JK Electionમાં આતંકીઓનો નાપાક મનસૂબો..આર્મીને મળ્યો....

• જમ્મુ કાશ્મીરમાં યોજાનારી વિધાનસભાની ચૂંટણી પૂર્વે આતંકવાદીઓના નાપાક મનસૂબાને સુરક્ષાદળોએ ધ્વસ્ત કરી દીધો
• સર્ચ દરમિયાન, હથિયારો, દારૂગોળો અને વિસ્ફોટક સામગ્રીનો વિશાળ જથ્થો મળી આવ્યો
• એકે 47 કારતૂસ, હેન્ડ ગ્રેનેડ, IED બનાવવામાં ઉપયોગમાં લેવાતી સામગ્રી મળી
• જમ્મુ-કાશ્મીરમાં યોજાનારી વિધાનસભાની ચૂંટણીમાં ખલેલ પહોંચાડવાનો ઇરાદો

JK Election : જમ્મુ કાશ્મીરમાં યોજાનારી વિધાનસભાની ચૂંટણી (JK Election)પૂર્વે આતંકવાદીઓના નાપાક મનસૂબાને સુરક્ષાદળોએ ધ્વસ્ત કરી દીધો છે. સુરક્ષા દળોએ બુધવારે જમ્મુ એજન્સી દ્વારા સૂચના મળ્યા બાદ ભારતીય સેનાએ આ ઓપરેશન હાથ ધર્યું હતું. એવું માનવામાં આવે છે કે આ હથિયારો આતંકવાદીઓના આકાઓએ છુપાવ્યા હતા જેથી પાકિસ્તાનના ઈશારે જમ્મુ-કાશ્મીરમાં યોજાનારી વિધાનસભાની ચૂંટણીમાં ખલેલ પહોંચાડી શકાય અને આતંકવાદીઓની મદદથી વિસ્તારમાં ભયનો માહોલ ફેલાય.

સુરક્ષા દળો માટે મોટી ઉપલબ્ધિ

ભારતીય સેનાના શ્રીનગર સ્થિત ચિનાર કોર્પ્સે સોશિયલ મીડિયા પ્લેટફોર્મ 'X' પર એક પોસ્ટમાં જણાવ્યું હતું કે ચોક્કસ ગુપ્ત માહિતીના આધારે, કુપવાડાના કેરન સેક્ટરમાં સેના અને જમ્મુ-કાશ્મીર પોલીસ દ્વારા સંયુક્ત ઓપરેશન હાથ ધરવામાં આવ્યું હતું. તેમાં કહેવામાં આવ્યું છે કે વિસ્તારમાં સર્ચ દરમિયાન, હથિયારો, દારૂગોળો અને વિસ્ફોટક સામગ્રીનો વિશાળ જથ્થો મળી આવ્યો હતો, જેમાં એકે 47 કારતૂસ, હેન્ડ ગ્રેનેડ, IED બનાવવામાં ઉપયોગમાં લેવાતી સામગ્રી અને અન્ય વસ્તુઓનો સમાવેશ થાય છે. સેનાએ કહ્યું કે વર્તમાન સુરક્ષા સ્થિતિ અને આગામી ઘટનાઓને ધ્યાનમાં રાખીને આ પુનઃપ્રાપ્તિ મહત્વપૂર્ણ છે અને સુરક્ષા દળો માટે એક મોટી ઉપલબ્ધિ છે.

આ પણ વાંચો---Jammu and Kashmir : વિધાનસભા ચૂંટણી પૂર્વે કઠુઆમાં મોટું ઓપરેશન, 3 આતંકીઓને સુરક્ષાદળોએ કર્યા ઠાર

બુધવારે 2 આતંકીઓના મૃતદેહ મળી આવ્યા હતા

જણાવી દઈએ કે જમ્મુ અને કાશ્મીરના ઉધમપુર જિલ્લાના બસંતગઢના ઉપરના વિસ્તારોમાં એન્કાઉન્ટરમાં જૈશ-એ-મોહમ્મદના બે આતંકવાદીઓ માર્યા ગયા હતા. અધિકારીઓએ બુધવારે કહ્યું હતું કે ઘટના સ્થળેથી બે આતંકવાદીઓના મૃતદેહ મળી આવ્યા છે, જેઓ પાકિસ્તાનના હોવાનું માનવામાં આવે છે. વધુમાં, સ્થળ પરથી એક એમ-4 કાર્બાઈન, એક એકે રાઈફલ, એક પિસ્તોલ અને મોટી માત્રામાં દારૂગોળો અને ખાદ્યપદાર્થો મળી આવ્યા છે, એમ તેમણે જણાવ્યું હતું. ગાઢ જંગલમાં આતંકવાદીઓ વિરુદ્ધ આ પહેલું સફળ ઓપરેશન છે, જ્યાં છેલ્લા 6 મહિનામાં 6થી વધુ એન્કાઉન્ટર થયા છે. 28 એપ્રિલના રોજ એક અથડામણમાં એક ગ્રામ રક્ષા રક્ષકે જીવ ગુમાવ્યો હતો અને 19 ઓગસ્ટના રોજ સીઆરપીએફના એક ઈન્સ્પેક્ટરે જીવ ગુમાવ્યો હતો.

આ પણ વાંચો---Jammu and Kashmir: સવાર સવારમાં થથરી ઉઠી સ્વર્ગની ધરતી...