PCB New Coach : ભારતને વર્લ્ડ કપ જીતાડનાર આ પૂર્વ ખેલાડી બન્યો પાકિસ્તાને હેડ કોચ

PCB New Coach: T20 વર્લ્ડ કપ 2024 પહેલા પાકિસ્તાની ક્રિકેટ ટીમમાં (Pakistan Cricket Team) ચોંકાવનારા ફેરફારો થયા છે. પાકિસ્તાન ક્રિકેટ બોર્ડ (PCB) એ તેના કોચિંગ સ્ટાફમાં ફેરફાર કર્યા છે. ટીમે બે એવા લોકોને પોતાના કોચ (PCB New Coach)તરીકે નિયુક્ત કર્યા છે, જેઓ કોઈને કોઈ સ્વરૂપે વર્લ્ડ કપ વિજેતા ટીમનો હિસ્સો રહ્યા છે. હવે પાકિસ્તાની ટીમને સફેદ બોલ અને લાલ બોલની ક્રિકેટમાં અલગ-અલગ કોચ હશે. PCBએ દક્ષિણ આફ્રિકાના ગેરી કર્સ્ટનને (Gary Kirsten)મર્યાદિત ઓવરના ફોર્મેટ માટે કોચ તરીકે અને ઓસ્ટ્રેલિયાના ભૂતપૂર્વ ફાસ્ટ બોલર જેસન ગિલેસ્પીને ટેસ્ટ ફોર્મેટ માટે કોચ તરીકે નિયુક્ત કર્યા છે. તમને યાદ અપાવી દઈએ કે ગેરી કર્સ્ટન એ જ કોચ છે જેમના નેતૃત્વમાં ભારતીય ટીમ 2011 ODI વર્લ્ડ કપ વિજેતા બની હતી.

ર્સ્ટનને આઈપીએલમાં કોચિંગનો અનુભવ પણ છે

ગેરી કર્સ્ટન આંતરરાષ્ટ્રીય ક્રિકેટમાં ભારત અને દક્ષિણ આફ્રિકાની રાષ્ટ્રીય ટીમના કોચ રહી ચૂક્યા છે. આ સિવાય તેને ઈન્ડિયન પ્રીમિયર લીગમાં ટ્રેનિંગનો પણ ઘણો અનુભવ છે. તે 2018 માં રોયલ ચેલેન્જર્સ બેંગ્લોરનો બેટિંગ કોચ હતો, પરંતુ બીજા જ વર્ષે તેને RCBનો મુખ્ય કોચ બનાવવામાં આવ્યો હતો. પરંતુ 2 વર્ષનો વિરામ લીધા બાદ તે 2022માં ગુજરાત ટાઇટન્સમાં બેટિંગ કોચ અને મેન્ટર તરીકે જોડાયો અને તે જ સિઝનમાં ગુજરાતની ટીમ IPL ચેમ્પિયન બની. કર્સ્ટન હજુ પણ આ ટીમનો અભિન્ન ભાગ છે.

ગેરી કર્સ્ટનની ઇન્ટરનેશનલ કરિયર

ડાબા હાથના ઓપનિંગ બેટ્સમેન ગેરી કર્સ્ટને દક્ષિણ આફ્રિકા માટે 101 ટેસ્ટ મેચ રમી હતી, જેમાં તેણે 45.27ની સરેરાશથી 7289 રન બનાવ્યા હતા. આ સમયગાળા દરમિયાન તેનો સર્વોચ્ચ સ્કોર 275 હતો. પોતાની ટેસ્ટ કારકિર્દીમાં ગેરીએ 21 સદી અને 34 અડધી સદી ફટકારી હતી. વન ડે ઈન્ટરનેશનલમાં પણ ગેરી પાસે કોઈ જવાબ નહોતો. ગેરી કર્સ્ટને 185 વન-ડે ઈન્ટરનેશનલ મેચ રમી અને 6798 રન બનાવ્યા, જેમાં 13 સદી અને 45 અડધી સદી સામેલ છે. વન-ડે ઈન્ટરનેશનલમાં ગેરી કર્સ્ટનનો સર્વશ્રેષ્ઠ સ્કોર અણનમ 188 રન હતો, જે તેણે 1999ના વર્લ્ડ કપમાં યુએઈ સામે બનાવ્યો હતો. ગેરી કર્સ્ટન પણ એક શાનદાર ફિલ્ડર હતા અને મેદાન પર તેમની ચપળતા અજોડ હતી. એકવાર ગેરી કર્સ્ટને સચિન તેંડુલકરનો એવો કેચ લીધો હતો જે આજે પણ ચાહકોના મનમાં રહેશે. કર્સ્ટને 1996માં ડરબનમાં રમાયેલી ટેસ્ટ મેચમાં ભારતની બીજી ઇનિંગમાં શોન પોલોકના બોલ પર આ કેચ લીધો હતો. કર્સ્ટનના આ કેચને ટેસ્ટ ક્રિકેટના સર્વશ્રેષ્ઠ કેચમાં ગણવામાં આવે છે.

મહેમૂદ ટેસ્ટ ફોર્મેટમાં પણ સહાયક કોચ તરીકે કામ કરશે

બીજી તરફ જો જેસન ગિલેસ્પીની વાત કરીએ તો તેણે ઓસ્ટ્રેલિયા માટે 71 ટેસ્ટ મેચ રમીને 259 વિકેટ ઝડપી હતી. તેણે ઓસ્ટ્રેલિયન ટીમ માટે 97 ODI મેચ રમી હતી, જેમાં તેણે 142 વિકેટ લીધી હતી. યાદ કરો કે ન્યૂઝીલેન્ડ સામેની તાજેતરની શ્રેણીમાં અઝહર મહેમૂદને અસ્થાયી રૂપે પાકિસ્તાની ટીમના કોચ તરીકે નિયુક્ત કરવામાં આવ્યા હતા. પરંતુ હવે સમાચાર સામે આવ્યા છે કે મર્યાદિત ઓવરો સિવાય મહેમૂદ ટેસ્ટ ફોર્મેટમાં પણ પાકિસ્તાની ટીમના સહાયક કોચ તરીકે કામ કરવાનું ચાલુ રાખશે. નોંધનિય છે કે, પાકિસ્તાની ક્રિકેટ ટીમમાં છેલ્લા ઘણા સમયથી ખુબ બબાલ ચાલી રહી છે. કેપ્ટન્સીને લઈને પણ ઘણા વિવાદ સામે આવી ચૂક્યા છે. એવામાં બધા ખેલાડીઓ સાથે તાલમેલ બેસાડવો ગેરી માટે સરળ નહીં રહે.

આ  પણ  વાંચો - GT vs RCB : વિલ જેક્સની તોફાની સદી, બેંગલુરૂની 9 વિકેટે શાનદાર જીત

આ  પણ  વાંચો - શું ISHAN KISHAN એ દિલ્હી સામેની મેચમાં કરી હતી તોડફોડ? BCCI એ ફટકાર્યો આ મોટો દંડ

આ  પણ  વાંચો - LSG vs RR: રાજસ્થાને લખનૌને 7 વિકેટે હરાવ્યું, સેમસન-ધ્રુવની વિસ્ફોટક પારી