સુરતમાં વિધાનસભા ચૂંટણીને લઈ તંત્ર એલર્ટ, રૂપિયાની હેરાફેરી ઉપર નજર રાખવા વાહનોની સઘન ચકાસણી શરૂ

રાજ્યમાં વિધાનસભાની ચૂંટણી (Gujarat Assembly Election) ના સમાચાર (News) મળતા જ તંત્ર પણ પોતાની કામગીરીમાં વ્યસ્ત થઇ રહ્યું છે. સુરતમાં પણ હવે ચૂંટણીનો માહોલ જામ્યો હોય એવું લાગી રહ્યું છે.વિધાનસભા ચૂંટણીને લઈ તંત્રએ કામગીરી તેજ કરી છે. સુરતમાં ચૂંટણીને લઈને આચારસંહિતાનો કડક અમલ શરૂ કરવામાં આવ્યો છે. સુરત કલેક્ટર દ્વારા રૂપિયાની હેરાફેરી ઉપર સતત નજર રાખવામાં આવી રહી છે. શહેરમાં પ્રવેશ કરતા વાહનોની પણ સઘન ચકાસણી કરાઈ રહી છે. આચારસંહિતાનો ભંગ ના થાય એનું ખાસ ધ્યાન રાખવા તમામને સૂચના અપાઇ છે.

ચૂંટણી પંચ દ્વારા ગુજરાત વિધાનસભાની ચૂંટણી 2022 (Gujarat Assembly Election 2022) જાહેર કરવામાં આવી છે. ગુજરાતમાં બે તબક્કામાં મતદાન કરવાની પણ તમામ વ્યવસ્થા ગોઠવવામાં આવી છે. ત્યારે સુરતમાં પણ આચારસંહિતાનો અમલ શરૂ થઈ ગયો છે. આ અંગે ચૂંટણી અધિકારી એન એ પુનીવાલાએ જણાવ્યું હતું કે, ચૂંટણીને લઈને સ્ટેટીક સર્વે ટીમ એલર્ટ થઈ છે, ચૂંટણી લક્ષી રોકડ વ્યવહારને રોકવા માટે શહેરમાં ચેકિંગ હાથ ધરવા જિલ્લા વહીવટી તંત્ર દ્વારા આદેશ કરાયા છે. સુરતના વરાછા, સારોલી અને જહાંગીપુરા સહિતના વિસ્તારમાં સ્ટેટીક સર્વેલન્સ ટીમ દ્વારા ચેકિંગ હાથ ધરવામાં આવી રહ્યું છે. પૈસાની હેરાફેરી અથવા દારૂ શહેરમાં ન પ્રવેશે તે માટે આ ટીમ દ્વારા પોલીસની ટીમને સાથે રાખીને તમામ ફોરવ્હીલર કારોને રોકીને તેનું ચેકિંગ સાથે જ ચેકિંગનું વિડીયો રેકોર્ડિંગ પણ કરવામાં આવી રહ્યું છે.

ચૂંટણી તારીખો જાહેર થયા બાદ ધીરે ધીરે ઉમેદવારોના નામ પણ જાહેર થવાના શરૂ થઈ ગયા છે. ઉમેદવાર દ્વારા રૂપિયા ખર્ચવામાં આવે છે. તેના ઉપર પણ વહીવટી તંત્ર વિશેષ નજર રાખતી હોય છે. વાહનોમાં મોટી માત્રામાં રોકડ રૂપિયાની હેરાફેરી ન થાય તેના માટે ખાસ ધ્યાન રાખવામાં આવી રહ્યું છે. સરકારે નિયત કરેલી રકમ કરતાં વધુ રૂપિયા ચૂંટણી પ્રચાર માટે ખર્ચવાનો પ્રયાસ ઉમેદવારો દ્વારા થતો હોય છે. પરિણામે રોકડ રકમ એક વિસ્તારમાંથી બીજા વિસ્તારમાં લઈ જવા માટે પણ પ્રયાસો કરવામાં આવતા હોય છે. તેને રોકવા માટે જિલ્લા વહીટીતંત્રની ટીમ કામે લાગી છે.

આ પણ વાંચો - સુરતમાં માથાભારે લાલુ જાલીમ ઉપર પોલીસે સકંજો કસ્યો, ફોર્ચ્યુનર અને i20 કાર કબ્જે લીધી