Haryana : નૂહમાં બ્રિજ મંડલ યાત્રાને લઈને પોલીસ પ્રશાસન અને VHP સામસામે

હરિયાણા (Haryana)ના નૂહ (Nooh)માં બ્રિજ મંડલ યાત્રાને લઈને પોલીસ પ્રશાસન અને વિશ્વ હિંદુ પરિષદ (Vishwa Hindu Parishad) સામસામે છે. આજે સાવનનો છેલ્લો સોમવાર છે, જેને ધ્યાનમાં રાખીને વિશ્વ હિન્દુ પરિષદે નૂહમાં જલાભિષેક યાત્રાની જાહેરાત કરી છે. બીજી તરફ, પોલીસ પ્રશાસને કાયદો અને વ્યવસ્થાને ટાંકીને યાત્રાને મંજૂરી આપવાનો સ્પષ્ટ ઇનકાર કર્યો છે, પરંતુ VHP શોભા યાત્રા કાઢવા પર અડગ છે. VHPએ આજે ​​સવારે 11 વાગ્યે બ્રિજ મંડલ યાત્રા કાઢવાની જાહેરાત કરી છે. VHPની જાહેરાતને ધ્યાનમાં રાખીને સમગ્ર નૂહમાં કલમ 144 લાગુ કરવામાં આવી છે. જિલ્લામાં 30 પેરા મિલિટરી ફોર્સની એક કંપની તૈનાત કરવામાં આવી છે. દરેક જગ્યાએ પોલીસ કર્મચારીઓ તૈનાત કરી દેવાયા છે.

નૂહમાં ઈન્ટરનેટ સેવા બંધ છે. પ્રશાસને આજે શાળા-કોલેજો બંધ રાખવાનો નિર્ણય લીધો છે. બીજી તરફ નલ્હાડ મહાદેવ મંદિરની આસપાસ પોલીસે 2 કિમીના વિસ્તારમાં બેરીકેડ લગાવી દીધા હતા. કોઈપણ વાહનને બેરિકેડની બહાર જવાની મંજૂરી નથી. VHPના કાર્યકારી અધ્યક્ષ આલોક કુમાર પોતે યાત્રામાં સામેલ થવા માટે નૂહ પહોંચી રહ્યા છે પરંતુ વહીવટીતંત્રે સમગ્ર નૂહમાં કલમ 144 લગાવી દીધી છે. કોઈ બહારના વ્યક્તિને નૂહમાં પ્રવેશવાની મંજૂરી નથી.

નૂહની સાથે ચાર રાજ્યોની પોલીસ પણ એલર્ટ પર છે. હરિયાણા ઉપરાંત રાજસ્થાન, ઉત્તર પ્રદેશ અને દિલ્હીની પોલીસે પોત-પોતાના વિસ્તારોમાં તૈયારી કરી લીધી છે. હરિયાણા પોલીસના 1900 જવાનો અહીં તૈનાત છે. આ સાથે જ તોફાન વિરોધી ટીમમાં 500 પોલીસ કર્મચારીઓ તૈનાત છે. 26 કંપની પેરા મિલિટરી ફોર્સ, 3 કંપની હરિયાણા આર્મ્ડ ફોર્સના જવાન તૈનાત કરવામાં આવ્યા છે.

નૂહ ઉપરાંત હરિયાણાના ગુરુગ્રામ, સોહના, પલવલ, માનેસર, ફરીદાબાદ, સોનીપતમાં પણ વિસ્તૃત સુરક્ષા વ્યવસ્થા કરવામાં આવી છે. VHP આ યાત્રાને બ્રિજ મંડલ યાત્રા કહી રહી છે જે 31 જુલાઈના રોજ અધૂરી રહી હતી, પરંતુ વહીવટીતંત્ર ટાંકી રહ્યું છે કે આ યાત્રાએ નૂહમાં વાતાવરણ બગાડ્યું છે. સાથે જ ખેડૂતોના સંગઠનોએ એવી પણ ચેતવણી આપી છે કે જો આજે બ્રિજ મંડલ યાત્રા કાઢવામાં આવશે તો ખેડૂતોના સંગઠનો નૂહમાં ટ્રેક્ટર રેલી કાઢશે.

આ પણ વાંચો----CHANDRAYAAN 3 એ ચંદ્રની સપાટી પર કરી પ્રથમ શોધ, તાપમાન વિશે આપી આ મહત્વની જાણકારી…