લોકોને શરીરના આ 'ભાગ' માં મારવાને કસ્ટોડિયલ ક્રૂરતા ન ગણવી જોઈએ, પોલીસની દલીલ

લોકોને નિતંબ ઉપર લાકડી વડે મારવાને કસ્ટોડિયલ ક્રૂરતા ન ગણવી જોઈએ. અદાલતમાં તિરસ્કારના આરોપનો સામનો કરી રહેલા ચાર પોલીસકર્મીઓએ આ દલીલ કરી છે. ખેડા જિલ્લામાં યુવકોને માર મારવાના કેસમાં બુધવારે સુનાવણી દરમિયાન પોલીસકર્મીઓએ આ દલીલ કરી હતી.

પીડિતોને વળતર ચૂકવવાની શરતે તેમને મુક્ત કરવા અંગે વિચાર કરવા કોર્ટને અપીલ કરી

પોલીસકર્મીઓ વતી હાજર રહેલા વકીલે અદાલતમાં સમક્ષ કહ્યું કે પોલીસકર્મીઓએ 10-15 વર્ષથી સેવા આપી છે. સજાની તેમના રેકોર્ડ પર વિપરીત અસર પડશે. પોલીસ અધિકારી સહિતના આરોપીઓએ પીડિતોને વળતર ચૂકવવાની શરતે તેમને મુક્ત કરવા અંગે વિચાર કરવા કોર્ટને અપીલ કરી હતી.

સ્વીકાર્ય ન હોવા છતાં, કસ્ટોડિયલ ટોર્ચર નથી

પોલીસ અધિકારીએ 11 ઓક્ટોબરના રોજ અદાલતમાં જણાવ્યું હતું કે પીડિતોના નિતંબ પર માર મારવો તે અસ્વીકાર્ય હોવા છતાં, કસ્ટોડિયલ ટોર્ચર સમાન નથી અને તેથી તે તિરસ્કારનો કેસ બનતો નથી. અધિકારીએ એફિડેવિટમાં જણાવ્યું હતું કે, "અરજદારના નિતંબ પર 3-6 વાર લાકડી વડે મારવું... યોગ્ય અને સ્વીકાર્ય ન હોવા છતાં, કસ્ટોડિયલ ટોર્ચર નથી." અન્ય ત્રણ પોલીસકર્મીઓએ પણ આવી જ દલીલો કરી હતી. બધાએ કોર્ટમાં બિનશરતી માફી પણ માંગી હતી.

તિરસ્કારનો કેસ દાખલ કરવામાં આવ્યો

4 ઓક્ટોબર, 2022ના રોજ આરોપી પોલીસકર્મીઓએ ત્રણ યુવકોને થાંભલા સાથે બાંધીને લાકડીઓ વડે માર માર્યો હતો. ગરબા કાર્યક્રમ દરમિયાન પથ્થરમારો કરવા બદલ તેની ધરપકડ કરવામાં આવી હતી. ગયા અઠવાડિયે, કોર્ટે આ પોલીસકર્મીઓ સામે તિરસ્કારના કેસમાં આરોપો ઘડ્યા હતા. તેમની સામે સુપ્રીમ કોર્ટના નિર્દેશોનું ઉલ્લંઘન કરવા બદલ તિરસ્કારનો કેસ દાખલ કરવામાં આવ્યો છે. કોર્ટે તમામ આરોપીઓને પોતાનો પક્ષ રજૂ કરવા જણાવ્યું હતું. કોર્ટે હવે પીડિતો પાસેથી પ્રતિક્રિયા માંગી છે અને આગામી સુનાવણી સોમવારે હાથ ધરવામાં આવશે.

આ પણ વાંચો----INDIA VS PAKISTAN MATCH : લોક રક્ષક થી ASI સુધીના પોલીસ કર્મચારી બંદોબસ્તમાં મોબાઈલ ફોનનો બિનજરૂરી ઉપયોગ કરશે તો થશે શિક્ષાત્મક કાર્યવાહી