શા માટે મનાવવામાં આવે છે World Food Safety Day? જાણો તેનું મહત્વ
World Food Safety Day 2023: દર વર્ષે 7મી જૂને World Food Safety Day ઉજવવામાં આવે છે. વર્ષ 2019 માં, વિશ્વ આરોગ્ય સંસ્થા અને ફૂડ એન્ડ એગ્રીકલ્ચર ઓર્ગેનાઈઝેશનના સહયોગથી પ્રથમ વખત આ દિવસની ઉજવણી કરવામાં આવી હતી, જેથી લોકોને વધુ સારી ખાવાની આદતો વિશે જાગૃત કરી શકાય. દર વર્ષે આ દિવસ માટે એક અલગ થીમ નક્કી કરવામાં આવે છે.
વિશ્વના દરેક લોકોને ખોરાક પૂરો પાડવો એ માનવતાનું મુખ્ય કર્તવ્ય છે. ખોરાક મેળવવો તે પણ માનવ અધિકાર સમાન હોવો જોઈએ. જીવન ટકાવી રાખવા અને સારા સ્વાસ્થ્યને પ્રોત્સાહન આપવા માટે પૂરતી માત્રામાં સલામત ખોરાક મળે એ એક પડકાર છે. વર્લ્ડ હેલ્થ ઓર્ગેનાઈઝેશન (WHO) અને યુનાઈટેડ નેશન્સનાં (UN) ફૂડ એન્ડ એગ્રીકલ્ચર ઓર્ગેનાઈઝેશને આ વર્ષે વર્લ્ડ ફૂડ સેફ્ટી ડેની થીમ “સ્ટાન્ડર્ડ ફૂડ જીવનનું રક્ષણ કરે છે” નક્કી કરી છે.
ઈતિહાસ
જુલાઈ 2017 માં ફૂડ એન્ડ એગ્રીકલ્ચર ઓર્ગેનાઈઝેશન (FAO) પરિષદના 40મા સત્રમાં વિશ્વ ખાદ્ય અને સલામતી દિવસની ઉજવણી કરવાની દરખાસ્ત કરવામાં આવી હતી. WHOએ આના પર પોતાનું સમર્થન જાહેર કર્યું અને ત્યાર બાદ આ પ્રસ્તાવ સંયુક્ત રાષ્ટ્ર મહાસભામાં મૂકવામાં આવ્યો. 20 ડિસેમ્બર 2018ના રોજ યુનાઈટેડ નેશન્સ જનરલ એસેમ્બલીએ આ પ્રસ્તાવ પર મહોર મારી અને 7 જૂને વિશ્વ ખાદ્ય અને સલામતી દિવસની ઉજવણી કરવાની જાહેરાત કરી. WHO અને ફૂડ એન્ડ એગ્રીકલ્ચર ઓર્ગેનાઈઝેશનના સહયોગથી 7 જૂન 2019ના રોજ પ્રથમ વખત આ દિવસની ઉજવણી કરવામાં આવી હતી. ત્યારથી વિશ્વ ખાદ્ય સુરક્ષા દિવસ દર વર્ષે આ તારીખે ઉજવવામાં આવે છે.
હેતુ
વિશ્વ સ્વાસ્થ્ય સંગઠન (WHO) અનુસાર, દૂષિત ખોરાકને કારણે દર વર્ષે લાખો લોકો મૃત્યુ પામે છે. સૌથી મોટી તકલીફ 5 વર્ષથી ઓછી ઉંમરના બાળકો માટે ઊભી થાય છે કારણ કે તેમની રોગપ્રતિકારક શક્તિ ખૂબ નબળી હોય છે. આવી સ્થિતિમાં લોકોને ખાદ્યપદાર્થો વિશે જાગૃત કરવું ખૂબ જ જરૂરી છે. આ હેતુ સાથે, દર વર્ષે WHO અને ખાદ્ય અને કૃષિ સંગઠન સાથે મળીને આ દિવસની ઉજવણી કરે છે.
આ વર્ષની થીમ
દર વર્ષે આ દિવસની ઉજવણી માટે એક થીમ નક્કી કરવામાં આવે છે. વિશ્વ ખાદ્ય અને સલામતી દિવસ 2023 ની થીમ 'ખાદ્ય ધોરણો જીવન બચાવે છે' છે. આ થીમ દ્વારા લોકોએ ખોરાક માટે નિર્ધારિત ધોરણોનું મહત્વ સમજવું પડશે. વર્ષ 2022 ની થીમ 'સેફ ફૂડ, બેટર હેલ્થ' હતી. આ થીમ દ્વારા લોકોને સારા સ્વાસ્થ્ય માટે સ્વચ્છ અને પૌષ્ટિક ખોરાકનું મહત્વ સમજાવવામાં આવ્યું હતું.
પડકાર
વાસ્તવિકતા એ છે કે આપણે વિકાસના અન્ય પાસાઓમાં એટલા બધા ગુંચવાઈ ગયા છીએ કે આપણે આપણી મૂળભૂત જરૂરિયાતો પ્રત્યે ગંભીર નથી. પીવાના પાણીના વ્યવસ્થાપનની વાત હોય કે ખાદ્ય પુરવઠાની કે તેની સુરક્ષાની વાત હોય, આપણે ક્યારેય એ વાત પર ભાર મૂક્યો નથી કે આ પડકારો સાથે આપણું વિકાસ કાર્ય ચાલવું જોઈએ. આપણે બધાએ સમજવું પડશે કે ખાદ્ય સુરક્ષા એ સરકાર, ઉત્પાદકો અને ગ્રાહકોની સહિયારી જવાબદારી છે. ખેતરોમાંથી ઘરના ટેબલ સુધી પહોંચતા ખોરાકમાં દરેક વ્યક્તિની કેટલીક ભૂમિકા હોય છે.
આ પણ વાંચો : MYTH: જો આપણા પગ પુસ્તકો અને સ્કૂલ બેગને સ્પર્શે તો શા માટે માફી માંગવી જોઇએ? જાણો સત્ય
ગુજરાત ફર્સ્ટ તમને સમાચારોથી હંમેશા અવગત રાખશે
ગુજરાતની નંબર 1 ગુજરાતી ન્યૂઝ ચેનલ એટલે ગુજરાત ફર્સ્ટ (Gujarat First) – જે ગુજરાતીઓને દરેક સમાચારમાં રાખે છે આગળ. ગુજરાત, રાષ્ટ્રીય, આંતરરાષ્ટ્રીય, ઇલેક્શન, બિઝનેસ, સ્પોર્ટ્સ, મનોરંજન સહિતના દરેક સમાચાર વાંચો ગુજરાત ફર્સ્ટ પર. હવે દરેક સમાચાર આંગળીના ટેરવે આપના મોબાઈલમા, ડાઉનલોડ કરો અમારી લેટેસ્ટ Android અને iOS એપ. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.