Bharat Jodo Nyay Yatra : અખિલેશે કોંગ્રેસનું 'ન્યાયાત્રા'નું આમંત્રણ સ્વીકાર્યું, રાહુલ સાથે રાયબરેલી અથવા અમેઠીમાં કરશે કૂચ

Bharat Jodo Nyay Yatra : સમાજવાદી પાર્ટીના વડા અખિલેશ યાદવે મંગળવારે ઉત્તર પ્રદેશમાં રાહુલ ગાંધીના નેતૃત્વમાં કોંગ્રેસની 'ભારત જોડો ન્યાય યાત્રા' (Bharat Jodo Nyay Yatra)માં સામેલ થવાનું આમંત્રણ સ્વીકાર્યું છે. આ યાત્રા 16 મી ફેબ્રુઆરીના રોજ યુપી પહોંચશે અને તેનું પ્રથમ સ્ટોપ ચંદૌલીના સયાદરાજામાં નેશનલ ઈન્ટર કોલેજ હશે. કોંગ્રેસ અધ્યક્ષ મલ્લિકાર્જુન ખડગેએ યુપીના પૂર્વ મુખ્યમંત્રીને 'ભારત જોડો ન્યાય યાત્રા' (Bharat Jodo Nyay Yatra)માં સામેલ થવા આમંત્રણ આપ્યું હતું. સમાજવાદી પાર્ટીએ કહ્યું કે અખિલેશ યાદવે આમંત્રણ સ્વીકાર્યું છે અને પુષ્ટિ કરી છે કે તેઓ 16 ફેબ્રુઆરીએ ઉત્તર પ્રદેશમાં પ્રવેશ કરશે ત્યારે અમેઠી અથવા રાયબરેલીમાં 'ભારત જોડો ન્યાય યાત્રા'માં જોડાશે.

અખિલેશ યાદવને તેમની ટિપ્પણી બાદ યાત્રામાં સામેલ થવાનું આમંત્રણ મળ્યું જેમાં તેમણે દાવો કર્યો હતો કે તેમની પાર્ટીને રાહુલ ગાંધીની 'ભારત જોડો ન્યાય યાત્રા' (Bharat Jodo Nyay Yatra) માટે આમંત્રણ આપવામાં આવ્યું નથી. 4 ફેબ્રુઆરીએ પત્રકારો સાથે વાત કરતા સપાના વડાએ કહ્યું હતું કે, 'ઘણા મોટા કાર્યક્રમોનું આયોજન કરવામાં આવે છે, પરંતુ અમને આમંત્રણ આપવામાં આવતું નથી'. અખિલેશની ટિપ્પણીનો જવાબ આપતા કોંગ્રેસના વરિષ્ઠ નેતા જયરામ રમેશે કહ્યું હતું કે પાર્ટી ગઠબંધનના સભ્યોને યાત્રા માટે આવકારવા તૈયાર છે, પરંતુ યુપીમાં તેનો અંતિમ કાર્યક્રમ હજુ નક્કી થયો નથી.

આ યાત્રા 6700 કિલોમીટરથી વધુનું અંતર કાપશે

'ભારત જોડો ન્યાય યાત્રા' (Bharat Jodo Nyay Yatra) અગાઉ રવિવારે ઝારખંડના ધનબાદ જિલ્લામાંથી પસાર થઈ હતી. મંગળવારે ઝારખંડથી સુંદરગઢ જિલ્લાના ઔદ્યોગિક શહેર બિરમિત્રપુરમાં પ્રવેશ કરીને યાત્રા ઓડિશા પહોંચી હતી. બુધવારે, ગાંધી તેમની યાત્રા ફરી શરૂ કરશે અને રાઉરકેલા શહેરના ઉદિતનગરથી પનપોશ ચક સુધી 3.4 કિલોમીટર લાંબી કૂચ કરશે. ભારત જોડો ન્યાય યાત્રા (Bharat Jodo Nyay Yatra) 14 જાન્યુઆરીએ મણિપુરના થોબલથી શરૂ થઈ હતી, જે 67 દિવસ સુધી ચાલશે. આ સમયગાળા દરમિયાન, આ યાત્રા 6700 કિલોમીટરથી વધુનું અંતર કાપશે અને 15 રાજ્યોના 110 જિલ્લામાંથી પસાર થશે. જેનું સમાપન 20 માર્ચે મુંબઈમાં થશે.

રાહુલ ગાંધીએ કન્યાકુમારીથી ભારત જોડો યાત્રા શરૂ કરી

કોંગ્રેસની 'ભારત જોડો ન્યાય યાત્રા' (Bharat Jodo Nyay Yatra) આગામી લોકસભા ચૂંટણી પહેલા 100 લોકસભા બેઠકો અને 337 વિધાનસભા મતવિસ્તારોમાંથી પસાર થશે. આ 'ભારત જોડો યાત્રા'નો આગળનો તબક્કો છે. તમને જણાવી દઈએ કે રાહુલ ગાંધીએ 7 સપ્ટેમ્બર 2022 ના રોજ તમિલનાડુના કન્યાકુમારીથી ભારત જોડો યાત્રા શરૂ કરી હતી અને તે 30 જાન્યુઆરી 2023 ના રોજ જમ્મુ-કાશ્મીરના શ્રીનગરમાં સમાપ્ત થઈ હતી. આ સમયગાળા દરમિયાન તેણે 150 દિવસમાં 3500 કિલોમીટરથી વધુનું અંતર કાપ્યું હતું. ભારત જોડો યાત્રા દેશના 12 રાજ્યો અને બે કેન્દ્રશાસિત પ્રદેશોમાંથી પસાર થઈ.

આ પણ વાંચો : ED Raid : હરક સિંહના ઘરે ED ના દરોડા, ઉત્તરાખંડથી દિલ્હી સુધીના 15 થી વધુ સ્થળો પર Raid