વનડે વર્લ્ડ કપ પહેલા જ ટીમ ઈન્ડિયાના બેટ્સમેનોની પોલ ખુલી, બાંગ્લાદેશ સામે ધબડકો

ભારત અને બાંગ્લાદેશ (India vs Bangladesh) વચ્ચે આજથી ત્રણ મેચની વનડે સિરીઝનો પ્રારંભ થયો છે. પ્રથમ વનડે ઢાકાના શેર-એ-બાંગ્લા (Sher-e-Bangla) સ્ટેડિયમમાં રમાઈ રહી છે. સાત વર્ષ બાદ બંને ટીમો ODI મેચમાં આમને-સામને છે. 2015માં રમાયેલી છેલ્લી શ્રેણીમાં ભારત 2-1થી હારી ગયું હતું. વળી આજે પણ કઇંક એવી જ પરિસ્થિતિનું નિર્માણ થઇ રહ્યું હોય તેવા સમાચાર મળી રહ્યા છે. 

મેહદી હસને શિખર ધવનને 7 રનના અંગત સ્કોર પર આઉટ કરીને ટીમ ઈન્ડિયાને પ્રથમ વિકેટ ઝટકો આપ્યો હતો. પ્રથમ પાવરપ્લેમાં ભારતે 1 વિકેટના નુકસાને 48 રન બનાવ્યા હતા. ભારતને બીજો ઝટકો રોહિત શર્માના રૂપમાં લાગ્યો હતો. શાકિબ અલ હસને તેને 27ના અંગત સ્કોર પર પેવેલિયનનો રસ્તો બતાવ્યો હતો. 11મી ઓવરમાં જ શાકિબે રોહિત બાદ કોહલીને આઉટ કર્યો હતો. કોહલીએ 9 રન બનાવ્યા હતા. શ્રેયસ અય્યર અને કેએલ રાહુલે ચોથી વિકેટ માટે 43 રનની ભાગીદારી કરી હતી. આ ભાગીદારી 20મી ઓવરમાં અબદોત હુસૈને 24ના અંગત સ્કોર પર ઐયરને આઉટ કરીને તોડી હતી. ભારતના 100 રન 23 ઓવરમાં પૂરા થયા હતા. કેએલ રાહુલ અને વોશિંગ્ટન સુંદર વચ્ચે 5મી વિકેટ માટે અડધી સદીની ભાગીદારી પૂર્ણ થઈ હતી. શાકિબ અલ હસને 33મી ઓવરમાં વોશિંગ્ટન સુંદરને આઉટ કરીને ભારતને પાંચમો ઝટકો આપ્યો હતો. સુંદર 43 બોલમાં 19 રન બનાવીને પેવેલિયન પરત ફર્યો હતો. ભારતને છઠ્ઠો ફટકો 153ના સ્કોર પર શાહબાઝ અહેમદના રૂપમાં લાગ્યો હતો જે ખાતું ખોલાવ્યા વિના પેવેલિયન પરત ફર્યો હતો. ભારતની 7મી વિકેટ શાર્દુલ ઠાકુરના રૂપમાં પડી, જે 2ના અંગત સ્કોર પર શાકિબ અલ હસનના હાથે બોલ્ડ થયો. 35મી ઓવરમાં જ શાર્દુલ બાદ શાકિબે દીપક ચહરને આઉટ કરીને પોતાનો પંજો ખોલ્યો હતો. શાકિબ શાનદાર બોલિંગ કરી રહ્યો હતો. ભારતને 9મો ફટકો કેએલ રાહુલના રૂપમાં લાગ્યો હતો, જે 73 રનની શાનદાર ઇનિંગ રમીને આઉટ થયો હતો. ભારતે તેની 9મી વિકેટ 178 રનમાં ગુમાવી હતી. ભારત 186 રનમાં ઓલઆઉટ થઈ ગયું હતું, છેલ્લી વિકેટ સિરાજની હતી.

આ મેચમાં ભારતની બેટિંગ સંપૂર્ણપણે ફ્લોપ રહી હતી અને આખી ટીમ 41.2 ઓવરમાં 186 રનમાં ઓલઆઉટ થઈ ગઈ હતી. ટીમ તરફથી કેએલ રાહુલે સૌથી વધુ 73 રન બનાવ્યા હતા. વળી, રોહિત શર્માએ 27 અને શ્રેયસ અય્યરે 24 રન બનાવ્યા હતા. બાંગ્લાદેશ તરફથી શાકિબ અલ હસને સૌથી વધુ પાંચ વિકેટ લીધી હતી. બીજી તરફ ઇબાદત હુસૈનને ચાર સફળતા મળી હતી. મહત્વનું છે કે, શેરે બાંગ્લા નેશનલ સ્ટેડિયમમાં રમાયેલી આ મેચમાં ભારતે કુલદીપ સેનને ડેબ્યૂની તક આપી છે, જ્યારે રોહિત શર્માએ આજે ​​ચાર ઓલરાઉન્ડર રમ્યા છે. જ્યારે રિષભ પંતને BCCIની મેડિકલ ટીમ સાથે પરામર્શ કર્યા બાદ ODI ટીમમાંથી બહાર કરવામાં આવ્યો છે, વળી અક્ષર પટેલ પ્રથમ ODI માટે પસંદગી માટે ઉપલબ્ધ નહોતો. 

ઉલ્લેખનીય છે કે, ભારતનો બાંગ્લાદેશ પ્રવાસ આજથી એટલે કે 4 ડિસેમ્બરે ઢાકામાં રમાનારી પ્રથમ વનડેથી શરૂ થયો છે. આ પછી, શ્રેણીની બીજી મેચ 7 ડિસેમ્બરે આ જ મેદાન પર રમાશે, જ્યારે છેલ્લી મેચ 10 ડિસેમ્બરે ચટ્ટોગ્રામમાં રમાશે. વનડે શ્રેણી બાદ ભારતે બે ટેસ્ટ મેચોની ટેસ્ટ શ્રેણી પણ રમવાની છે. આ ટેસ્ટ શ્રેણી વર્લ્ડ ટેસ્ટ ચેમ્પિયનશિપનો એક ભાગ છે. શ્રેણીની પ્રથમ મેચ ચટ્ટોગ્રામમાં 14 ડિસેમ્બરે રમાશે, જ્યારે પ્રવાસનો અંત 22 ડિસેમ્બરથી ઢાકામાં રમાનારી છેલ્લી ટેસ્ટ મેચ સાથે થશે.

આ પણ વાંચો - ઋતુરાજ ગાયકવાડની ટીમ ઈન્ડિયામાં જગ્યા પાક્કી! ચાલુ ટૂર્નામેન્ટમાં ફટકારી ચોથી સદી