Business : ટોપ-20 અમીરોની યાદીમાં ફરી Gautam Adani ની એન્ટ્રી!, શેરમાં તોફાની તેજી...

મંગળવારે ભારતીય અબજોપતિ ગૌતમ અદાણીના શેરમાં થયેલા વધારાની અસર તેમની નેટવર્થ પર પણ જોવા મળી છે. તેમની સંપત્તિમાં એક જ દિવસમાં રૂ. 50,000 કરોડથી વધુનો વધારો થયો છે અને અદાણીએ ફરી એકવાર વિશ્વના ટોચના 20 અબજપતિઓની યાદીમાં જોરદાર વાપસી કરી છે. બ્લૂમબર્ગ બિલિયોનેર્સ ઈન્ડેક્સ અનુસાર, ગૌતમ અદાણીની નેટવર્થ વધીને $66.7 બિલિયન થઈ ગઈ છે અને તે અમીરોની યાદીમાં 19માં સ્થાને આવી ગયા છે.

સૌથી પહેલા, છેલ્લા ટ્રેડિંગ દિવસે મંગળવારે અદાણી ગ્રૂપની કંપનીઓના શેરમાં થયેલા વધારા વિશે વાત કરીએ, તો તમને જણાવી દઈએ કે તેમાં 20 ટકાનો ઉછાળો આવ્યો હતો. અદાણી પાવરથી લઈને અદાણી એન્ટરપ્રાઈઝમાં મજબૂત વૃદ્ધિ જોવા મળી હતી અને શેરના ભાવમાં થયેલા વધારાને કારણે ગ્રૂપના માર્કેટ કેપને પણ અસર થઈ હતી અને તે રૂ. 11 લાખ કરોડની નજીક પહોંચી ગયું હતું. આટલું જ નહીં મંગળવારે અદાણીના રોકાણકારોનો સારો સમય રહ્યો અને તેમની સંપત્તિમાં 1.2 લાખ કરોડ રૂપિયાનો વધારો થયો.

અદાણીની નેટવર્થમાં 6.5 બિલિયન ડોલરનો વધારો થયો છે

અદાણી ગ્રૂપની કંપનીઓના શેરમાં વધારાને કારણે ચેરમેન ગૌતમ અદાણીની નેટવર્થમાં 6.5 બિલિયન ડોલર અથવા લગભગ રૂ. 54,000 કરોડનો વધારો થયો છે. ગૌતમ અદાણીની સંપત્તિમાં આ વધારા પછી, તેમની નેટવર્થ વધીને $66.7 બિલિયન થઈ અને તેઓ 19મા સૌથી અમીર વ્યક્તિ બન્યા. એટલું જ નહીં, એશિયાના સૌથી ધનિકોની યાદીમાં તેમનું કદ પણ વધ્યું છે અને રિલાયન્સના ચેરમેન મુકેશ અંબાણી પછી ગૌતમ અદાણી એશિયાના બીજા સૌથી અમીર બની ગયા છે.

આ વર્ષની શરૂઆતમાં અમેરિકન શોર્ટ સેલર ફર્મ હિંડનબર્ગનો અહેવાલ પ્રકાશિત થયા બાદ મંગળવારે ગૌતમ અદાણીની નેટવર્થમાં થયેલો વધારો એક દિવસનો સૌથી મોટો વધારો છે . નોંધનીય છે કે 24 જાન્યુઆરી, 2023ના રોજ હિંડનબર્ગ રિસર્ચ દ્વારા અદાણી ગ્રૂપ પર એક રિપોર્ટ પ્રકાશિત કરવામાં આવ્યો હતો, જેમાં ગ્રૂપ પર દેવું અને કંપનીઓના શેરના ભાવમાં હેરાફેરી સહિત અનેક ગંભીર આરોપો લગાવવામાં આવ્યા હતા. આ અહેવાલે રોકાણકારોના સેન્ટિમેન્ટ પર એટલી ખરાબ અસર કરી કે વિશ્વના ટોચના 3 અબજોપતિઓમાં સામેલ અદાણી બે મહિનામાં ટોચના 30માંથી બહાર થઈ ગયા. આ સમયગાળા દરમિયાન, અદાણી સ્ટોક્સમાં 85 ટકાનો ઘટાડો થયો હતો અને તેમની નેટવર્થમાં 60 અબજ ડોલરનો ઘટાડો થયો હતો.

ગૌતમ અદાણીની કંપનીઓ પરથી હિંડનબર્ગનો પડછાયો લગભગ દૂર થઈ ગયો છે અને તેનું ઉદાહરણ છે અદાણીની કંપનીઓના શેરમાં તોફાની વધારો. અન્ય અબજોપતિઓની વાત કરીએ તો, એલોન મસ્ક $228 બિલિયનની નેટવર્થ સાથે વિશ્વના નંબર-1 સૌથી ધનિક વ્યક્તિ છે. આ પછી, એમેઝોનના જેફ બેઝોસ $171 બિલિયનની નેટવર્થ સાથે બીજા સ્થાને છે અને ફ્રેન્ચ અબજોપતિ બર્નાર્ડ આર્નોલ્ટ $167 બિલિયનની નેટવર્થ સાથે ત્રીજા સ્થાને છે. ભારતીય અબજોપતિ મુકેશ અંબાણીની કુલ સંપત્તિ 89.5 અબજ ડોલર છે અને તેઓ અમીરોની યાદીમાં 13મા સ્થાને છે.

આ પણ વાંચો : ભારતીય બજારનો ઐતિહાસિક માઈલસ્ટોન, પ્રથમ વખત માર્કેટકેપ 4 ટ્રિલિયન ડોલરને પાર