Independence Day : 'આવતા વખતે પણ હું ઘ્વજ ફરકાવીશ', PM મોદીના નિવેદન પર વિપક્ષનો પ્રહાર, ખડગે અને લાલુએ કર્યો કટાક્ષ

દેશના 77 માં સ્વતંત્રતા દિવસ પર PM નરેન્દ્ર મોદીએ 10 મી વખત લાલ કિલ્લા પરથી તિરંગો ફરકાવ્યો. PM મોદીએ પોતાના સંબોધનમાં કહ્યું હતું કે તેઓ આગામી વખતે ફરીથી લાલ કિલ્લા પરથી તિરંગો ફરકાવશે. જે બાદ વિપક્ષ PM મોદી પર પ્રહારો કરી રહ્યા છે. વડાપ્રધાનના આ નિવેદન પર કોંગ્રેસ અધ્યક્ષ મલ્લિકાર્જુન ખડગે અને આરજેડી પ્રમુખ લાલુ પ્રસાદ યાદવે નિશાન સાધ્યું છે.

રાષ્ટ્રીય જનતા દળ (RJD)ના પ્રમુખ લાલુ પ્રસાદે મંગળવારે કહ્યું કે વડાપ્રધાન નરેન્દ્ર મોદીએ છેલ્લી વખત દિલ્હીના લાલ કિલ્લા પર તિરંગો ફરકાવ્યો છે. તેમણે કહ્યું, 'હું આ અવસર પર દેશના લોકોને શુભેચ્છા પાઠવું છું અને મહાત્મા ગાંધી, સુભાષ ચંદ્ર બોઝ, મૌલાના અબુલ કલામ આઝાદ અને બાબાસાહેબ ભીમ રાવ આંબેડકર જેવા મહાન લોકોને શ્રદ્ધાંજલિ અર્પણ કરું છું જેમના યોગદાનને દેશ ક્યારેય ભૂલી શકતો નથી.'

પીએમ મોદીના સંબોધન પછી કોંગ્રેસ અધ્યક્ષ મલ્લિકાર્જુન ખડગેએ કહ્યું, 'દરેક માણસ કહે છે કે તે વારંવાર આવશે, પરંતુ હાર અને જીત મતદારોના હાથમાં છે. તેઓ આવતા વર્ષે ધ્વજ ફરકાવવાની વાત કરી રહ્યા છે, આ ઘમંડ છે. તેમણે કટાક્ષ કરતાં કહ્યું, 'તે (વડાપ્રધાન) આવતા વર્ષે ધ્વજ ફરકાવશે, પરંતુ તેમના ઘરે.'

અગાઉ, વડા પ્રધાન નરેન્દ્ર મોદીએ મંગળવારે વિશ્વાસ વ્યક્ત કર્યો હતો કે તેઓ આવતા વર્ષે ફરી એકવાર લાલ કિલ્લા પરથી રાષ્ટ્રને સંબોધિત કરશે અને લોકોને આપેલા વચનોની પ્રગતિ રજૂ કરશે. 77માં સ્વતંત્રતા દિવસના અવસરે લાલ કિલ્લાની પ્રાચી પરથી રાષ્ટ્રને સંબોધતા વડાપ્રધાને કહ્યું કે, “આગામી વખતે 15 ઓગસ્ટે આ લાલ કિલ્લા પરથી હું તમને દેશની ઉપલબ્ધિઓ, તમારી શક્તિ, તમારી શક્તિઓ રજૂ કરવા માંગુ છું. સંકલ્પ, તેમાં થયેલી પ્રગતિ, તેની સફળતા અને ગૌરવ... હું તેને પૂરા આત્મવિશ્વાસ સાથે તમારી સામે રજૂ કરીશ.

આ પણ વાંચો : Haryana Violence : નૂહમાં હિંસા ભડકાવવાના આરોપી બિટ્ટૂ બજરંગીની ફરીદાબાદથી ધરપકડ