાવાદ રિંગ રોડ (Ahmedabad S P Ring Road) પર ટોલ ટેક્સ વસૂલતી કંપની Ahmedabad Ring Road Infrastructure Limited (ARRIL) માં ચીફ જનરલ મેનેજર તરીકે ફરજ બજાવતા મહેનદ્રસિંહ ચાવડાનો પુત્ર માનવ ઈન્ડસ યુનિવર્સિટી (Indus University) માં BBA સેકન્ડ યરમાં અભ્યાસ કરે છે. માનવ ચાવડા શા માટે MLA Gujarat લખેલી પ્લેટ કારમાં લગાવીને ફરતો હતો ? કારની માલિકી કોની છે ? વિગેરે વિગેરે મુદ્દે સરખેજ પોલીસે તપાસ શરૂ કરી છે.

આ પણ વાંચો – AHMEDABAD નો આ VIRAL VIDEO જોઈને તમારા રૂવાંડા ઉભા થઈ જશે

ગુજરાત ફર્સ્ટ તમને સમાચારોથી હંમેશા અવગત રાખશે
ગુજરાતની નંબર 1 ગુજરાતી ન્યૂઝ ચેનલ એટલે ગુજરાત ફર્સ્ટ (Gujarat First) – જે ગુજરાતીઓને દરેક સમાચારમાં રાખે છે આગળ. ગુજરાત, રાષ્ટ્રીય, આંતરરાષ્ટ્રીય, ઇલેક્શન, બિઝનેસ, સ્પોર્ટ્સ, મનોરંજન સહિતના દરેક સમાચાર વાંચો ગુજરાત ફર્સ્ટ પર. હવે દરેક સમાચાર આંગળીના ટેરવે આપના મોબાઈલમા, ડાઉનલોડ કરો અમારી લેટેસ્ટ Android અને iOS એપ. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ