હરમનપ્રીત કૌરને ICCએ આપ્યું મોટું ઈનામ, આ એવોર્ડ જીતનારી પ્રથમ ભારતીય મહિલા ખેલાડી બની

ભારતીય મહિલા ટીમ (Indian Women's Team)ની કેપ્ટન હરમનપ્રીત કૌર (Harmanpreet Kaur)ને ICC દ્વારા એક મોટું સન્માન આપવામાં આવ્યું છે. જીહા, સપ્ટેમ્બર મહિના માટે ICC ક્રિકેટર ઓફ ધ મંથ એવોર્ડ (ICC Cricketer of the Month Award)ની જાહેરાત કરવામાં આવી છે. જેમાં ભારતની હરમનપ્રીત કૌરને મહિલા ખેલાડીઓમાં સપ્ટેમ્બરની સર્વશ્રેષ્ઠ ખેલાડી તરીકે જ્યારે પાકિસ્તાનના વિકેટ કીપર બેટ્સમેન મોહમ્મદ રિઝવાનને સપ્ટેમ્બરના સર્વશ્રેષ્ઠ પુરૂષ ખેલાડી જાહેર કરવામાં આવ્યા છે.

ભારતીય મહિલા ક્રિકેટ ટીમની સુકાની હરમનપ્રીત કૌરને સોમવારે સપ્ટેમ્બર 2022 માટે ICC મહિલા પ્લેયર ઓફ ધ મંથનો એવોર્ડ એનાયત કરવામાં આવ્યો છે. હરમનપ્રીત કૌરે આ એવોર્ડ મેળવવા માટે સાથી ખેલાડી સ્મૃતિ મંધાના અને બાંગ્લાદેશની કેપ્ટન નિગાર સુલતાનાને પાછળ છોડી દીધી છે. હરમનપ્રીતે તાજેતરમાં ઈંગ્લેન્ડમાં શાનદાર પ્રદર્શન કર્યું હતું અને ઐતિહાસિક જીતમાં મેચ વિનિંગ ઇનિંગ રમી હતી. તેણીએ સપ્ટેમ્બરમાં ઈંગ્લેન્ડમાં વનડે શ્રેણીમાં 221ની સરેરાશ અને 103.27ના સ્ટ્રાઈક રેટથી 221 રન બનાવ્યા હતા અને તે ટૂર્નામેન્ટની સૌથી વધુ રન બનાવનારી ખેલાડી બની હતી. હરમનપ્રીતે પ્રથમ વનડેમાં 74 રનની અણનમ ઈનિંગ રમી હતી અને બીજી વનડેમાં 111 બોલમાં 143 રનની અણનમ ઈનિંગ રમી હતી. તેમની કપ્તાનીમાં ભારતીય ટીમે ઈંગ્લેન્ડમાં પ્રથમ વખત ક્લીન સ્વીપ કરીને ઈતિહાસ રચ્યો હતો. 1999 પછી ઈંગ્લેન્ડમાં ભારતીય મહિલા ટીમની આ પ્રથમ શ્રેણી જીત હતી. 

હરમનપ્રીતે એવોર્ડ જીત્યા બાદ કહ્યું, “એવોર્ડ માટે નોમિનેટ થવું ખૂબ જ સરસ હતું અને તે જીતવું એ એક અદ્ભુત લાગણી છે. સ્મૃતિ અને નિગાર સાથે વિજેતા તરીકે નામાંકિત થવું ખૂબ જ વિનમ્ર છે.” તેણે કહ્યું કે, મેં હંમેશા મારા દેશનું પ્રતિનિધિત્વ કરવામાં ખૂબ જ ગર્વ અનુભવ્યો છે અને ઈંગ્લેન્ડમાં ઐતિહાસિક વનડે શ્રેણી જીતવી મારી કારકિર્દીની ઐતિહાસિક ક્ષણ હશે.

આ પણ વાંચો - જો જીતા વોહી સિકંદર! આજે રમાશે ભારત-દ.આફ્રિકા વચ્ચે સિરીઝની અંતિમ અને નિર્ણાયક મેચ