IPL 2023 : ઋતુરાજ-કોનવેની શાનદાર ઇનિંગ્સના કારણે CSK પ્લેઓફમાં, DC ને 77 રનથી આપી મ્હાત

ઇન્ડિયન પ્રીમિયર લીગ 2023 ની 67મી મેચ ખૂબ જ રોમાંચક હતી. દિલ્હીના અરુણ જેટલી સ્ટેડિયમમાં રમાયેલી આ મેચમાં ચેન્નાઈ સુપર કિંગ્સે દિલ્હી કેપિટલ્સને 77 રનથી હરાવ્યું હતું. આ સાથે CSK પ્લેઓફમાં ક્વોલિફાય થનારી બીજી ટીમ બની ગઈ છે. ટોસ કેપ્ટન ધોનીએ જીત્યો અને પ્રથમ બેટિંગ કરતા CSKએ ઋતુરાજ ગાયકવાડ (79) અને ડેવોન કોનવે (87)ની શાનદાર ઇનિંગ્સની મદદથી 20 ઓવરમાં 3 વિકેટ ગુમાવીને 223 રનનો મોટો સ્કોર બનાવ્યો હતો. આ પછી દિલ્હી કેપિટલ્સના બેટ્સમેનો માત્ર 146 રન જ બનાવી શક્યા હતા.

પ્રથમ બેટિંગ કરતા ચેન્નાઈ સુપર કિંગ્સના ઓપનર બેટ્સમેનોએ ઉશ્કેરાઈને શોટ મારવાનું શરૂ કર્યું હતું. ડેવોન કોનવે-ઋતુરાજ ગાયકવાડ વચ્ચે પ્રથમ વિકેટ માટે 141 રનની શાનદાર ભાગીદારી થઈ હતી. ઋતુરાજ ગાયકવાડે 3 ચોગ્ગા અને 7 છગ્ગાની મદદથી 50 બોલમાં 79 રન બનાવ્યા હતા. આ પછી બેટિંગ કરવા આવેલા શિવમ દુબેએ સારા શોટ લગાવ્યા હતા, પરંતુ તે 22 રન બનાવીને ખલીલ અહેમદના હાથે કેચ આઉટ થયો હતો. સદી તરફ આગળ વધી રહેલો કોનવે પણ 87 રનના સ્કોર પર આઉટ થયો હતો. આ ઇનિંગમાં તેણે 11 ફોર અને 3 સિક્સર ફટકારી હતી. આ પછી એમએસ ધોની (5) અને રવિન્દ્ર જાડેજા (20) રન બનાવીને અણનમ પરત ફર્યા હતા.

ચેન્નાઈના બેટ્સમેનો સામે દિલ્હીના બોલરો ઘૂંટણીયે પડ્યા

આ મેચમાં દિલ્હી કેપિટલ્સના બોલરોનો જોરદાર પરાજય થયો હતો. ફાસ્ટ બોલર ખલીલ અહેમદે સૌથી વધુ 45 રન આપ્યા હતા. જોકે તેણે એક વિકેટ પણ લીધી હતી. આ સિવાય એનરિક નોરખિયાએ 4 ઓવરમાં 43 રન આપીને 1 વિકેટ લીધી હતી જ્યારે લલિત યાદવે 2 ઓવરમાં કોઈ વિકેટ લીધા વિના 32 રન આપ્યા હતા. ચેતન સાકરિયાને 4 ઓવરમાં 36 રન આપીને 1 વિકેટ મળી હતી, જ્યારે કુલદીપ યાદવ 3 ઓવરમાં 34 રન અને અક્ષર પટેલે 3 ઓવરમાં 32 રન આપ્યા હતા.

ડેવિડ વોર્નરનો સરસ પ્રયાસ

ચેન્નાઈ તરફથી મળેલા 224 રનના લક્ષ્યનો પીછો કરતા દિલ્હી કેપિટલ્સની શરૂઆતથી જ વિકેટો પડવા લાગી હતી. જોકે કેપ્ટન ડેવિડ વોર્નર એક છેડે રહ્યો અને સારી બેટિંગ કરતો રહ્યો. તેના સિવાય ટીમનો કોઈપણ બેટ્સમેન CSK બોલરોનો સામનો કરી શક્યો ન હતો. ડેવિડ વોર્નરે 86 રનની ઇનિંગ રમી હતી. આ દરમિયાન તેના બેટમાંથી 7 ચોગ્ગા અને 5 છગ્ગા નીકળ્યા હતા. આ સિવાય અક્ષર પટેલ (15) અને યશ ધૂલ (13) રન બનાવીને આઉટ થયા હતા. બાકીની ટીમનો કોઈ બેટ્સમેન ડબલ ફિગરને પણ સ્પર્શી શક્યો નહોતો.

ચેન્નઈ તરફથી સારી બોલિંગ

શાનદાર બેટિંગ બાદ ચેન્નાઈ સુપર કિંગ્સના બોલરોએ પણ શાનદાર પ્રદર્શન કર્યું હતું. જોકે જાડેજા મોંઘો સાબિત થયો હતો. તેણે 4 ઓવરમાં 50 રન આપ્યા હતા. દીપક ચહરે 4 ઓવરમાં 22 રન આપીને 3 વિકેટ લીધી હતી જ્યારે મતિશા પથિરાના અને મહેશ તિક્ષણાએ 2-2 વિકેટ લીધી હતી. ઝડપી બોલર તુષાર દેશપાંડે અને રવિન્દ્ર જાડેજાને 1-1 વિકેટ મળી હતી.

આ પણ વાંચો : દિલ્હી સામેની મેચ પહેલા બાપુએ કરી સખત મહેનત, નેટ્સ પર Powerful Shots ફટકાર્યા