રાહુલ ગાંધી ફરી અમેઠીથી લડશે ચૂંટણી, યુપી કોંગ્રેસના અધ્યક્ષે કરી જાહેરાત

લોકસભાની ચૂંટણીને લઈને  રાજકીય  પક્ષમાં  તડામાર  તૈયારી  કરવાંમાં  આવી  રહી છે. ત્યારે આ દરમિયાન ઉત્તર પ્રદેશમાંથી મોટા સમાચાર સામે આવ્યા છે. જુ 2024 લોકસભાની ચૂંટણીની જાહેરાત નથી થઈ ત્યાં કોંગ્રેસના પૂર્વ અધ્યક્ષ રાહુલ ગાંધીની ચૂંટણી લડવાને લઈને મોટી માહિતી સામે આવી છે. યુપી કોંગ્રેસના અધ્યક્ષ અજય રાયે જાહેરાત કરી છે કે, રાહુલ ગાંધી અમેઠીથી લોકસભા ચૂંટણી લડશે.

કોંગ્રેસના નવનિયુક્ત અધ્યક્ષ અજય રાયે શુક્રવારે દાવો કર્યો હતો કે પાર્ટીના સાંસદ રાહુલ ગાંધી અમેઠીથી 2024ની લોકસભા ચૂંટણી લડશે. જ્યારે અજય રાયને પૂછવામાં આવ્યું કે રાહુલ ગાંધી લોકસભા ચૂંટણીમાં કઈ સીટ પરથી ચૂંટણી લડશે તો તેમણે કહ્યું કે ચોક્કસપણે રાહુલ ગાંધી અમેઠી સીટ પરથી ચૂંટણી લડશે.

કોંગ્રેસે સંગઠનમાં  ફેરફાર કર્યો છે
કોંગ્રેસ આગામી લોકસભા ચૂંટણીની તૈયારીમાં વ્યસ્ત છે. પાર્ટીએ સંગઠનમાં ફેરફાર પણ કર્યો છે. ગુરુવારે, તેમણે બ્રિજલાલ ખબરીને પદ પરથી હટાવીને પૂર્વ ધારાસભ્ય અજય રાયને ઉત્તર પ્રદેશ કોંગ્રેસ સમિતિ (UPCC) અધ્યક્ષની જવાબદારી સોંપી. પાર્ટી નવા જોશ સાથે કાર્યકરોને પુનર્જીવિત કરવાનો પ્રયાસ કરી રહી છે. ખબરીએ ગયા વર્ષે ઓક્ટોબરમાં UPCC ચીફ તરીકેનો કાર્યભાર સંભાળ્યો હતો. તેઓ પ્રથમ ત્રણ દાયકા સુધી બહુજન સમાજ પાર્ટી (BSP)માં હતા. વિધાનસભાની ચૂંટણીમાં પાર્ટીની હારના થોડા મહિના બાદ પ્રદેશ કોંગ્રેસ અધ્યક્ષ તરીકે તેમની નિમણૂક કરવામાં આવી હતી. જોકે તેમની નિમણૂકના સમાચાર પક્ષના લોકો પચાવી શક્યા ન હતા અને બેચેની જેવી સ્થિતિ સર્જાઈ હતી.

અજય રાય રાહુલ ગાંધીના ભરોસે છે!
કહેવામાં આવી રહ્યું છે કે લોકસભા ચૂંટણી પહેલા રાયને ટોચના પદ પર બેસાડવાના નિર્ણયથી પાર્ટીની અંદર તેમનું વધતું કદ દેખાઈ રહ્યું છે. તેમનું કદ સતત વધી રહ્યું છે. મીડિયા રિપોર્ટ્સ અનુસાર, કોંગ્રેસના એક કાર્યકર્તાનું કહેવું છે કે રાયની નિમણૂકમાં રાહુલ ગાંધીએ મહત્વની ભૂમિકા ભજવી હતી. 80 લોકસભા સીટોવાળા યુપી રાજ્યમાં કોંગ્રેસ પોતાની તમામ તાકાત લગાવવા માંગે છે.

અજય રાય હવે પૂર્વાંચલ પ્રદેશ ખાસ કરીને બનારસનું પ્રતિનિધિત્વ કરતો એક સ્વર ચહેરો બની ગયો છે. એવું કહેવાય છે કે માત્ર ભૂમિહાર સમુદાયમાં જ નહીં પરંતુ બ્રાહ્મણો અને અન્ય જાતિઓમાં પણ તેમની સારી પકડ છે. રાય 2014 અને 2019ની લોકસભા ચૂંટણીમાં વારાણસીથી વડાપ્રધાન નરેન્દ્ર મોદી સામે ચૂંટણી લડ્યા હતા.

આ  પણ  વાંચો -ચંદ્રયાન-3 ની વધુ એક સફળતા, લેન્ડિંગ પહેલા મોકલ્યો નવો વીડિયો