નીતા મુકેશ અંબાણી કલ્ચરલ સેન્ટરની વેબસાઇટ લોન્ચ કરાઇ

મુંબઇમાં  નીતા મુકેશ અંબાણી (Nita Mukesh Ambani) કલ્ચરલ સેન્ટર બનાવામાં આવી રહ્યું છે. આ સેન્ટરની વેબસાઈટનું આજે લોન્ચિંગ કરવામાં આવ્યું છે. 31મી માર્ચ, 2023 સુધી આ સેન્ટર બનીને તૈયાર થઇ જશે. 

નીતા મુકેશ અંબાણી કલ્ચરલ સેન્ટર એટલે કે NMACC વેબસાઈટનું ઓફિશિયલ લોન્ચિંગ કરવામાં આવ્યું છે. આ પ્રસંગે જાહેર કરાયેલા એક વિડીયોમાં RRVLના ડાઇરેક્ટર ઇશા અંબાણીએ કલા માટે પોતાની માતા નીતા અંબાણીના સમર્પણને વધાવ્યું છે. તેમણે કહ્યું કે છેલ્લા 50 વર્ષથી તેમની માતા નીતા અંબાણી નૃત્ય સાધના કરે છે. તેઓ એક બિઝનેસ વુમન છે તો સાથે સાથે સ્પોર્ટ્સના ચાહક અને રિલાયન્સ ફાઉન્ડેશનની ચેરપર્સન છે તો સારા ભરતનાટ્યમ ડાન્સર પણ છે. 

આ પ્રસંગે રિલાયન્સ ફાઉન્ડેશનના ચેરપર્સન નીતા અંબાણીએ કહ્યું કે ભારતની કલાની સુગંધ સમગ્ર વિશ્વ સુધી પહોંચશે. કલાકાર પોતાની કલ્પનાની ઉડાન ભરશે. તેમણે કહ્યું કે આજે હું જે કંઇ છું તે નૃત્યના કારણે છું. ભારતમાં મૂર્તિકલા, નૃત્ય, સંગીત, નાટક અને ચિત્રકારની જૂની પરંપરા છે. મારુ એક સપનું રહ્યું છે કે ભારતની આ કલાની સુગંધ વિશ્વ સુધી પહોંચે. 

ઉલ્લેખનિય છે કે  NMACCમાં પરફોર્મિંગ અને વિઝ્યુલ આર્ટનું પ્રદર્શન કરવામાં આવશે. ત્રણ માળની આ બિલ્ડીંગમાં  પરફોર્મિંગ આર્ટ માટે ધ ગ્રાન્ડ થિયેટર બનાવાશે તથા ધ સ્ટુડિયો થિએટર અને ધ ક્યૂબ જેવા થિએટર બનશે જેમાં આધુનિક ટેકનોલોજીનો ઉપયોગ કરવામાં આવશે.  ગ્રાન્ડ થિએટરમાં 2 હજાર દર્શક એકસાથે બેસી શકશે. ઉપરાંત  કલા પ્રદર્શનમાટે 16 હજાર વર્ગફુટમાં આર્ટ હાઉસ બનશે.