જયશંકરે પાકિસ્તાનને ઝાટક્યું, કહ્યું, બિલાવલ ભુટ્ટો આતંકવાદ ઉદ્યોગના પ્રમોટર અને પ્રવક્તા

વિદેશ મંત્રી એસ જયશંકરે તેમના પાકિસ્તાની સમકક્ષ બિલાવલ ભુટ્ટો ઝરદારીને "આતંકવાદ ઉદ્યોગના પ્રમોટર અને પ્રવક્તા" ગણાવ્યા છે. ગોવામાં શાંઘાઈ કોઓપરેશન ઓર્ગેનાઈઝેશન (SCO)ના સભ્ય દેશોના વિદેશ મંત્રીઓની બેઠક બાદ જયશંકરની ટિપ્પણી આવી.

એસ જયશંકરે કહ્યું, "ભુટ્ટો ઝરદારી SCO સભ્ય દેશના વિદેશ મંત્રી તરીકે આવ્યા હતા, આ બહુપક્ષીય મુત્સદ્દીગીરીનો એક ભાગ છે અને અમને આનાથી વધુ કંઈ દેખાતું નથી." આતંકવાદ સાથે સામૂહિક રીતે વ્યવહાર કરવાના પાકિસ્તાનના આહ્વાન પર, વિદેશ મંત્રીએ કહ્યું કે, આતંકવાદનો ભોગ બનેલા લોકો આતંકવાદ પર ચર્ચા કરવા તેના ગુનેગારો સાથે બેસતા નથી. તેમણે કહ્યું કે જમ્મુ-કાશ્મીર ભારતનો હિસ્સો હતો, છે અને રહેશે.

ચીન-પાકિસ્તાન ઈકોનોમિક કોરિડોર અંગે વિદેશ મંત્રી એસ જયશંકરે કહ્યું કે, કનેક્ટિવિટી પ્રગતિ માટે સારી છે, પરંતુ તે રાષ્ટ્રોની પ્રાદેશિક અખંડિતતા અને સાર્વભૌમત્વનું ઉલ્લંઘન કરી શકે નહીં.

SCOની બેઠકમાં બંને વિદેશ મંત્રીઓ વચ્ચે કોઈ દ્વિપક્ષીય વાતચીત થઈ ન હતી.

જયશંકરે કહ્યું, "આતંકવાદ પર પાકિસ્તાનની વિશ્વસનીયતા તેના વિદેશી મુદ્રા ભંડાર કરતાં ઝડપથી ઘટી રહી છે." એસ જયશંકરે ભારે આર્થિક સંકટથી ઘેરાયેલા પાકિસ્તાન પર સ્પષ્ટ પ્રહાર કરતા કહ્યું કે તેને લોન મેળવવા માટે ઘર-ઘર ખટખટાવવું પડ્યું છે.એસ જયશંકરે કહ્યું, "હું કહું છું કે તેઓ (પાકિસ્તાન) ને G20 સાથે કોઈ લેવાદેવા નથી. હું એમ પણ કહીશ કે તેમને શ્રીનગર સાથે કોઈ લેવાદેવા નથી. કાશ્મીર જ ચર્ચાનો મુદ્દો છે." તે ક્યારે તેનો ગેરકાયદેસર કબજો દૂર કરશે? પાકિસ્તાન અધિકૃત કાશ્મીર પરથી ક્યારે કબજો હટાવશે

એસ જયશંકરની ટિપ્પણી એવા દિવસે આવી છે જ્યારે જમ્મુ અને કાશ્મીરમાં પૂંચ નજીકના જંગલમાં છુપાયેલા આતંકવાદીઓને શોધવા માટે ચાલી રહેલા ઓપરેશન દરમિયાન પાંચ ભારતીય સેનાના જવાનો શહીદ થયા હતા. ગયા અઠવાડિયે શંકાસ્પદ પાકિસ્તાની આતંકવાદીઓએ આર્મી ટ્રક પર હુમલો કર્યો હતો, જેમાં અન્ય પાંચ સૈનિકો માર્યા ગયા હતા.

ભારતે પોતાની ધરતી પર આતંકવાદને સમર્થન આપવા અને જમ્મુ-કાશ્મીરમાં આતંકવાદીઓને મોકલવામાં પાકિસ્તાનની સક્રિય ભાગીદારીના પુરાવા ઘણી વખત આપ્યા છે. સંયુક્ત રાષ્ટ્ર દ્વારા વૈશ્વિક આતંકવાદી જાહેર કરાયેલા મસૂદ અઝહર, 26/11નો માસ્ટરમાઈન્ડ હાફિઝ સઈદ અને અન્ય ઘણા આતંકવાદીઓ પાકિસ્તાનમાં છે.

પાકિસ્તાનના પૂર્વ વડાપ્રધાન બેનઝીર ભુટ્ટોના પુત્ર બિલાવલ ભુટ્ટો ઝરદારી લગભગ 12 વર્ષમાં ભારતની મુલાકાત લેનારા પાકિસ્તાનના પ્રથમ વિદેશ મંત્રી છે. વર્ષ 2011માં પાકિસ્તાનના તત્કાલીન વિદેશ મંત્રી હિના રબ્બાની ખારે ભારતની મુલાકાત લીધી હતી.

એસસીઓની બેઠકમાં જયશંકરે આતંકવાદ સામે લડવા માટે સંયુક્ત પ્રયાસો કરવાની હાકલ કરી હતી. તેમણે કહ્યું કે આતંકવાદ સામે આંખ આડા કાન કરવું SCO માટે ખરાબ હશે.

આ પણ વાંચો---કિંગ ચાર્લ્સનો આજે રાજ્યાભિષેક, પ્રથમ વખત બૌદ્ધ-હિંદુ ધર્મગુરુઓ પણ સામેલ થશે