પહેલી પત્નિને મળવા જવાનું કહેતા બીજી પત્નિએ પતિને માર માર્યો, સારવાર દરમિયાન પતિનું મોત

લિંબાયત રાવનગર ખાતે રહેતા અકીલ મણીયારના લગ્ન શબનમ નામની મહિલા સાથે થયા હતા. જ્યારે અકીલના પહેલા લગ્ન શબાના નામની મહિલા સાથે થયા હતા અને તેનાથી તેને બે બાળકો પણ હતા. ગત તા. 29મી નવેમ્બરના રોજ અકીલ કામ ઉપર ગયો ન હતો. શબનમે આવીને અકીલને પુછતા તેને કહ્યું કે, આજે હું શબાના અને બાળકોને મળવા જવાનો છું. આ સાંભળીને જ શબનમ ઉશ્કેરાઇ ગઇ હતી અને અકીલને કહ્યું કે, “તેરેકો મના કિયા હૈ ના, તેરી ઔરત શબાના કે ઘર જાને કે લીયે” તેમ કહીને અકીલને મારવા લાગી હતી.

પ્રથમ તેણે ઘરમાં શાકભાજી કાપવાનું ચપ્પુ લઈ ને તેના પતિ અકિલના હાથ અને પગમાં ઇજા પહોંચાડી હતી. આ મારામારીમાં અકીલના ઘરે થોડા દિવસ પહેલા જ રહેવા આવેલો સાદીક વચ્ચે પડ્યો હતો, ત્યારે શબનમે સાદિકને પણ મારવાનું કહ્યું હતું અને ઝપાઝપીમાં સાદિકને હાથમાં ઇજા થઇ હતી. આ મારામારી બાદ સાદીક ભાગી ગયો હતો અને પાછળથી શબનમ તેના પતિ અકીલને લાકડાના ફટકા વડે પગના ભાગે માર મારવા લાગી હતી. જેને લઇ પતિને ગંભીર ઇજાઓ પહોંચી હતી.

ઇજા થતાં અકિલ ઘરમાં જ ઢળી પડ્યો હતો. જેથી પત્ની શબનમ જાતે જ તેને સારવાર માટે હોસ્પિટલ લઈ ગઈ હતી. જ્યાં પતિનું સારવાર દરમિયાન મોત નીપજ્યુ હતું. જેને લઇ ઘટના અંગે લિંબાયત પોલીસે શબનમની સામે સપરાધ મનુષ્યવધનો ગુનો નોંધી તપાસ શરૂ કરી હતી. પોલીસે હાલ પત્ની શબનમ ની ધરપકડ કરી વધુ તપાસ હાથ ધરી છે.

આ પણ વાંચો - સગ્ગા માસાએ ભાણેજ સાથે અડપલાં કર્યાં, પોલીસ ફરિયાદ નોંધાઈ