શંકાશીલ પૂર્વ પતિએ ક્રાઇમ પેટ્રોલ જોઇ પત્નીને આપ્યું HIVનું ઇન્જેકશન, વાંચો ચોંકાવનારો બનાવ

સુરત (Surat) શહેરના મુગલીસરા વિસ્તારમાં રહેતી બે સંતાનની માતા સાથે છુટાછેડા લીધા બાદ વાતચીત કરવાના બહાને ફરવા બોલાવી હેવાન અને શંકાશીલ પૂર્વ પતિએ એચઆઇવી પોઝીટીવ લોહી વાળું ઇન્જેકશન આપી મારવાની પોલીસ (Police) સમક્ષ કબૂલાત કરી છે. રાંદેર પોલીસે શંકાશીલ પૂર્વ પતિને કોર્ટમાં રજૂ કરી બે દિવસના રિમાન્ડ મેળવ્યા છે. જયારે હેવાન પતિ એ પોલીસ પ્રાથમિક પૂછપરછમાં કેટલાક ચોકવનારી હકીકતો જણાવી છે જેમાં  ક્રાઇમ પેટ્રોલ સિરીયલમાં છ મહિના અગાઉ જોયેલા એપિસોડ પરથી દુષ્પ્રેરિત થઇ ઘટનાને અંજામ આપ્યાની પૂર્વ પતિએ કબૂલાત કરી છે.

મુગલીસરા વિસ્તારમાં મસક્ર એપાર્ટમેન્ટમાં રહેતી યાસ્મીન અમીમુદ્દીન સેરઅલી સૈયદના બે મહિના અગાઉ શંકર સાથે છુટાછેડા થયા હતા, પરંતુ તેના પૂર્વ પતિ શંકર મોહન કામળે તેને વાતોમાં લઇ તારી સાથે ફરી લગ્ન કરવા છે એમ કહી વાતચીત કરવાના બહાને ફરવા લઇ ગયા બાદ અંધારાનો ગેરલાભ લઇ એચઆઇવી પોઝીટીવ લોહી વાળું ઇન્જેક્શન આપી હેવાનીયત આચરી હતી. 

આ ઘટનામાં પોલીસે શંકર કામળેને કોર્ટમાં રજૂ કર્યો હતો.આ અંગે સરકારી વકીલ મનિષ રાણપરાએ જણાવ્યું હતું કે એચઆઇવી પોઝીટીવ વાળું ઇન્જેકશન આરોપી કયાંથી લાવ્યો હતો, ઇન્જેક્શન આપવામાં કોઇ એ મદદ કરી સાથે જ અન્ય કોઇની મદદ લીધી હતી કે નહીં વગેરે બાબતોની તપાસ કરવા માટે ત્રણ દિવસના રિમાન્ડની માંગણી કરી હતી. પરંતુ કોર્ટ દ્વારા બે દિવસના રિમાન્ડ મંજૂર કરવામાં આવ્યા હતા.હાલમાં પોલીસ દ્વારા નાનપુરાની લેબ અને શંકરને એચઆઇવી પોઝીટીવ લોહી આપનારની તપાસ હાથ ધરી છે.

પોલીસના જણાવ્યા પ્રમાણે ટીવી પર આવતી ક્રાઇમ પેટ્રોલ સિરીયલ જોવાનો શોખીન શંકરે છ મહિના અગાઉ એક એપીસોડ જોયો હતો. જેમાં પત્નીને મારવા માટે પતિ દ્વારા અલગ-અલગ બિમાર પ્રાણીઓના લોહીના ઇન્જેકેશન આપી પત્નીની હત્યા કરી હતી.જેથી આ એપીસોડ પરથી દુષ્પ્રેરીત થઇ છુટાછેડા લેનાર યાસ્મીન અને તેની સાથે સંબંધ ધરાવનારને મોતને ઘાટ ઉતારવા એચઆઇવી પોઝીટીવ વાળું ઇન્જેક્શન આપ્યાની કબૂલાત કરી છે. જો કે હજુ લોહીનો રિપોર્ટ આવવાનો બાકી હોવાથી આરોપી શંકર ના બે દિવસના રિમાન્ડ મંજૂર કરવામાં આવ્યા છે.

આ પણ વાંચો--સુરતના સરથાણા પ્રાણી સંગ્રહાલયમાં પાંજરામાં મુકાયા હિટર